The Noble Qur'an Encyclopedia

Saad.[1] Mi wooɗndirii Alqur'aana, jom waa.

Si ko woni, yedduɓe ɓe ngonii e townitaare e lurral !

Ɗuuɗii e gire ɗen Min kalki, ado maɓɓe, ɓe noddi faabo, kono tawi ko bonatno bonii.

Ɓe ŋalɗi, nde jeertinoowo jiyaaɗo e maɓɓe, arata ɓe. Yedduɓe ɓen mbi'i: "Oo, ko bileejo keewuɗo fenaande,

Kere o waɗay deweteeɗi ɗin, deweteeɗo gooto? Pellet, ɗum ko hu'unde haawniinde non".

Mbatu maɓɓe ngun huccitiri wiide: "Yehee, tabiton e deweteeɗi mon ɗin. Ɗuum ɗoo, ko hu'unde eɓɓanaande.

Min nanaali fii ɗum, e diina sakkitiika kan. Ɗum wonaani, si wonaa ko fefkindaa.

Kere ko e makko Jaŋtoore nden jippotoo hakkunde amen?" Si ko woni, ɓe ngonii e cikkitagol Jantoore am nden. Wurin, ko fii ɓe meeɗaali taho, lepte am ɗen!

Kaa ɓe njogiti ngaluuji yurmeende Joomi maa, pooluɗo, Dokko O?

Kaa ko kamɓe woodani laamagol kammuuji ɗin e leydi ndin e ko woni hakkunde majji? Haray yo ɓe ƴeenŋu ɓe ƴawa!

Ko ɓe konu hoyngu no, foolet e 'peɗle ɗen!

Ado maɓɓe, yimɓe Nuuhu ɓen njedduno, e Aadi'en e Fir'awna jom-peme,

e Samuuda'en, e yimɓe Luutu ɓe, e yimɓe pitaaji ɓen; ko ɓeen ngoni fedde (fennuɓe) ɓeen.

Kala ɓee wonaani, si wonaa o njeddi ii Nulaaɓe ɓen. Lepte Am ɗen jojji e maɓɓe!

Ɓee cabbaaki, si wonaa ha'acaango gooto, ngo alaa ruttorde.

Ɓe mbii': "Joomi amen, yaccinan min geɗal lepte amen, ado Ñalaande hasboore nden".

Muñño e kon ko ɓe mbi'ata; annditaa jiyaaɗo Amen on, Daawuuda, joom doole. Ko o ɗuuɗunooɗo tuubugol.

Min eeltii pelle ɗen, hiɗe cubbunhinoda e makko, ka kiikiiɗe e ka bimmbi.

e colli ɗin, hiɗi mooɓindiraa, kala e majji no tuubana mo.

Min cemmbini laamu makko ngun, Min yeɗi mo Annabaaku e fasinteegal.

Hara kumpital wenooɓe ɓen arii maa, nde ɓe ƴawunoo ka ganngunal !

Nde ɓe naatunoo ka Daawuuda, o ɗenƴii ɓe. Ɓe mbi'i: "Wota a hul ! Ko wennjuɓe ɗiɗo; goɗɗo e amen tooñii oya. Ñaawir goonga hakkunde amen, wota a tooñ, tinndinaa min e laawol Pocciingol ngol.

Oo ko musiɗɗo am: homo jogii baali cappanɗe jeenay e jeenay, miin miɗo jogii baalii gootii. O wi'i: "Henndinam ngii"; o foolimi e yeewtere.

O maaki: "Pellet, o tooñirii ma laɓndagol baalii maa ngii, waɗtugol e baali makko ɗin". Ɗuuɗii ko hawtuɓe tooñindirta hakkunde maɓɓe, si wonaa ɓen gooŋɗiinɓe, ɓe ngolli moƴƴuɗi - ɓen non no fanɗi. - Daawuuda felliti, won'de Min njarribike mo. O imsinanii Joomi makko, o suuyiri sujjugol, o tuubi.

Min njaafanii mo ɗum. Pellet non, hino woodani mo ko amen, ɓadal e moƴƴude ruttorde.

Eey ma Daawuuda, Min mbaɗii ma lomto ka leydi. Ñaawir goonga hakkunde yimɓe ɓen, wota a jokku mbeleeɗe, sakko ɗe majjine e laawol Allah ngol". Pellet, ɓen majjooɓe e laawol Allah ngol, hino woodani ɓe lepte tiiɗuɗe, sabu ko ɓe yejjitiri kon, Ñalaande hasboore nden.

Min tagiraali kammu ngun e leydi ndin e ko woni hakkunde majji kon, meere. Ɗum ko sikke yedduɓe ɓen. Bone woodanii ɓen yedduɓe, e Yiite ngeen!

Ka Min mbɗay ɓen gooŋɗinɓe ɓe ngolli moƴƴi, wano bonnooɓe ɓen ka hoore leydi? Kaa Min mbaɗay gooŋɗuɓe ɓen, wano faajireeɓe ɓeen?

Ko deftere barkinaande, woni ko Min njippini e maaɗa, fii no ɓe taskora aayeeje mayre, e ko joomiraaɓe haqqille ɓen mbaajitora.

Min njeɗi Daawuuda Sulaymaana, - jiyaaɗo moƴƴo - Ko o ɗuuɗuɗo tuubugol-ruttoo.

Jaŋto nde o hollanoo kiikiiɗe, pucci yooɗuɗi yaawuɗi,

o maaki: "Min ɓurnorii joɗgol jawdi, dii ko mi jaŋtotoo Joomi am kon, haa [na'ange] ngen mutoyii.

Nduttee kam ɗi". O woni e sodugol ɗi ka taape e ka daaɗe.

Gooɗii Min njarribike Sulaymaana, Min mbernii e jullere makko nden ɓanndu. refti o tuubi.

O maaki: "Joomi am, haforanam, yeɗaa kam laamu, ngu heertantaako goɗɗo goo, ɓaawo am. Pellet, ko an woni jeɗoowo On".

Min eeltani mo henndu ndun, tawi hindu wifira e sago makko, neweende, nokku kala to o yiɗi.

E seytanuuji ɗiin, mahaynooɗi e mutaynooɗi.

Goɗɗi ɗi, ko dummbaaɗi e peŋɗe.

"Ɗuum ko dokkal Amen. Okkitir, maa njogitoraa ko aldaa e laɓnditoreede".

Ko pellet, hino woodani mo ka amen, ɓadal e moƴƴude ruttorde.

Jaŋto kadi jiyaaɗo Amen on Ayyuuba, nde o noddunoo Joomi makko, won'de : "Seytaane memirii lam tampere e muuseendi".

[Allah wi'ani mo]: "Latir tunndawal maa ngal [ka leydi]: Ɗam ɗoo, ko lootorɗam, ɓuuɓɗam e njaram".

Min njeɗi mo ɓeynguure makko nden, e yeru maɓɓe tawti ɓe, yurmeende immorde e amen, e waaju wonan'de marɓe haqqille ɓen.

"Nanngir sookewo maa ngon, tamere huɗo, piyiraa ɗum [cuddiiɗo maa on], fii wata a firtu (woondoore nden)". Min tawu mo, muññiiɗo. O moƴƴii jiyaaɗo. Pellet, ko o ɗuuɗuɗo tuubugol-ruttoo.

Jaŋto kadi, jiyaaɓe Amen ɓen, Ibraahiima e Ishaaqa e Yaaquuba, joomiraaɓe semmbe e yi'anɗe.

Min keertinanii ɓe heertinannde, annditugol galle (laakara) ɗen.

E kadi ɓee ka amen, ko jiyaaɓe e suɓaaɓe moƴƴuɓe suɓaaɓe.

Jaŋto kadi Ismaa'iila, e Yuusa'u, e Zal-Kifli, kala maɓɓe, ko jiyaaɓe e suɓaaɓe.

Ɗum ko waaju. Ko pellet, hino woodani gooŋɗuɓe ɓen, ruttorde moƴƴunde.

Ɗuum ko Aljannaaji ñiiɓal, ɗi ɓe udditanaa dame mum,

hara ko ɓe soɓɓindii ɓe ton, heɓe nodda ton muuyanteeɗi ɗuuɗuɗi e njaram.

Hino woodani ɓe (ton): raɓɓuɓe ndaarɗe, goreeɓe.

Ko ɗum woni ko podaɗon, fii Ñalaande hasboore ndeen.

Pellet, ɗum ko arsike amen, gasugol alanaa mo.

Ɗuum, [ko njoɓdi maɓɓe]. Pellet, hino woodani kadi bewɓe ɓeen, ko ɓuri bonnde e ruttorde,

woni Jahannama, nge ɓe naatoyta. Nge bonii ndaɗɗudi!

Ɗuum, ko yo ɓe meeɗ: ko fatata, e ƴiƴƴiri,

Woɓɓe ɓen, nannduɗe e majje, ko nooneeji.

E hino dental naatiroyat ngal doole e mon, toolii alanaa ɓe; tawde ko ɓe naatooɓe Yiite !

Ɓeen mbia: bismilla alanaa mon, ko onon ndefi min ɗum". Nge bonii ñiiɓirde.

Ɓe mbi'a: "Joomi amen, defuɗo min ɗuim on, ɓeydan mo leptte cowalle ka Yiite".

Ɓeya mbi'i: "Ko haɗi men jiugol worɓe, ɓe min limtaynoo e boonɓe ɓen?

Hara min njogitorno ɓe toon jalnori, kaa ko gite (amen) yawti ɓe?"

Pellet, ka goonga, ko ɗuum woni yeddondiral yimɓe Yiite ɓeen.

Maaku: "Anndee ko mi jeertinoowo. Deweteeɗo woo alaa, si wonaa Allah Gooto, pooluɗo On,

Jeyɗo kammuuji ɗin e leydi ndin, e kon ko woni hakkunde ɗin ɗiɗi, pooluɗo, kaforoowo On".

Maaku: "(ndee Alqur'aanaare), ko nde kabaaru mawɗo,

kono hoɗon ɗuurnii ɗum.

Ganndal alanaano kam, e fii mbatu ngun dowrowu, tuma nde ɓe weeñidaynoo.

Wahayinaaka e am, si wanaa won'de min on, ko mi jeertinoowo ɓanngina".

Jaŋto nde Joomi maa daalannoo Malaa'ika'en: "Min mi tagiroowo ɓanndiŋke, immorde loopal.

si mi fotindirii mo, Mi wuttii e makko ruuhu am on, haray suuyanee mo cujjon".

Malaa'ika'en fof cujji ɓe denndaangal.

si wonaa Ibuliisa, o mawnintinii, o woni jiyaaɗo e yedduɓe ɓen.

(Allah) daali: "eey ma yo Ibuliisa, ko haɗu maa sujjangol ko Mi tagiri juuɗe am? A mawnintini kaa a jeya e townitiiɓe ɓeen?"

O wi'i: "Ko min ɓuri mo moƴƴude. A tagirii lam e yiite, A tagirii mo kaŋko e loopal".

O daali: "Yaltu ton, aan, ko a diiwaaɗo;

pellet, kuddi sm ndin fawike ma haa Ñande njoɓdi diina".

(Ibuliisa) wi'i : "Joomi am, neeɓnitanam, haa ñande nde ɓe immintintee".

O daali: "A jeyaama e neeɓnitanteeɓe ɓen,

haa e ñalaande happu ganndaaɗo".

O wi'i: "Mi wooɗndirii mawngu maa ngun ! Ma mi bewnuɓe fof maɓɓe,

si wonaa jiyaaɓe Maa, laɓɓinaaɓe ɓen e maɓɓe".

(Allah) daali: "Mi wooɗndirii goonga, ko goonga mi wowlata,

ma Mi hebbinire Jahannama, e ɓen jokkuɓe ma fof e maɓɓe".

Maaku: "Mi laɓndaaki on njoɓdi e fii ɗum; mi wonaali jeyaaɗo e sincooɓe(deftatoobe).

Ndee [Alqur’aanaare] wonaani, si wonaa waaju tageefo ngon.

Ma on nganndu (fii) kabaaru mayre, ko neeɓaa !".