The Noble Qur'an Encyclopedia

Saki (Allah) na idsapa ku su sambel a pembayug sa libubuk.

Endu su dadtem a bananggit sa ulan a mawgat.

Endu su manga kapal (barku) a malemu i kabpagiseg nin sa lagat.

Endu su manga malaikat a pembad-bad kanu manga rizki endu ulan.

Saben-sabenal su ipebpasad sa lekanu na benal.

Endu saben-sabenal su balas a malat-mapya na mawma.

Endu su langit na aden lalan nin.

Saben-sabenal sekanu na mimbida-bida sa kadtalu galebek.

Simibay den (kanu nabi) i pedsibay.

Namulkan su manga budtuden.

Silan antu a manga taw a napenu na di kataw.

Ya nilan idsa: kanu i kawma na gay a mawli?

Gay a mapagyaw silan sa naraka.

(Edtalun sa kanilan): nanami nu su siksa nu, a namba su pedtagadan nu lu sa dunya.

Saben-sabenal su taw a magilek na lu silan sa surga endu manga buwal.

Pegkuwan nilan su ibagenggay nu Kadenan sa kanilan, kagina silan lu sa dunya na manga mapya silan.

Paydu bu kanu magabi i pedtulugan nilan.

Endu magan mapita na pag-istighfar silan.

Endu ipagawa nilan su haqq nu tamuk nilan, ibagenggay nilan kanu bangeni endu su dala. (miskinan).

Endu natagu sa lupa i manga tanda nu Allah kanu manga taw a di gapinda kanu atay nilan i gay a mawli.

Endu san kanu ginawa nu natanda bun, ugayd na di nu gailay.

Endu san sa langit i rizki nu, endu inibpasad sa lekanu.

Ibet kanu manga langit endu lupa na benal i rizki na di gapitas nu taw sa mana bun su kadtalu nin.

Ngintu nakawma sa leka su bityala kanu bisita nu Ibrahim a manga mapulu?

Kutika a kinaludep nilan na ya nilan pidtalu: kalilintad, ya pidtalu nu (Ibrahim): kalilintad bun sa manga taw a di ku katawan.

Linumu kani kaluma nin, nakapananggit sa sapu na sapi a pinagyaw.

Inibetad sa kanilan, pidtalu nin (Ibrahim): kan kanu.

Minggeda-geda si (Ibrahim) kagina di pegkan su manga bisita nin, pidtalu nilan: da ka kagilek ka aden mambata nu a wata egkataw.

Na nakasangul su kaluma nin sa nakatekik (nakalalis), nabetay nin i biyas nin endu nadtalu nin i matuwa aku den.

Ya pidtalu (nu malaikat): man den ba matuwa ka den ugayd na pidtalu nu Kadenan nengka, ka sekanin i mapandadayta a mataw.

Pidtalu nu (Ibrahim): ngin i kahanda nu a manga sinugu?

Ya nilan pidtalu: sinugu kami lu sa manga taw anan a manga darwaka.

Pabpagulanan nami silan sa watu a pinagyaw sa apuy.

Aden ngala nu uman i gasugat nin ebpun kanu kadenan nengka a manga taw a dupang.

Pinalyu nami kanu dalpa su langun a bamaginugut.

Da nasama kanu dalpa a salakaw kanu walay nu manga Muslim.

Endu inisama nami i tanda nu kinabinasa nu manga taw nin kanu manga taw a kagilekan kanu siksa a malipedes.

Endu su Musa su kinawma nin kani Fir’awn sa nakapananggit sa tanda a mapayag.

Da talima (su Fir’awn) kagina aden pedsaligan nin a bagel nin, endu pidtalu nin kanu Musa: sih’r atawaka buneg.

Bininasa nami su (Fir’awn) endu su manga tagapeda nin. Pinagaled nami (kanu lagat) ka di mataw dawayan.

Endu su Aad na inipasugat nami silan sa palnan a sambel a mabagel.

Da gasugat antu a sambel kanu langun na enggaga-isa a di kena nagunsyal.

Endu su Thamud, pidtalu sa kanilan: pamakut kanu sa taman a di kanu matay.

Sinangka nilan su Kadenan nilan, na sinayab na kilat silan sa natekaw sa gailay nilan bun.

Na da pakagaga sa kanilan tumindeg endu makadtabang.

Endu su taw nu Nuh a nawna, nasugat a kadalem ka manga faasiq silan.

Endu pimbalay nami su langit sa bagel, magaga nami mapagkawlad.

Endu binelat nami su lupa, na mapya gayd i kinandatal nin.

Endu binaluy nami i langun a enggaga-isa sa duwa ka biyas, ka endu malemu-lemu i kadsukur nu.

Isangul nu su palas nu kanu Allah ka saki na mapayag sa lekanu i kapagkagilek.

Endu da kanu bagumbal sa kadenan a kaped ka saki na mapayag sa lekanu i kapagkagilek.

Saka maytu bun su manga taw a nangawna a dala nakawma sa kanilan a sinugu a di kena ya nilan kadtalu na sih’r atawaka buneg.

Mana den inidtutuma na isa sa ped nin (bityala a maledsik) ugayd na silan a manga taw na darwaka.

Pasagadi ka silan (Muhammad) ka di ka bun matila u di silan baginugut.

Endu pangindaw ka, ka su indawan na makam-barapantag kanu manga bamaginugut.

Endu dala kinabaluy nu (Allah) sa jin endu manusya ya tabya na kasimba sa Allah.

Endu di aku pegkwa sa rizki sa kanilan, endu di kena aku nilan pakanen.

Saben-sabenal su Allah na sekanin i pe-rizki, kigkuwan sa bagel.

Endu aden kanu manga dupang i umun nilan a kanaraka, a mana bun umun nu manga tagapeda nilan, na dili den silan mamagayas (kanu siksa, ka mawma nilan bun).

Su bawgan sa naraka i kanu manga kafir, kanu gay nilan a pedtagadan nilan sa lu pan silan sa dunya.