The Noble Qur'an Encyclopedia

Saki (Allah) idsapa ku su palaw a Tur.

Endu su kitab a nakakulis.

Lu kanu sinulatan lun a upis.

Endu su Baitul Ma’mur.

Endu su langit a mapulu.

Endu su lagat a napenu.

Saben-sabenal su siksa nu Kadenan nengka na mawma.

Dala makatulak lun kanu siksa.

Kanu gay a edtalinggi su langit a magubal.

Endu makabayug menem su manga palaw.

Su bawgan sa naraka i kadtakenan nu papendalbut (sa gay a mawli).

Silan a manga taw na ya nilan bamikalan na su da katagan nin sa kinandalemet.

Su gay a tekawan silan sumumag kanu naraka sa tekaw a mapasang.

(Edtalun sa kanilan): nyaba su naraka a di nu bangimbenalen sa lu kanu pan sa dunya.

Ngin inyaba sih’r, atawaka di kanu pakailay?

Ludep kanu sa naraka, edsabar kanu atawaka di kanu edsabar na magidsan bun, ka ya nu bun balas na su galebekan nu sa dunya.

Saben-sabenal su magilek (sa Allah) na lu silan makabpawang sa mapya gayd a surga endu kagkalilini.

Kalinyan nilan su ininggay nu Kadenan nilan sa kanilan, endu dalindingan nu Allah kanu naraka jaheem.

(Endu edtalun sa kanilan): kan kanu endu inum kanu sa mapya, sabap kanu galebek nu a mapya sa dunya

Pedsandang silan kanu manga kantil a mindadalapisa i tilamin, endu pinagkaluma nami sa bidadari.

Endu su manga bamaginugut endu pinatalukun nami sa kanilan (pinatundug) su mawli a taw nilan sabap kanu iman, na pinagaws nami sa kanilan su mauli a taw nilan a dala inikulang nami kanu balas nu uman isa kanilan, langun na galebek nu uman isa na natuganul.

Endu inumanan nami pan silan sa unga na kayu endu sapu sa endaw i kalilinyan nilan.

Pendwalay silan sa basu a suti, endu da maledsik nin.

Endu pembalibiten silan nu manga wata a mama sa mana den silan muntya a pagkendap-kendap.

Endu edsasangula silan sa mamangidsaya.

Ya nilan kadtalu: malimu kami gayd sa kadakel nami.

Inikalimu kami nu Allah ka tinimu kami nin, linepas kami nin kanu siksa a mayaw.

Saben-sabenal a sekami (lu kami pan sa dunya) na pedsangulan nami su Allah ka sekanin (Allah) i mapya a malimu.

Pamangindaw ka (Muhammad) ka di kena ka pedtumpan endu di kena ka buneg kanu limu nu kadenan nengka sa leka a nawna.

Atawaka pedtalun nilan i pababayuk, angapan den i kapatay nin.

Edtalu ka sa kanilan i pagangapa kanu ka bangapan ku bun i kapakayd nu Allah sa lekanu.

Pedsugun silan nu itungan nilan a maledsik endu silan a manga taw a nakasagad i galebek nin kadtalu nin sa kumpasan.

Pidtalu nilan pan: pedtetebu (si Muhammad), kena ka manga taw a dala sabut nin.

Pambuwaten nilan i pagidsan (a Qur’an) amayka benal silan.

Ngintu binaluy silan sa dala nabpunan nin atawaka silan i minaluy?

Ngintu binaluy nilan su manga langit endu su lupa? Di kena ka dili gatagu sa ginawa nilan su gay a mawli.

Ngintu lu sa kanilan su nabetadan nu tyakap nu Allah atawaka (silan) ipegkyug-kyug.

Ngintu aden panikan nilan lu sa langit? Na pambuwatan nilan su pakikineg sa kanilan sa aden (madtapik nin) a tindeg a mapayag.

Atawaka ya bu kanu Kadenan na su wata a manga babay, lekanu i manga mama?

Atawaka pegkwa ka sa bayad na kalegan silan pembayad?

Atawaka lu sa kanilan su gayb na silan i banulat?

Atawaka kaliniyan (kyugan nilan) i katipuwan, na su namamegkafir na silan su gangatipu.

Atawaka aden pan kadenan nilan a salakaw sa Allah? Mahasuti su Allah kanu kapedsakutu nilan.

Endu amayka makailay silan ebpun sa langit a kawlug a malibuteng na ya nilan kadtalu: gabun a makapal.

Pasagadi ka Muhammad ka mawma nilan bun i gay nilan lu ba silan matay a sangat i kasakit nin.

Gay a da katagan nin sa kanilan su pandapat nilan a malat, endu dala den katabang sa kanilan.

Endu saben-sabenal na aden kanu manga dupang i siksa a salakaw pan kanu nalabit ugayd na ya madakel kanilan na di nilan katawan.

Endu edsabar ka kanu hukuman nu Allah atulan nu Allah sa ipenggagawli nin su siksa nin kanu manga kafir, da ka enggilek endu da ka mangandam ka saben-sabenal sa lekami na kailay nami seka endu pebparihalan nami seka, tasbih ka kanu Allah endu pugi ka kanu Allah sa uman ka tumindeg sa manga sambayang taman kanu ulyanan nu manga sambayang.

Endu ped kanu magabi na tasbih ka, endu su kasedep nu bitun.