The Noble Qur'an Encyclopedia

Nuun (su Allah i mataw kanu ma’na nin), saki (Allah) idsapa ku su pinsil (a sinemulat lu sa Lawh Al- Mahfudh sa langun a natagu sa dunya) endu su manga malaikat a pedsulat (sa mapya endu mawag).

Di kena ka buneg (Muhammad) kanu limu nu Kadenan nengka a initulun sa leka (mana su Qur’an)

Endu saben-sabenal na aden balas nengka a di gapinda.

Endu saben-sabenal a seka (Muhammad) i masla i palangay nengka a mapya.

Endu katawan nengka bun, endu katawan nilan bun.

Upama entayn e buneg, seka atawaka silan.

Saben-sabenal su Kadenan nengka i labi a mataw kanu entayn i natading kanu agama nin, endu ya pan labi a mataw kanu pakatuntul.

Di ka baginuguti su pendalbut.

Mapalnganay nilan i maka-ayun ka sa kanilan ka mayun bun silan (sya kanu kasimba).

Di ka paginuguti su matagel edsapa a malbut.

(Silan a manga taw) na masudi a mapandalkita (sa manga mawag).

Isapal nilan su mapya, matibaba-baradusa.

Ebpapulu sa ulyan na entuba na kapayapat i kadupang nin.

Kagina madakel i tamuk nin endu wata nin a manga mama.

Amayka batyan sa lekanin su manga ayat nu (Allah) na ya nin kadtalu: kalbutan sa lu kinuwa kanu manga inikulis paganay.

(Tig nu Allah): tandan nami su biyas nin sa tanda na taw sa naraka.

Saben-sabenal a binatalu nami su manga taw sa mana bun su kinabatalu nami kanu manga taw a aden pamulan nin sa midsapa silan amayka mapita na banayan nilan gemupu.

Endu da den silan makadtungkat (da makadtalu sa Insha Allah).

Nabalibet na apuy (su pamulan nilan) ebpun sa Allah sa pedtulug pamun silan.

Nabaluy su pamulan sa migkaytem-malibuteng.

Endu midtatawaga silan guna su mapita (sa lemu tanu den)

Ebpanay kanu lu sa pamulan amayka penggupu kanu.

Gimanat silan, endu namagumpung silan.

Sa dala makaludep saguna a gay apya sakataw a miskinan.

Mibpanay silan, ka magaga nilan sumapal i mamung sa kanilan (a miskinan).

Guna nilan mailay i maytem na ya nilan nadtalu: saben-sabenal a natading tanu.

Di kena besen ka natutung (dala den makwa) sabap kanu kapedsingit tanu.

Ya pidtalu nu mapya nilan na u namba ka pedtasbih kanu sa Allah (sa kadtawbat).

Ya nilan nadtalu: mahasuti ka a Kadenan nami, nakandupang kami (sabap sa kapedsingit sa miskinan).

Midsasangulay silan, sa uman isa na pedtimpuwan nin su kaped nin.

Ya nilan nadtalu: duwan-duwan tanu den, nabinasa tanu sabap sa kanu kadarwakan tanu.

Kalu-kalu kanu Kadenan tanu i sambyan nin sa ya labi i kapya nin, ka lu tanu sumangul kanu Kadenan tanu sa kadtawbat.

Mamba a nanggula na siksa sa dunya, na muna pan i siksa lu sa akhirat umana bu ka katawan nilan.

Saben-sabenal su magilek sa Allah na aden sa kanilan i manga pamulan a limu lu kanu Kadenan nilan.

Di nami papagidsanen su Muslim kanu manga darwaka.

Nginan ka manan i lekanu a atulan? Panun i kakukum nu.

Ngintu aden kitab nu a pembatyan nu sa namba a hukuman nu?

A namba a kitab na nakadalem su bamilyan nu?

Atawaka ngintu aden pasad tanu a mabagel taman sa gay a mawli san den ba i lekanu a kapangukum? (makapagidsan su di magidsan).

Idsa nengka (Muhammad) sa kanilan u entayn i kaunutan sa kanilan.

Atawaka ngintu aden nakapagumpung nilan? Na pambuwaten nilan i manga tagapeda nilan amayka benal silan.

Kanu gay a kapayag kanu sigay, na tawagen silan ka pasugyuden silan na dili silan makagaga.

Linansi su kailay nilan, na ya pembuwat sa kanilan na su kalusak, saben-sabenal na silan na amayka enggaten sa kasugyud sa sya pan sa dunya na di silan sumugyud, inunta na mapya i lawas nilan.

Pasagadi aku (Allah) endu su papendalbut sa Qur’an, ka papedtana-tanan nami bu silan sa di nilan katawan (makawma i siksa nilan).

Endu belanatan ku silan, ka su siksa ku na di gangganan nu badan nilan.

Atawaka papembayad ka (Muhammad) sa kanilan a sabapan a gapasangan silan?

Atawaka ngintu sa kanilan su Lawh Al-Mahfudh a lu ba silan bagiling?

Tigkel ka (Muhammad) kanu hukuman nu Allah endu da ka miling kanu Yunus sa kinatawag nin sa Kadenan nin sa napenu na lidu na ginawa.

Di kena bu sinabet nu (nauma na) limu nu Kadenan nengka na makalyu bun kanu tiyan nu seda sa mawag i buntal nin, ugayd na sabap sa kanu limu sa lekanin na da manggula intu.

Pinamili nu Kadenan in, na nakuyug kanu manga saliheen.

Endu saben-sabenal na embulasegan kanu na manga kafir guna nilan makineg su Qur’an, ya nilan edtalun: gabuneg (si Muhammad) sa nakatulun anan sa lekanin.

Endu di kena gabuneg ka indawan kanu langun nu taw na dunya.