The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe Smoke [Ad-Dukhan] - Filipino Translation (Maguindanaon) - Rowad Translation Center
Surah The Smoke [Ad-Dukhan] Ayah 59 Location Maccah Number 44
Ha-Meem (su Allah i mataw kanu ma’na nin).
Saki (Allah) idsapa ku su kitab a mapayag.
Saben-sabenal initulun nami (su Qur’an) kanu magabi a barakat, saben-sabenal a ipapegkagilek kanu manga taw.
Su namba a magabi i bagatulen su manggula nu manga taw kanu salagun.
A kabpagatul ebpun sa lekami ka sekami i pedsugu.
Limu ebpun sa Kadenan nengka (Muhammad) ka saben-sabenal a sekanin a (Allah) i pakikineg a mataw.
Kadenan nu manga langit endu su lupa endu su pageletan nu duwa entu amayka ipedtagu nu sa ginawa.
Da kadenan ya tabya su Allah, a banguyag a bangimatay, a Kadenan nu endu su manga lukes nu nangawna.
Ugayd na penduwa-duwa silan a pendadalemet bu silan.
Angapi ka (Muhammad) su gay a kambuwat nu langit sa bel (edtagebel) a mapayag.
Gabawsan su manga taw, namba a siksa a masakit.
Kadenan nami, iyawa nengka i siksa anya ka saben-sabenal a mangimbenal kami den.
Da kagaga nin su iman kanu kawma nu siksa na saben-sabenal a nawma bun silan nu sinugu a mapayag.
Mawli na dala pinatagan nilan sa sinugu endu pidtalu nilan: bamandu (sa Qur’an) na buneg.
Saben-sabenal na iyawa nami sa paydu su siksa kadsalumanan nu bun i kadupangan.
Aden gay a madsima nu su bagel nu Allah a masla, ka saben-sabenal a simulip kami.
Endu saben-sabenal a finitna nami bun su nawna sa kanilan a manga taw ni Fir’awn, endu nakawma bun sa kanilan i sinugu a mapulu (su Musa).
(Pidtalu nin): talima nu su enggaga-isa ku sa lekanu a manga ulipen nu Allah, ka sinugu aku a kasaligan.
Endu di nu pebpapuluwi su Allah, ka aden tindeg ku a mapayag.
Endu lumindung aku sa Kadenan ku a Kadenan nu bun sa kabamalantay nu.
Endu amayka di kanu mangimbenal sa laki, na di aku nu den belingasa.
Nangeni kanu kadenan nin na silan a manga taw na darwaka.
Paganat ka su manga ulipen ku kanu magabi, ka seleden kanu ni (Fir’awn).
Endu itagak nengka su lagat sa endaw i palas nin (pedtana a malingaw) ka makageled silan.
Ngin den i kadakel a natagak nilan a manga surga endu manga buwal.
Endu pamulan endu pedtindegan a mapulu (manga taw ni Fir’awn)
Endu limu a pegkalilinyan nilan.
Mamba i nanggula na pinawarisan nami su dalpa nilan sa salakaw a manga taw.
Endu dala bun silan ulyangi nu langit endu su lupa endu dala den makakisu sa apya paydu su tyuba sa kanilan.
Endu saben-sabenal a linepas nami su tupu nu Israel kanu siksa (ni Fir’awn) a pakabinasa sa kanilan.
Kagina si Fir’awn na mibpapulu (migkadenan) na nabaluy sekanin a nakasagad i palangay nin sa kumpasan.
Endu saben-sabenal a pinamili nami silan (Israel) sa kataw nami kanu dunya.
Endu inenggan nami silan sa manga ayat a batalu a mapayag.
Saben-sabenal su manga taw (sa Makkah) na ya nilan kadtalu na-
Nya bu ba i kawyag tanu, dili tanu den makambibiyag sa ulyan a kapatay tanu.
Pambuwat nu su manga lukes nami amayka benal a sinugu kanu.
Ngintu silan pan i mapya kanu manga taw a nawna sa kanilan a bininasa nami silan, kagina silan a manga taw na darwaka.
Endu da kanu kinabaluy nami kanu manga langit endu lupa endu su pageletan nin sa mindadalemet kami bu.
Na da kinabaluy nami kanu langit endu su lupa ya tabya na bantang, ugayd na ya madakel kanu manga taw i di mataw.
Saben-sabenal su gay a kagkukum i waktu nilan langun.
Gay a dala katagan nu kadsuled kabpakat apya paydu endu dala makadtabang sa kanilan.
Ya tabya na su inikalimu nu Allah a mapulu a malimu.
Saben-sabenal su kayu a zaqqum-
I pegken nu manga taw a baradusa.
A mana bun sebu na lana sya sa tiyan.
Sa mana bun kapedsebu na ig a sangat i kayaw nin.
(Ya pidtalu): kwa nu su baradusa ka isumek nu san sa naraka jahannam.
Mawli na bubuway nu su ulu nin kanu siksa a sangat i kayaw nin.
(Edtalun sa kanilan): nanami ka ka seka i pemamasla a pebpapulu.
Ka saben-sabenal nyaba su siksa a penduwa-duwa kanu.
Saben-sabenal su magilek (sa Allah) na lu silan sa pedtindegan a dala lingasa nin.
Kanu manga surga endu manga buwal.
Pembalegkas silan sa manga sundus a pegkingdat a pedsasangulay silan.
Endu pinagkaluma silan sa manga bidadari.
Pandayan silan sa manga unga na kayu a sagyahatra.
Dala mananam nilan a kapatay a liyu kanu kinapatay nilan paganay, endu dinalindingan silan kanu apuy sa naraka.
Limu intu ebpun kanu Kadenan nengka, entu ba i badtugan a masla a mapya.
Pinakalemu nami (su Qur’an) sa basa nengka ka endu silan ma-indaw.
Pagangapa ka den (Muhammad) ka silan a manga darwaka na bangangapa bun silan na naraka.