The Noble Qur'an Encyclopedia

Alif-Laam-Ra (su Allah i mataw kanu ma'na nin), nya ba su manga ayatan na Qur’an a mapayag.

Saben-sabenal a initulun nami su Qur’an sa basa na Arab ka endu kanu makapagungangen.

Sekami na panudtulen nami sa leka (Muhammad) su manga mapya a manga tudtul sabap kanu ini-wahi nami sa leka a namba a Qur’an, endu saben-sabenal sa unan a dapan makatulun sa leka na dala sabut nengka lun.

Pidtalu nu Yusuf kani ama nin: Hay ama ku! Saki na nailay ku i sapulu endu isa a bitun endu senang endu ulan ulan a sinugyudan aku nilan.

Tig nu ama nin: Hay wata ku! Di ka mamanudtul i taginepen nengka kanu manga suled nengka ka tipun ka nilan ka benal su Shaytan na satru na manusya a mapayag.

Mamba i kabpamili nu Kadenan nengka endu pakatawanin sa leka i ta'weel sa manga kadtalu endu sampulnan nin sa leka i limu nin sa leka endu su manga kadakel nu Ya'kub sa mana su kinasampulna nin kanu manga lukes nengka a si Ibrahim endu si Ishaq, ka su Kadenan nengka i mataw sa mapayag-masulen.

Saben-sabenal kanu Yusuf endu su manga suled nin na manga tanda kanu bagidsa (indawan-ibaratan).

Pidtalu nu manga suled nin: si Yusuf endu si (Binyameen) na ya bu ikalimu nu ama tanu sa lekitanu, na sekitanu i manga kaka, saben-sabenal a gatading su ama tanu sa mapayag.

Imatayi nu si Yusuf ataw ka idtug nu sa ped a dalpa para sekanu bu i mailay ni ama nu, mauli lu (edtawbat kanu) na pagaden kanu sa mga taw a mga matidtu.

Ya pidtalu nu masla kanilan: di nu pembunu su Yusuf ugayd na ulug nu sa kalut ka makwa bun nu kaped kanu bamelakaw amayka enggulan nu.

Pidtalu nilan kani ama nilan: ama nginan ka di nengka makasalig sa lekami si Yusuf? Na saben- sabenal a sekami na bagungayan nami.

Paunut ka sa lekami namag, endadalemet san sa manga katampukan ka tuganulen nami bu.

Tig ni ama nilan: malidu i ginawa ku sa kapaunut nu lun, endu kagilekan aku sa makan a arimaw, na sekanu na makadtalipenda nu.

Tig nilan: amayka makan a arimaw, na sekami a manga kaka nin na sekami den i manga taw a nangalugi.

Guna bagangay silan endu naumpung silan sa ulugen si (Yusuf) sa kalut, na ini-wahi nami kanu (Yusuf) i di ka pelidu i ginawa nengka ka katawan nengka bun i pinakaydan nilan sa leka sa di nilan magedam.

Nakawma silan kani ama nilan sa bamangulyang.

Pidtalu nilan: Hay ama nami! Saben-sabenal a minangay kami ka pendadalemet kami na natagak nami si Yusuf lu kanu kasangkapan nami (pembantay kanu manga gamit nami) na kinan a arimaw, endu di kami nengka bangimbenalen apiya benal i pedtalun nami?

Endu pidtapik nilan su balegkas si (Yusuf) a aden lugu nin a kalbutan, tig nu ama nilan: Kena! Ka sinugu kanu na ginawa nu sa kapagakal, na edsabar aku sa matilak, endu su Allah i bangeniyan sa tabang sa langun a pedtalun nu anan.

Nakawma kanu kalut i pamelakaw, sinugu nilan i sakataw a tinumabu kanu kalut, na ya nin pidtalu: mapya gayd i nya a wata, endu inipagena nilan ka endagangen nilan, na su Allah na katawan nin i langun a penggalebeken nilan.

Pibpasa nilan sa alaga a paidu sa pila bu a dirham, ka dala nilan katawi i mapulu i alaga nin (ka nabi).

Endu pidtalu nu namasa lun kanu kaluma nin sa inged sa Mis’r, ipulu nengka i kabetadan nin (ebpiya-piyani ka) ka basi aden katagan nin sa lekita, atawa ka embabatan ta, endu mamba i kinapadtakena nami kanu Yusuf sa lupa (sa Mis’r) endu pamandun nami sa ka-ta'weel sa manga kadtalu, endu su Allah bun i makagaga kanu kahanda nin ugayd na madakel sa taw i di mataw.

Guna makasampay (si Yusuf) sa matulanged (pegkakanakan) na inenggan nami sa kaungangen endu kataw, endu mamba i kabalas nami kanu manga mapya.

Inenggat nu (Zalikha) sa mawag su (Yusuf), endu pinintuwan nin i bengawan endu pidtalu nin (Zalikha): sya ka den, tig nu (Yusuf): lumindung aku sa Allah a Kadenan ku a pinagkapiya aku nin, saben-sabenal a di egkapiya su manga dupang.

Saben-sabenal a nagkahanda nin (su Yusuf) u di kena bu nailay (ni Yusuf) su tanda na qudrat nu Allah na magkahanda nin (si Zalikha), ka ibagawa nami kani (Yusuf) su mawag endu maledsik, ka sekanin na kuyug kanu manga ulipen a manga mapya.

Nalalaguy kanu bengawan sa embida i kahanda sa nakisi i balegkas (nu Yusuf) sa taligkudan, nawma nilan (su amu nin a kaluma nu Zalikha) kanu bengawan, tig nu (Zalikha): nigin i pakaydan sa taw a kyugan nin sa mawag su kaluma nengka? Ya tabiya na bilanggun atawa siksan sa masakit.

Tig nu (Yusuf): sekanin bun i bamagayuk sa laki, endu midsaksi i sakataw a wata kanu walay (peb-puyuten pon) tig in: amayka nabisay sa sangulan su balegkas nu (Yusuf) na benal (si Zalikha) malbut si (Yusuf).

Amayka nabisay sya tampal sa taligkudan na malbut (si Zalikha), benal (si Yusuf).

Guna mailay (kaluma nu Zalikha) i sya sa taligkudan i bisay, tig in: saben-sabenal ebpun kanu sasat nu, ka masla gayd i sasat nu a manga babay.

Yusuf, sugatan inan (a bityala), seka Zalikha pa- ampun ka sa Kadenan nengka, ka nakuyug ka kanu manga taw a nalimban.

Endu pidtalu nu manga babay kanu dalpa: su kaluma nu Abdul-aziz na pegkyuga nin sa mawag i wata nin, saben-sabenal a napenu na kyugin endu basi nan a babay na gatading sa mapayag.

Guna nin makineg i libakan sa lekanin na pina- angayan nin tanan (su pelibak), endu pidtatalanganan nin silan sa bagayanan, aden pegken endu gelat entu pan a pidtalu (ni Zalikha kanu Yusuf) i gemawi kapan silan, nakalad (napalyan) nilan i manga lima nilan sa di nilan gagedam endu nadtalu nilan i benal ka bun (Zalikha) di kena besen manusya inan, ugayd na malaikat a mapulu (ka mapya gayd i palasin).

Tig nu Zalikha: namba su ipedtila nu sa laki i libak nu, endu bamityalan ku sekanin na dala atu, endu amayka di nin palityalan i sugwan ku sa lekanin na ipabilanggu, endu makuyug kanu manga taw a endaw i kyug ku lun.

Tig nu Yusuf: Kadenan ku, ya ku tumu i bilangguwan sa enggatan nilan sa laki, endu amayka di nengka iyawa sa laki su sasat nilan na di ku kamilikan i ginawa ku, na makuyug aku kanu manga jahil.

Tinalima nu kadenan nin, na inawa nin kanu (Yusuf) su manga pakayd nu manga babay, ka su a Allah i pakakineg a mataw.

Mawli na kinailay nilan sa manga tanda benal (su Yusuf) na inipabilanggu nilan bun sa mangagan bu i kataw nilan.

Nakaludep i duwa kataw a wata (banunugun) sa bilangguwan, pidtalu nu sakataw: midtaginep aku sa pegkemes aku sa baginumen, endu tig nu sakataw menem: bangutu aku sa pan sya kanu ulu ko a pegkanen a papanuk su pan, edtalu ka sa lekami i ma'na nin ka mapya ka a taw.

Tig nu (Yusuf): di kanu pan makakan sa saguna a gay na panudtulen ko sa lekanu i ta'weelan nin sa di pan makawma su pegken nu, ka entuba i pinakatawan nu Kadenan ku sa laki ka saki na tinagak ku su agama nu manga taw a di bangimbenal sa Allah endu silan na peg-kafiran nilan i gay a mawli.

Ya ku tinuntul na agama nu lukes ku a si Ibrahim endu si Ishaq endu si Ya'kub, na dala sa lekitanu i sakutun tanu su Allah sa apiya paydu, ka entuba i limu nu Allah sa lekitanu endu su manga manusya, uged na ya madakel sa manga taw na di masukur.

Hay sekanu duwa a bilanggu! Ngintu ya mapya i madakel i Kadenan atawa ka ya mapya na sawalu bu a pakagaga?

Da kanu pedsimban nu a salakaw sa Allah ya tabiya na manga ngala a inipamedtu nu endu su manga lukes nu, a dala initulun nu Allah a tindeg, na dala hukuman ya tabiya na kanu Allah, inisugu nin i da kanu pedsimba sa salakaw sa lekanin, ka entuba i agama a matidtu, ugayd na ya madakel kanu manga taw i di nilan katawan.

Sekanu duwa, isa sa lekanu i na makambalingan sa galebek nin a kapainum sa datu, su isa menem na palepan (makalepa) sya sa kayu a tudtugen a papanuk su ulu nin, di den kaumbayan i namba a tudtulan nu taginepen nu.

Pidtalu nin kanu isa a pakalyu: labit aku nengka bu kanu datu nengka, na pinalimpangan nu shaytan i kalabitin (kanu datu nin), na natangen pan sa bilangguwan (si Yusuf) sa manga lagunan pan.

Endu pidtalu nu datu: nailay ku i pitu a manga sapi a manga sebud a pegken na pitu menem a magasa, endu pitu menem i tiyugkayan a gadung (mailaw gayd), endu pitu menem i nagangu, sekanu a kangasaligan, edtalu nu sa laki i namba a taginepen ku amayka mataw kanu sa ma'na na taginepen.

Tig nilan dala bun inan ka midsisimbula taginepen, endu di kami mataw sa tudtulan a taginepen.

Pidtalu (nu mama a nakalyu sa bilangguwan) sa ulyan a nawget pan a timpu (sa nampan a nalugud nin): saki i manudtul sa ma’na nin, sugu aku nu (lu sa kanu Yusuf).

Pidtalu nin: Yusuf a benal i kadtalu nin, edtalu ka i ma'na na pitu a manga sapi a masebud, a pegken na pitu a magasa, endu pitu ka tyugkay i gadung, endu pitu menem i nagangu, ka u makawli aku na madtalu ku endu katawan nu manga taw.

Tig nu (Yusuf): pamula kanu sa pitu lagun, na langun a masabpet nu na lu den mun kanu tyugkayan nin, ya tabiya na su makan bu sa sagugunay.

Mawli na makawma i pitu lagun a mapasang (kanggutem) sa kanen nin menem su initagu nu, ya tabiya na paydu bu kanu tinakes nu (tinagu nu) (pitu lagun na mapya su uyag-uyag, pitu lagun menem i kanggutem)

Mawli na mauma menem i lagun na ulanan den su manga taw endu uman isa na enggalebeken nin i galebek nin sa mapya.

Tig nu datu: pasya nu sa laki su (Yusuf), guna makawma sa lekanin su sinugu na tig in embalingan ka lu kanu datu nengka, ka idsa nengka sa lekanin u ngin i betad nu manga babay a nangatebped i manga lima nilan, ka su kadenan ku na katawan nin i pakayd nilan sa laki.

Tig nu (datu): sekanu a manga babay ngin i kahanda nu kani (Yusuf)? Ya nilan nadtalu: dala natawan nami kanu Yusuf a mawag apiya paydu, midtalu (si Zalikha): saguna na mib-payag su bantang, saki bun i bamagayuk (kanu Yusuf) sa marat, endu sekanin na isa kanu langun u benal i kadtalu nin.

(Si Yusuf na midtalu) ka endu katawan nu (Abdul aziz): dala ku endupangi su kaluma nin sa gayb, endu su Allah na di nin tutulun su manga taw a makagkayd sa kaped nin.

Di ku bun ibpalaw i ginawa ku, kagina su ginawa na pedsugu sa mawag, ya tabiya na su inikalimu nu Kadenan ku, ka saben-sabenal kanu Kadenan ku na bangampun a malimu.

Pidtalu nu datu: pa-siya nu sa laki (su Yusuf) ka baluyen ku a isa kanu kangasaligan ku, guna nin makambityala na tig nu datu sa lekanin: seka (Yusuf) na saguna na sya ka sa lekami na aden pangkatan nengka a kasaligan.

Tig nu (Yusuf): baluy aku a tumuldu sa kapaguyag nu manga taw ka saki na katawan ku i katuganul sa kauyagan nu manga taw.

Mamba i kinapadtakena nami (kinapagkaleben nami) kanu yusuf siya sa lupa a pendaya-daya sekanin sa apiya endaw pegkyug, ipasugat nami kanu limu nami su kagkahanda nami, endu di nami dadagen su balas nu manga taw a manga mapya.

Endu su balas lu sa akhirat na ya pan labi i kapiya nin kanu silan a nangimbenal endu (su manga taw) a kagilekan sa gay a mawli.

Nakawma su manga suled nu Yusuf, na linemudep silan, nakilala nu Yusuf silan, na da nilan makilala (su Yusuf).

Guna nin palulani (inenggan sa pegken) su langun nu pigkudan nilan sa pegken, tig nu Yusuf: pasiya nu i suled nu entu kani ama nu (si Binyameen), egkailay nu i saki na dala kulang nin i kabpagasad ku sa lekanu, endu saki na mapya aku pedtumpan.

Na amayka di nu makapasiya sa laki na dala den asaden sa lekanu sya salaki (da den makwa nu) endu da kanu den semya sa laki.

Tig ilan: ipamagayuk nami sekanin kani ama nin, endu di ebplis na enggalebeken nami (lu kani ama i makaunut).

Pidtalu nu (Yusuf) kanu manga panunugun nin: idiken nu bu i manga dagangan nilan san sa pegkudan nilan anan, (imbalingan nu i daganagan nilan) ka basi makilala nilan bun amayka makawma den silan sa walay nilan ka basi embalingan pamun silan endagang ka tabiya bun ka dala kaped a dagangan nilan a salakaw sa namba.

Guna makawli silan lu kani ama nilan na pidtalu nilan: Hay ama nami! Sinapalan kami sa ka-it nami sa dagangan (u di makaunut si Binyameen) paunut ka sa lekami ka endu makandagang (kami pon), endu sekami na tuldun nami sekanin (tyakapan nami si Binyameen).

Tig nu (Ya'kub): da pakayda nu sa lekanin ya tabiya na mana bun kina pakayd nu kanu kaka nin a nauna (si Yusuf) na su Allah i labi a mapya a tumuldu, endu sekanin i labi a malimu kanu langun nu manga malimu.

Na guna nilan bungkala su lulan nilan na lubun su manga dagangan nilan sa nakambalingan kanilan, tig nilan: Hay ama nami! Ngin pan i kyugan tanu sa niya bun su manga dagangan nami sa nakambalingan sa lekami? Endu kawmanan kami sa ma-it na satiman a unta (amayka makaunut), namba na paydu pan intu sa ginawa na datu antu.

Tig nu (Ya'kub): di ku paunuten sa lekanu (su Binyameen) taman a di aku nu enggan sa pasad ebpun sa Allah sa imbalingan nu sa laki (si Binyameen) ya tabiya na su di nu magaga, guna enggay silan sa pasad nilan, tig nu (Ya'kub): su Allah i mataw kanu bityala tanu, a tumuldu.

Pidtalu nin: sekanu a manga wata ku da kanu lemudep sa bengawan a satiman bu, na ebpalak kanu sa kaludep nu kanu manga bengawan endu di aku makambaraguna sa lekanu sa kahanda nu Allah sa apya paydu, ka dala egkuwan sa hukuman ya tabya na su Allah a sinaligan ku endu sekanin a Kadenan i wagib a saligan nu bamedsalig.

Guna silan makaludep sa mana su suguwan nu ama nilan na dala makambarapantag kanilan kanu kahanda nu Allah, ya tabiya na su lu sa kanu ginawa nu Ya'kub a di silan masasat sa kaludep endu su Ya'kub na aden ilmu nin kanu pinakatawan nami sa lekanin, ugayd na ya madakel kanu manga taw na di manga mataw.

Guna makaludep silan kanu Yusuf na inidsenggay nin su suled nin, tig nu (Yusuf): saben-sabenal a saki su suled nengka a si (Yusuf), na di ka peliduwa i ginawa nengka sa pinakaydan nilan sa laki, endu da ka pedtalu-talu.

Guna nin belulani su pegkudan nilan (sa manga pegken) na initagu nin su asadan a bulawan san sa pegkudan nu suled nin (Binyameen) mawli na inayanan silan nu banawag: Hay sekanu a migkukuda! Sekanu na nanegkaw kanu.

Nakabpelen silan sa nakasangul, ya nilan pidtalu na ngin i nadala sa lekanu ka pangilayn nu.

Tig nilan: nadadag su asadan nu datu (a bulawan), endu bungkalen nami i langun na manga lulan nu ka saki i mataw lun apiya endaw matun.

Tig nilan: benal sa Allah, natawan nu i di kena ya nami kina sya i baminasa kami sa kanu dalpa endu di kena kami manga tegkaw.

(Isa kanu taw nu Yusuf na midtalu): ngin i balasin (pakaydan lun) amayka pendalbut kanu?

Tig nilan: ya nin balas (pakaydan lun) na su katunan sya kanu pegkudan nin na sekanin i balasin (makatabun) ka mamba i balas kanu manga dupang.

Inuna nilan mungkal su kanu mga kapedin kanu suled nin, mawli na lu nilan natun kanu suled nin (Binyameen), mamba i kinapagitung nu Yusuf a mapya, dala nin kwaya su ali nin sa tekaw atawa hukuman nu dalpa (kitaban nu datu) ya tabiya na kahanda nu Allah, tig nu Allah: ipulu nami sa pangkatan su magkahanda nami endu uman isa mataw na aden menem saka mataw pan sa lekanin.

Ya nilan pidtalu na amayka nanegkaw (si Binyameen), na mana bun si kaka nin a (Yusuf) sa nawna a nanegkaw, na dala den edtalu su Yusuf endu dala nin ipayag kanilan sa yanin pidtalu sa ginawa nin (nanggiginawa nin): sekanu i manga taw a mawag, katawan nu Allah i pedtalun nu banan.

Ya nilan pidtalu: Hay mapulu! Aden ama nin a matuwa na sya ka kuwa sa isa sa lekami a gantinin, (gantiyan nilan si Binyameen) ka seka a taw na gailay nami i kapiya nengka sa lekami.

Tig nu (Yusuf): lumindung aku sa Allah i kwan nami i di kena natunan sa kasangkapan nami ka sekami i dupang sa pandusan nami i da dusa nin.

Guna su di nilan magaga (bamityala) na sinumibay silan a bamagedunga, ya pidtalu nu kaka na ngintu natawan nu si ama tanu na kinumwa sa pasad sa lekitanu sa midsapa tanu sa Allah endu nawna pan a pinakaydan nu kanu Yusuf? Tig in: di aku gumanat sya ba a lupa taman a di aku sugutan ni ama ku, atawa sugutan ako nu Allah, ka sekanin i mapya i hukuman nin.

Uli kanu, edtalu nu kani ama nu: Hay ama nami! Su wata nengka a mama (su Binyameen) na nanegkaw na di kena kami pedsaksi ya tabiya na su natawan nami endu dala sa lekami i matuldu nami i gayb (katawan nami i manggula i nya).

Idsay ka su taw na dalpa antu a napantagan nami (inangayan nami) endu su migkuda a nasangulan nami ka benal kami (di kena kami bagakal).

Tig nu Ya'kub; atulan nu ginawa nu bun inan, mana bun su nawna (pinakaydan nu kani Yusuf) edsabar aku sa matilak ka basi imbalinganin bun silan tanan sa laki ka su Allah i mataw sa mapayag-masulen.

Tinangka nin silan (tinumaligkud) endu pidtalu nin su lidu na ginawa nin kanu Yusuf sa migkaputi su mata nin (nabulag) sa lidu na ginawa a malugkug.

Tig nilan: idsapa ku sa Allah, di nengka bun gapitas (galipatanan) i tadem kani Yususf, taman sa egkalubay ka ataw ka mabinasa ka den (na tadem nengka kani Yusuf).

Tig nu (Ya'kub): lu ku bu man idsa ku (ilingasa/ imbuko) sa Allah i lidu na ginawa ku, endu katawan ku ebpun sa Allah su di nu katawan.

Hay manga wata ku! Lu kanu ka panalentengu su Yusuf endu su suled nin, endu da kanu pedtebpekan kanu limu nu Allah ka dala taw a tinebpekan kanu limu nu Allah ya tabiya na su (taw) manga kafir.

Guna makaludep silan kanu Yusuf, tig nilan: Hay mapulu! nawma kami na gutem kanu dalpa nami, aden napananggit nami a dagangan na bayadi ka pan sa pegken endu sadaqay kami pan ka balasan nu Allah su pedsadaqah.

Tig nu Yusuf: ngintu natawan nu su pinakaydan nu kani Yusuf endu su suled nin sa sekanu na jahil kanu pan?

Nadtalu nilan: na enduken seka besen su Yusuf? Tig in: saki ba su Yusuf endu nan su suled ku, inikalimu kami nu Allah ka natimu kami, kagina su taw a magilek a tumigkel na su Allah na di nin dadagen su balas nu manga mapya a taw.

Tig nilan: idsapa ku sa Allah na saben-sabenal a inilabi kanu nu Allah sa lekami endu sekami i nalimban kami a benal.

Tig nu Yusuf: dala dusa nu sa laki saguna, ampunen kanu nu Allah endu sekanin i malimu kanu langun u malimu.

Pananggit nu i balegkas ku anan, ibetad nu lu sa biyas ni ama, makambalingan su kailay nin endu pasya nu kanu dalepa ku i kadakel nu langun (langun a manga kaluma endu manga wata nu).

Su kinaganat nu migkuda, nadtalu nu Ya'kub: gabaw ku su baw nu Yusuf, u di kena bu su edtalun nu i saki na pembungaw aku (na madtalu ku i bibyag si Yusuf).

Pidtalu nilan: idsapa ko sa Allah na di ka bun gapinda sa kinalimban nengka sa nawget den.

Guna makawma su makapiya sa ginawa na inibetad nin kanu biyas nin (su balegkas nu Yusuf) na nakailay (su Ya'kub) ya nin pidtalu na: pidtalu ku ba sa lekanu i saki na aden katawan ku ebpun sa Allah a di nu katawan.

Pidtalu nilan: Hay ama nami! Ipangeni kami nengka sa ampun sa kanu manga dusa nami ka sekami na nalimban kami a benal.

Tig nu (Ya'kub): di ebplis i kapangeni ku sa lekanu sa ampun kanu Kadenan ku ka sekanin i bangampun a malimu.

Guna makaludep silan kanu Yusuf, kinuwa nin su duwa a lukes nin endu pidtalu nin i ludep kanu sa Mis’r, sa kahanda nu Allah sa tumatana kanu.

Pina-ayanin su duwa a lukes nin kanu bagayanan nin endu nakambaba sa nakasugyud i manga suled nin endu pidtalu nu Yusuf: Hay ama! Nya den ba su ma'na nu taginepen ku a nauna a saben-sabenal a tinuman nu kadenan ku ka benal endu pinag-kapiya aku nu Kadenan ku kanu kinapalyu nin sa laki sa bilangguwan endu pinasya kanu nin sa laki ebpun sa dalem sa ulyan na kinasasat nu Shaytan sa laki endu su manga suled ku ka su Kadenan ku na sangat a malimu sa magkahanda nin, ka sekanin na mataw sa kapandadaita-kapambetad.

Kadenan ku inenggan aku nengka sa kadatu, endu pinagkataw aku nengka sa kapasangul sa ilmu endu ma'na na kadtalu (taginepen) a (seka bu) i minumbal kanu manga langit endu lupa, seka i tumuldu sa laki sya sa dunya endu akhirat, na imatay aku sa Muslim aku, endu ikuyug aku nengka kanu manga mapya a manga taw.

Entuba i a manga tudtulan a gayb, (da mataw lun) na ini-wahi nami sa leka (Muhammad) endu da ka matabu sa kinapagumpung nilan sa kapakayd ilan kani Yusuf, ka endu nilan makuwa su limu nu (Ya'kub).

Endu da kanu manga taw i apiya ngin den i kapamikal nengka i mangimbenal silan.

Di kena ka pegkuwa kanilan sa sukay nengka, uged na ipapedtadem (su Qur’an) endu ibangindaw.

Madakel i manga tanda a qudratu Allah sya sa langit endu sya sa lupa a pedsagadan nilan endu dala patagan nilan lun.

Endu dala pangimbenal su kadakelan kanilan sa Allah ya tabiya na silan (na midsisingguman) sa kapedsakutu.

Ngintu tinangked nilan i di silan mawma nu makatekaw ebpun a siksa nu Allah atawa makawma kanilan su gay a mawli (kapatay) sa makatekaw endu di nilan madsagipa.

Edtalu ka (Muhammad): nya ba i lalan ku na ka-enggat ku sa manga taw lu sa Allah sa aden tindeg ku endu su minunut sa laki endu mahasuti su Allah endu da ku makuyug kanu mga mushrik.

Dala sinugu nami a nauna sa leka a di kena mama, ibpe-wahi nami kanilan ebpun kanu manga taw sa dalpa, ngintu ka di silan lumalakaw kanu dalpa ka endu nilan mailay u ngin i nauli kanilan a nanggula nilan? Endu su dalpa sa akhirat na ya labi i kapiya nin kanu magilek sa Allah na ngintu ka di kanu magungangen.

Taman sa tinebpekan su manga sinugu endu na antap nilan sa mabagel i pinandalbut silan na nakawma kanilan su tabang nami na lepasen nami su magkahanda nami endu di malen (dala makasapal) kanu siksa nami kanu manga taw a manga kafir.

Saben-sabenal a natagu kanu tudtulan kanilan i manga ibaratan kanu manga taw a aden pamikiran nin, di kena pagelin i bityala a ipedtebu (su Qur’an), ugayd na ipembagel kanu manga nauna a manga kitab endu pebpayagan kanu langun nu enggaga-isa (a hukuman) endu tutulu endu limu kanu manga taw a mu'min.