The Noble Qur'an Encyclopedia

Masupeg su gay a mawli, endu nawpak su ulan-ulan.

Endu amayka nailay nilan i tanda na ayat na di nilan taliman, ya nilan kadtalu na sih’r a maawa bun inan.

Napandalbut silan, ya nilan inunutan su kyug na ginawa nilan, endu langun na galebek na makadtakena bun kanu kigkuwan lun.

Endu saben-sabenal a nakawma sa kanilan i manga tudtulan sa gay a mawli endu su manga taw a nawna a makalma sa ginawa.

Indawan a mabagel, na da bun makangguna su indawan.

Taligkudi ka silan (Muhammad) ka aden bun gay a tawagen silan nu bananawag, lu makabpawang kanu di nilan kyugan.

Lusak i kapangingilay nilan, lumyu silan sa kubur sa mana den tapudi a pakapayapat.

Makapamagayas silan lu kanu bananawag, ya madtalu nu manga kafir: nya den i gay a mapasang.

Ya nawna a napandalbut na su taw nu Nuh, (tig nu Allah): pinandalbut nilan su ulipen nami, ya nilan pidtalu na buneg endu pegkayan nu (su Nuh).

Mindu’a kanu Kadenan (si Nuh): tinalaw aku, na tabangi aku (ya Allah).

Binukan nami su manga bengawan nu langit sa ig a maleges.

Endu pinambuwat nami kanu lupa su manga buwal, namedsumbak su ig sa pulu endu kababan, sabap sa kahanda nu nangaden.

Endu pinapageda nami (su manga bamaginugut) kanu awang (nu Nuh) a kayu a mategas endu tutuk a matigkel.

Belalakaw sa dalem a parihala nami inibalas (kanu Nuh) a pigkafiran (na manga taw nin).

Endu saben-sabenal a initagak nami i tanda (sya sa lupa) ka endu maka-indaw.

Na labi den (a mapasang) su siksa lu sa naraka.

Endu saben-sabenal a pinakalemuwan nami su Qur’an sa kalangag nu, ka endu maka-indaw kanu manga taw.

Napandalbut su Aad, na su siksa ku pan (Allah) a makasugat na dala nilan itagu sa ginawa.

Saben-sabenal a ipinasugat nami silan (su manga kafir) sa sambel a sangat i kabagel nin, kanu gay a mapasang a bananalus.

Sa nakaidtug su manga ulu nu manga taw, nakailing silan sa manga tud na kayu-kulma a nangatebped.

Su siksa ku (Allah) a makasugat na dala nilan itagu sa ginawa.

Endu saben-sabenal a pinakalemuwan nami su Qur’an sa kalangan nu, ka endu maka-indaw kanu manga taw.

Pinandalbut bun ni Thamud su manga indawan.

Ya nilan kadtalu: sakataw bu a manusya bun i bagunutan tanu? Na saben-sabenal a sekitanu na natading tanu endu nabuneg tanu.

Panun anan ka nakawma sa lekanin i wahi sa nya bun sa lekitanu? Buneg sekanin endu malbut a pemamasla gayd.

Katawan nilan bu namag u entayn i malbut a pemamasla.

Saben-sabenal a sekami (Allah) na enggan nami silan sa unta a babay a fitna sa kanilan, endu ipedtikika silan endu edsabar ka(Salih).

Endu saben-sabenal a nakawma sa kanilan i manga tudtulan sa gay a mawli endu su manga taw a nawna a makalma sa ginawa.

Inipanawag nilan sa mawag a galebek nilan, inenggan sa perang sa sinumbali nilan (su unta a babay).

Su siksa ku (Allah) pan a makasugat, na da nilan itagu sa ginawa.

Na saben-sabenal a sinugu nami lu sa kanilan i sawalu bu a suwara (ni Jibril) na nakailing silan sa utan a nagangu (sabap sa kilat).

Endu saben-sabenal a pinakalemwan nami su Qur’an sa kalangag nu, ka endu maka-indaw kanu manga taw.

Pinandalbut bun nu taw nu Lut su manga indawan.

Na saben-sabenal a sinugu nami sa kanilan i sambel a bananggit sa watu, ya bu dala masugat na su masiken bu kanu Lut sa kanu tyuba a magan mapita.

Limu entu ebpun kanu Kadenan nengka, na mamba i kalepas nami kanu manga taw a bamaginugut a barasukur.

Endu saben-sabenal a pinakagilekan silan kanu tyuba sa kanilan, na mibpalawa silan, napandalbut silan kanu inipakagilek.

Endu saben-sabenal a pinamagayukan nilan su (bisita ni Lut) na pinunas nami su kailay nilan, na nanami nu su siksa nu (Allah) endu su inipanginggilek sa lekanu.

Endu saben-sabenal na pibpanayan nilan su siksa a dayun.

Nanami nu su siksa nu (Allah) endu su dala nu kapanuliman sa indawan.

Endu saben-sabenal a pinakalemuwan nami su Qur’an sa kalangag nu, ka endu maka-indaw kanu manga taw.

Endu saben-sabenal a nakawma bun kanu kadakel ni Fir’awn su indawan.

Pinandalbut nilan su langun nu ayatan, bininasa nami silan sa mana su kabpaminasa nu mapulu a pakagaga.

Ngintu su ka-kafir na ya mapya sa lekanu (a manga bamaginugut) atawaka nalepas kanu den sa naraka lu kanu manga kitab a nangawna?

Atawaka ya nilan edtalun (manga kafir): langun tanu na sekitanu bun i tumalaw.

Napandalbut silan, ya nilan inunutan na su kyug na ginawa nilan endu langun na galebek na makadtakena bun kanu kigkuwan lun.

Benal den su gay a mawli i pasad sa kanilan, endu su gay a mawli na labi pan a tyuba endu mapayt.

Saben-sabenal su manga dupang na natading silan, endu kanilan su naraka a pegkalaw-kalaw.

Su gay a bamatuwin silan lu sa naraka (ya pedtalun sa kanilan): nanami nu pan su kayaw na apuy.

Saben-sabenal a binaluy nami su langun na enggaga-isa sa aden ukul nin.

Endu da kanu kahanda nami a di kena mana sapelek mata (i kangagan nin).

Endu saben-sabenal a bininasa nami su manga pagidsan nilan sa ka-kafir a nangawna, na ngintu ka di kanu den ma-indaw?

Endu langun u manga galebek nu manga ulipen na lu tanan sa pedtutulu.

Endu langun na manot endu masla na nakasulat bun tanan.

Saben-sabenal su magilek sa Allah na lu silan sa surga endu manga ig.

Lu sa bagayanan a mapya, sa hadapan nu Allah a pakagaga.