The Noble Qur'an Encyclopedia

Alif-Laam-Meem-Saad (su Allah i mataw kanu ma'na nin).

Nan su kitab (Qur’an) initulun sa leka (Muhammad) na di ma-aden sa laleb nengka i kagagetan, ka endu nengka makapakagilek kanu manga taw (a kafir) endu makapatadem nengka kanu manga bamamaginugut.

Unuti nu su initulun sa lekanu (Qur’an) ebpun sa Kadenan nu, na da kanu munut sa salakaw lun i kamalan nu, ka paydu i katadem nu ataw ka maka- indaw sa lekanu.

Endu madakel i dalpa a bininasa nami (sabap kanu kadusan nu taw nin) nakawma sa kanilan su tyuba nami sa magabi ataw ka malamag.

Na dala den nadtalu nilan sa kanu kinawma na tyuba nami sa kanilan ya tabya a nadtalu nilan na sekitanu besen i manga dupang a manga taw.

Na idsan nami su manga taw u ngin i pidtalu nilan kanu sinugu, endu idsan nami bun su manga sinugu u ngin i pidtalu nu manga taw.

Na panudtulen nami sa kanilan (su pinggalebek nilan sa dunya a nawna) endu dala sa lekami i di nami silan embantayan.

Endu su timbangan (lu sa gay a mawli) na bantang i kakukum, na su mawgat i timbangan nu mapya nin na silan a manga taw a namakauntung.

Su mapegkag menem i timbangan nin a mapya na silan su manga taw a linapis nilan su ginawa nilan sabap kanu kapedsangka nilan sa manga ayatan nami.

Endu saben-sabenal a pinandalpa nami sekanu sya sa lupa, endu binaluy nami sa lekanu i makapaguyag nu, na paydu i kadsukur nu.

Endu saben-sabenal i binaluy nami sekanu endu pinabpalas nami sekanu, mawli na pidtalu nami kanu manga malaikat i sugyudi nu si Adam na sinumugyud silan ya tabya na si Iblis ka dala amung sumugyud.

Tig nu Allah: ngin i nakasapal sa leka sumugyud sa sinugu Ku seka? Tig nu Iblis: saki i mapya sa lekanin (Adam) ka binaluy ako nengka ebpun sa apuy na binaluy nengka (si Adam) ebpun sa lupa.

Tig nu Allah: embaba ka, dala kadayt nin i kamamasela nengka sya sa surga, lyu ka den sa surga ka seka na kuyug ka sa nakalusak.

Tig nu Iblis: Kadenan ku pag-kalendu ka i umur ku.

Tig nu Allah: seka na malendu i umur nengka.

Tig nu Iblis: Kadenan ku kagina ka tinading aku nengka na palnen ku silan kanu lalan nengka a matidtu (su agama nu Islam).

(Tig nu Iblis): mawli na alawan ku silan sa sangulan endu taligkudan nilan endu tampal sa kawanan nilan endu biwang nilan, endu dala maparuli nengka kanu kadakelan sa kanilan a makadsukur (kanu Allah).

Tig nu Allah: lyu ka den ka seka i pangimbulatan a nalipungetan, taman kanu munut sa leka a manusya, na panun ku su Naraka sa lekanu langun.

Endu Hay seka Adam! Tana ka endu si kaluma nengka sya sa surga sa pangankan kanu sa endaw i pegkyugan nu, na di nu semupegi i nyaba a kayu ka mabaluy kanu ebpun kanu manga dupang.

Sinasat silan nu Shaytan, ka endu gapayag kanilan su nadapengan a awrat nilan (sangulan nilan duwa), tig nu Shaytan: ya kinasapal nu Allah sa lekanu sa nya ba a kayu na mabaluy kanu duwa a datu sya sa surga, ataw ka matatap (di kanu den makalyu) sya sa surga.

Endu midsapa su Shaytan (kani Adam): Saben-sabenal a saki na kuyug aku sa kanu magungaya sa lekanu.

Tinutulu nin sa makadulat, guna nilan (Adam-Hawa) kananami su unga nu kayu na napayag sa uman isa sa kanilan su sangulan na kaped nin, uman isa na nakakwa sa lawn a kayu a nakadapeng kanu awrat nilan ataw ka sangulan nilan, endu tinawag nu Kadenan nilan (pidtalu nu Allah): kna ba inisapal ku sa lekanu intu ba a kayu, endu kena ba pidtalu ku sa lekanu su Shaytan na satru nu a mapayag.

Ya pidtalu ni Adam silan kani Hawa: Kadenan nami nadupang nami i ginawa nami, amayka di kami nengka ampunen endu ikalimu na makuyug kami kanu manga taw a nangalugi.

Tig nu Allah: embaba kanu lu sa dunya sa pagukagen nu kaped su kaped nin endu aden kadtakenan nu gagalu lu sa lupa endu aden kawyagan nu sa taman a timpu nin (di pan matay).

Tig nu Allah: lu kanu ba paguyag, endu lu kanu bun ba matay, endu lu kanu bun ba makambwat (sa lupa) sa kabangkit sa dunya.

Hay! sekanu a tupu nu Adam! Saben-sabenal a initulun nami sa lekanu i balegkas a makasapeng sa awrat nu endu balegkas a mapya i palas nin endu su balegkas a gilek sa Allah na minuna i kapya nin sa langun a nalabit antu, namba na kaped kanu manga tanda nu Allah, ka malemu-lemu sa kanilan i makatadem (ma-indaw silan).

Hay sekanu a tupu nu Adam! Di kanu ma-fitnah nu Shaytan sa mana su kinapalyu nin kanu duwa a lukes nu sa surga (Adam-Hawa) sa ibpagawa nin sa kanilan i balegkas nilan ka endu gailay nu isa i awrat na kaped nin, na kailay kanu nin (Shaytan) endu su manga tagapeda nin, na di nu silan kilay, binaluy nami su manga Shaytan a silan i tagapeda nu (manga taw) di bangimbenal sa Allah.

Endu amayka makanggalebek silan sa maledsik, na ya nilan kadtalu: naparuli nami kanu manga kalukesan nami endu sinugu kami nu Allah sa nya ba, edtalu ka (Muhammad): su Allah na di semugu sa maledsik endu di nin isugu i madtalu nu (sa makadawa kanu) sa Allah i di nu katawan.

Edtalu ka (Muhammad): inisugu nu Allah i kambantang endu patidtu nu i manga biyas nu sya kanu masjid (apya ngin i nagalebek, endu apya endaw matabu) endu pangeni kanu sa lekanin (Allah) su ikhlas sa lekanin su agama, ka binaluy kanu nin (paganay) na makambalingan kanu bun sa lekanin. (Allah).

Su kaped na natutulu, su kaped na wagib sa kanilan i katading kagina silan na binaluy nilan i manga Shaytan a sinimba nilan a salakaw sa Allah endu ya nilan pagantapen na natutulu silan.

Hay sekanu a tupu nu Adam! Kwa nu i ipebpalas nu sya sa kanu mga masjid endu kan kanu endu inum kanu endu di nu mapasagad- mapadsubra (su galebek nu) ka di kalilinyan nu Allah pamakasagad (a galebekan).

Edtalu ka (Muhammad): entayn i sinumapal sa kapalasan a pinambwat nu Allah kanu manga ulipen nin endu su manga mapya rizki, edtalu ka (Muhammad) kanu manga bamamaginugut i sa kanilan (mu'min-kafir) sya sa dunya su manga palas, na kanu manga mu'min bu menem sa gay a mawli (i kapya na palas), mamba i kapedtinantad nami kanu manga ayatan kanu manga taw ka endu nilan katawan.

Edtalu ka (Muhammad) i ya inisapal nu Allah na su manga maledsik a mapayag endu masulen endu su manga kadusan endu su makasagad (galebekan a pedsubra sa atulan) sa dala kawagib nin, endu su kasakutu sa Allah ka dala initulun nin a tindeg nu (kanu kapedsakutu) endu makadtalu kanu sa Allah sa di nu katawan (makapandalbut su Allah).

Endu uman isa na aden ajal nin (aden ukulin) na amayka nakawma su ajal nilan na di makasundul su waktu nin (oras nin) na di bun makasunud.

Hay sekanu a manga tupu nu Adam! Makawma bun sa lekanu i manga sinugu ebpun sa lekanu (manusya a tupu nu bun) a mamanudtulan sa lekanu kanu manga ayat ku, na su magilek sa Allah endu nagumbaya, na dala gilek nilan (kanu kapatay) endu di malidu i ginawa nilan (kanu pengganatan nilan).

Endu su manga taw a napandalbut kanu manga ayatan nami endu emamasla kanu ayatan nami, na silan i kigkwan sa apuy, silan na dala den kalyu nilan sa naraka.

Da linumawan sa kadupang (na taw) a pidtebwan nin su Allah sa kalbut, ataw ka pinandalbut nin su manga ayatan nin, silan na masugat nu umun nilan ebpun sa kitab (umun a mapya, endu malendu a umul) taman sa amayka makawma sa kanilan su manga sugu nami (malaikat a pembugkut kanu nyawa) na imatayan nilan den, na edtalun nilan (malaikat): endaw den su pedsimban nu a salakaw sa Allah? Ya nilan madtalu: natadin sa lekami (di nami katawan endaw nakabpawang), endu midsaksi silan kanu ginawa nilan sa silan i manga taw a manga kafir.

Tig nu Allah: ludep kanu, kanu manga taw a nawna pan sa lekanu a jin endu manusya sa naraka, uman makaludep su isa na mulkan menem nu kaped nin taman sa amayka makanggaga-isa den silan tanan (lu sa naraka) na edtalun u egkawli kanu nawna: Kadenan nami silan banan (a nawna sa naraka) i tinumading sa lekami, na inggay ka sa takep a apuy, tig nu Allah: uman isa na aden takep nin (matakep) ugayd na di nu katawan.

Ya manem edtalun nu nangawna kanu nangawli: dala sa lekanu i sya sa lekami i katinggyan nu (di kena sabap sa lekami kinatading nu) na nanami nu su siksa sabap kanu pamantyalin nu (penggalebeken nu) a manga kadusan.

Su manga taw a napandalbut kanu manga ayatan nami endu mimamasla silan na di magukat sa kanilan (di kabukatan) i manga bengawan nu langit endu di makaludep silan sa surga taman sa di makaludep su unta kanu pesu na lagum, na mamba i kabalas nami kanu manga pedsakutu.

Aden sa kanilan lu sa naraka i ikam a apuy endu apuy kanu pulu nilan a pegkalaw-kalaw, endu mamba i kapembalas nami kanu manga dhalimun (pedsakutu, salimbuten).

Endu su manga bamamaginugut endu minggalebek sa manga mapya, di nami ibpalyugat kanu isa i di nin magaga, silan i kigkwan sa surga a di den silan makalyu (lu sa surga).

Endu inawa nami kanu manga laleb nilan su kandidilipungeta (su lipunget a nagedam sa sya pan sa dunya) sa pelagilay sa kababan nilan i manga pulangi endu madtalu nilan i pugin tanu su Allah a tinutulu tanu nin sa nya ba endu di tanu makatuntul u di kenabu tinutulu tanu nin, saben-sabenal su kinawma nu sinugu nu Kadenan na bantang endu tinawag silan lu sa surga sa nan den ba su surga a pinawarisan nu Allah sa lekanu sabap kanu penggalebeken nu a mapya.

Endu tinawag nu taw sa surga su taw sa naraka: naparuli nami den su inibpasad nu Kadenan nami sa lekami a benal, na ngintu naparuli nu mambu su inib-pasad nu Kadenan nu a benal? Tig nilan: uway, aden mapatuntay kanu pageltan nilan sa su mulka nu Allah na nanget den kanu manga taw a dhalimeen. (pedsakutu, salimbuten).

Silan na ipedsapal nilan su agama nu Allah endu pangilayan nilan sa kabigkugan nin ataw ka katilan nin endu silan na pedsupaken nilan su gay a mawli. (di balityaya sa gay a mawli).

Endu nakabpageletan sa kanilan (nakadapeng) endu a'raf (lending a mapulu i nambetadan nin) a aden manga mama kanu pageletan nu naraka endu surga, (silan a manga mama) na katawan nilan i tanda na nakasurga endu nakanaraka endu tawagen nilan i manga taw sa surga, sa sagyahatra kanu den (lepas kanu den) sa silan antu a dala makaludep sa surga sa pegkyug a benal silan beludep.

Amayka pasangulen silan (ipailay sa kanilan) sya tampal kanu taw na naraka na ya nilan madtalu: Kadenan nami di kami kumuyug kanu manga dhalimeen (pedsakutu, salimbuten).

Endu tawagen nu taw sa pageltan (lu sa a'raf) i manga mama a manga kafir (a katawan nu bananawag) i manga tanda nilan (sa taw na naraka) sa tig nu bananawag: dala makangguna sa lekanu su kadakel nu (tamuk a linimud nilan sa sya sa dunya) endu su inimamasla nu.

(Su Allah na edtalwan nin su manga kafir): kanu sa di silan ikalimu nu Allah? Sa di kena namba su manga mu'min a midsapa, ludep kanu (a manga bamamaginugut) sa surga sa da gilek nu, endu di malidu i ginawa nu.

Endu tawagen nu taw sa naraka su taw sa surga: natutung kami den, pesiki kami nu pan sa ig ataw ka ngin a inirizki nu Allah sa lekanu, ya nilan madtalu (taw na surga): ini-haram nu Allah (su ig ataw ka pegken sa surga) kanu manga kafir.

Silan su manga taw a binaluy nilan su agama a ipedsimpang endu dalmetan endu nadulatan silan nu kabpaguyag sa dunya, na saguna na tagaken Nami silan ka tinagak nilan bun i nya ba a gay (lupan silan sa dunya) endu su kapapegkayd nilan kanu manga ayatan nami a padsupaken nilan.

Endu saben-sabenal a pinawman nami silan sa kitab (Qur’an) a pidtinatad nami sa kataw a tutulu endu limu kanu manga taw a bangimbenal.

Dala kapagangapan nilan ya tabya na su kadedsa nilan (kasiksa sa kanilan), su gay a kawma nu kadedsa nilan (kasiksa) na madtalu nilan: nalipatanan muna (linipatanan tanu i nya ba a gay) sa benal su kinawma nu sinugu nu Kadenan tanu, na ngin i nya aden pan makadtabang? Ka tabangan tanu nin, ataw ka makambalingan tanu (lu sa dunya) ka enggalebek tanu sa salakaw kanu pinggalebek tanu (a mawag), na saben-sabenal a nalugi nilan i ginawa nilan endu natading sa kanilan (su manga barahala nilan) a ipedtetebu nilan (kanu Allah).

Su Kadenan na su Allah, a sekanin ba i minaluy kanu manga langit endu lupa sa naka-nem gay,mawli na migkahanda lu kanu a’raf nin, ipendapeng nin su magabi kanu malamag a pedtuntuten u magabi su malamag sa malangkas (endu binaluy nu Allahh) su senang endu su manga bitun sa endaw i kyug nin sabap kanu sugwan nin, ka lekanin a Allah su langun a binaluy endu su kyug, mahasuti su Allah a kadenan u langun a inaden nin.

Pangeni kanu sa Kadenan nu sa embaba kanu endu pageletan a masulen-mapayag, su Allah na di nin kalilinyan i sagad i katanug nin.

Endu da kanu maminasa sya sa lupa sa ulyan a kinapagkapya lun endu pangeni kanu sa Allah sa dalem a gilek endu kadsukur, sa limu nu Allah na masupeg kanu manga taw a pebpiya-piya.

Endu sekanin a Allah i pedsugu kanu manga sambel a malilini su taw, a lat nu sambel su ulan (pakaygis su ulan sabap kanu sambel) taman sa amayka migkawgat den su dadtem na ibubu nami (pa-ulanen nami) kanu dalpa a minatay (lupa a minatay) patulunan nami sa ulan na pinagemaw nami sabap kanu ulan embalingan a manga unga, maytu bun ba i kapagemaw nami kanu namamatay ka malemu-lemu sa lekanu i makatadem kanu sa kapatay.

Su dalpa a mapya na gumemaw su manga bagetu lun sa kahanda nu kadenan nin, su mawag menem na di gumemaw su bagetu lun ya tabya na mawag bun, mamba i kapebpayag nami sa manga ayatan kanu manga taw ka endu silan makadsukur.

Saben-sabenal a sinugu nami su Nuh lu kanu kawm nin endu ya nin pidtalu na simba nu su Allah ka dala sa lekanu i kadenan a salakaw sa lekanin, ka saki na kagilekan aku sa lekanu sa siksa kanu gay a masla (kabangkit sa dunya).

Pidtalu nu gawnutan kanu kawm nin: sekami na ya nami kailay sa leka (Nuh) na tading ka sa mapayag.

Tig nu Nuh kanu manga taw nin: di kena aku buneg, ugayd na saki na sinugu aku ebpun kanu Kadenan nu dunya.

Ipedsampay ku sa lekanu su sugwan nu Kadenan ku endu bangindaw aku sa lekanu endu aden katawan ku ebpun sa Allah a di nu katawan.

Ngintu nagayp kanu sa nakawma sa lekanu i indawan ebpun sa Kadenan nu sa sya kanu mama a bangsa nu bun? Ka endu kanu nin kapakagilekan ka endu kanu kagilekan, ka malemu-lemu ikakalimu sa lekanu.

Na pinandalbut nilan na linepas nami sekanin (Nuh) endu su manga kaped nin sya kanu bagedan endu binisana nami su napandalbut kanu manga ayatan nami ka silan a manga taw na pisek i manga atay nilan.

Endu sinugu nami lu kani Aad i suled nilan a si Hud, ya nin pidtalu: manga taw ku simba nu su Allah ka dala sa lekanu i kadenan a salakaw sa Allah, na ngintu ka di kanu kagilekan?

Pidtalu nu egkawnutan nu manga kafir kanu Hud: sekami na ya nami kailay sa leka na untengaw ka endu bagantapen nami i seka na pendalbut ka.

Tig nu Hud: manga taw ku di kena aku untengaw ugayd na sugu aku ebpun sa kadenan nu dunya.

Ipedsampay ku i sugwan nu Kadenan ku sa laki endu saki na bangindaw aku a mapayag sa lekanu.

Ngintu ka nagayp kanu sa nakawma sa lekanu i indawan ebpun sa Kadenan nu sya kanu mama a bangsa nu bun, ka endu kanu nin kapakagilekan endu tademi nu i binaluy kanu nu Allah a namakasukeli sya sa lupa sa ulyan a taw nu Nuh endu inumanan kanu nin sa kasla endu kalambeg, na tademi nu su limu nu Allah sa lekanu, ka malemu-lemu sa lekanu i makauntung kanu.

Tig nilan: kinawma nengka na endu kami makasimba sa Allah ka endu nami matagak su pedsimban nu manga lukes nami? Na pambwat ka i ibanginggilek nengka sa lekami amayka nakuyug ka kanu manga benal i kadtalu nin.

Pidtalu ni (Hud): nakabetad bun sa lekanu ebpun sa kadenan nu i siksa endu lipunget, enduken ka ib- palawa aku nu pan sa manga ngala bu (a pedsimban nu) inipamedtu nu sekanu endu su manga kalukesan nu sa dala initulun u Allah a tindeg nilan, na angapa kanu den ka saki na salta aku bun sa lekanu a bagangapa.

Linepas nami sekanin (Hud) endu su manga bamamaginugut sabap kanu limu ebpun sa (Allah) endu ginetas nami su alyugan (atulan) nu napandalbut kanu manga ayatan nami, na dala bun silan pangimbenal.

Endu sinugu nami lu kani Thamud si Salih, ya nin pidtalu (Salih): manga taw ku, simba nu su Allah ka dala kadenan a salakaw sa lekanin, nawma kanu na mapayag a tanda ebpun sa kadenan nu (unta a babay, mimbwat sa pageletan nu) nya su unta nu Allah a lekanu a tanda, na pasagadi nu (padtaday nu den) a keman den mun sya sa kanu lupa nu Allah endu di nu sumigkul sa mawag (mapakasakiti) ka masugat kanu na siksa a masakit.

Endu tademi nu i binaluy kanu nu Allah a namakasukeli sa ulyan nu Aad endu pinandaya kanu nin sya sa lupa a bangumbal kanu sa manga maligay ebpun kanu masibukala lupa (mapedtad-pedtad) endu bameswan nu i manga palaw a pegkalbenan nu, na tademi nu su manga limu nu Allah endu da kanu penggula sya sa dalpa ataw ka lupa sa baminasa kanu bu.

Pidtalu nu kangaunutan sa pemamasla kanu manga taw nin kanu manga malubay: nangimbenal kanu sa ngintu si Salih na sinugu ebpun sa kadenan nin? (namba a kadtalu na umpak bu kanu Salih) ya nilan (bamaginugut) pidtalu: sekami na su inisugu lun na pinangimbenal nami.

Ya manem pidtalu nu pemamasla: na sekami manem na namba a pinangimbanal nu anan na pegkafiran nami (supaken nami).

Na sinumbali nilan su unta endu pibpapuluwan nilan i sugwan nu Kadenan nilan endu pidtalu nilan i pambwat ka Salih i nambay mapaguway-uway nengka sa lekami u benal a nabi ka.

Na nasugat silan a linug a mapasang, na nabaluy silan kanu dalpa nilan sa namamatay, su bagagayan ataw ka pedtindeg na dala mapalin.

Na tinumangka (si Salih) sa kanilan, endu pidtalu nin: sekanu a manga taw ku na saben-sabenal na nakasampay ku sa lekanu i sinugwan nu Kadenan ku sa laki endu pinangindaw ku sekanu ugayd na di nu kalilinyan i manga taw a mangindaw.

Endu su Lut, pidtalu nin kanu manga taw nin: nginan ka penggula kanu sa maledsik (pegkaluma su mama sa mama/babay sa babay) dala isa bu a nawna sa lekanu a minggula sa mamba kanu taw nu dunya.

Sekanu na pegkaluma nu i manga mama sa kyug sa salakaw kanu babay, kena ka sekanu den i manga taw a nakasagad i palangay nin sa kumpasan (atulan).

Endu dala nakasumpat nu manga taw nin ya tabya: pa-awan nu silan sya sa dalpa nu a nya, ka silan a manga taw na suti gayd (di malilini sa kadusan).

Na linepas nami si Lut endu su kadakel nin ya tabya na su kaluma nin ka nakamung masugat a tyuba.

Endu pina-ulanan nami silan sa ulan a watu a apuy, na ilay ka (Muhammad) u panun ba i mawli a manggula nu manga taw a darwaka manga mujrimeen (manga dupang, pedsakutu, baradusa).

Endu sinugu nami su suled nilan a si Shu'aib lu sa manga taw sa Madyan, ya nin pidtalu: sekanu a manga taw ku, simba nu su Allah ka dala sa lekanu i kadenan a salakaw sa lekanin, saben-sabenal a nakawma sa lekanu i mapayag ebpun sa Kadenan nu, na talutup nu i kapagasad nu endu kadtimbang nu, di nu pelugi su manga taw kanu langun taman nilan endu da kanu maminasa kanu dalpa sa ulyan na kinapagkapya lun, ka entuba i makagkapya sa lekanu amayka mangimbenal kanu.

Endu da kanu bagagayan kanu lalan sa papegkagileka nu i bagangay kanu Shu'aib, endu pedsapalan nu sa agama su nangimbenal kanu Allah endu ya nu kyug na matila su agama, endu tademi nu su kutika a paydu kanu na pinagkadakel kanu nu Allah, endu ilay nu i mawli a manggula nu manga taw a baminasa.

Endu kaped sa lekanu i nangimbenal kanu inisugu salaki endu su kaped menem sa lekanu na dala pangimbenal, na edsabar kanu (tigkel kanu) a nangimbenal taman sa kumukum bun su Allah kanu pageltan tanu sa kanilan endu su Allah i labi a mapya kanu bamangukum.

Pidtalu nu kangaunutan u mimamasla sa kanu kawm nu Shua'ib: pawan nami seka O Shua'ib endu su manga bamaginugut (nangimbenal) sa leka sya sa dalpa nami, ataw ka embalingan kanu den mun sya sa agama nami, tig nu Shua'ib: apya di kami myug?

Saben-sabenal a kadtebwan nami su Allah sa kalbut amayka sya kami sa agama nu, sa ulyan a linepas kami nin sa agama nu, endu dala kadayt nin i kambalinganan nami ya tabya na kahanda nu Allah a Kadenan nami a mawlad i kataw nu Kadenan nami kanu enggaga-isa, sekanin a Allah i sinaligan nami, Kadenan nami bukati ka sa lekami pageletan nami kanu manga taw sa bantang endu seka i labi i kapya nin kanu banguka.

Endu pidtalu nu kangaunutan sa kanu manga kawm ni Shu'aib: amayka unutan nu si Shu'aib na sekanu den i manga taw a nangalapis.

Nasugat silan a linug, nabaluy silan kanu dalpa nilan a matag lawas na dala nyawa nin.

Su napandalbut kanu Shu'aib na mana bun silan dala makandalpa kanu dalpa (nadtadin silan sabap kanu linug), su napandalbut kanu Shu'aib na nabaluy silan sa silan i nalugi.

Tinumangka si Shu'aib (minawa) endu (linumengi) sa pidtalu nin kanu manga kawm nin i nakasampay ku sa lekanu su agama nu Kadenan ku endu nangindaw aku den sa lekanu, na panun i kalidu na ginawa ku (sa kinabinasa) kanu manga taw a manga kafir.

Endu dala sinugu nami a nabi sya kanu dalpa sa pinandalbut a di kena bininasa nami silan (a napandalbut) sa kapasang a kabpaguyag endu dalu ka endu silan makambaba (makapangalimbaban) sa Allah.

Mawli na sinambyan nami su mawag sa mapya, taman sa pinagkadakel silan (su kakawasan nilan) endu pidtalu nilan: su manga lukes tanu na nasugat bun silan na mapasang endu malmu (adat a manusya i nya, di kena i niya ebpun kanu Kadenan), bininasa nami silan sa natekaw endu di nilan gadsangginu.

Upama mana bu ka nangimbenal su taw nu dalpa endu nagilekan (sa Allah) na bukatan nami kanilan i manga barakat (mamakagkapiya) ebpun sa langit endu lupa, ugayd na napandalbut silan, na bininasa nami silan sabap kanu penggalebeken nilan a manga kadusan.

Ya kataw nu taw nu dalpa a dupang na di mawma na tyuba nami silan sa magabi sa timpu na pedtulug silan.

Endu ya nilan kataw na di silan mawma na tyuba nami sa mapita kanu timpu a pendadalmet silan.

Ngintu linepas nilan i ginawa nilan kanu i kapakayd nu Allah (a kasiksa ataw ka tyuba sa kanilan) na dala man taw a malepas nin i ginawa nin (amayka bagi nin den) ya tabya na (manga taw a pendupang den sa layab, ka ya nilan talima na dala den siksa sa kanilan) manga taw a nangalugi.

Ngintu ka di pan makatutulu kanu manga taw (su nanggula nu nangawna) na silan saguna i naka-waris kanu dalpa sa ulyan nu taw nin (a nangawna) na u pigkahanda nami bu na masugat nin bun silan (a tyuba) sabap kanu manga kadusan nilan, na silan a manga taw na di manuliman.

Entuba a manga dalpa i banudtulan nami sa leka (Muhammad) i tudtulan nu sa nakawma sa kanilan i manga sinugu sa manga mapayag i napananggit nilan, na dala bun silan pangimbenal sabap sa nawna den i kinapandalbut nilan, mamba i kapedtutup (kapedsapeng) nu Allah kanu manga atay nu manga kafir.

Endu da naparuli nami sa kadakelan sa kanilan i pasad a pedtuldun, endu ya kadakelan sa kanilan i manga faasiq (nakalyu kanu sugwan i galebek).

Mawli na pinambwat nami su Musa kanu ulyan nilan (a manga sinugu) lu kani Fir’awn endu su kangasaligan nin, na sinangka nilan su Musa na ilay ka (Muhammad) u panun i mawli (a manggula) nu manga taw a baminasa.

Endu tig nu Musa: Hay Fir’awn! Saki na sinugu aku nu Kadenan u dunya.

Benal a dala madtalu ku sa Allah ya tabya na benal, nakawma aku sa lekanu sa mapayag ebpun kanu Kadenan, na butawani ka (pandaya ka) su tupu nu Israel lu sa dalpa nilan.

Tig nu Fir’awn kani Musa: amayka aden tanda na pambwat ka amayka kuyug ka sa kanu manga taw a benal.

(Su Musa) na pinitasan nin su tungkat nin, kena ka nipay a mapayag.

Endu pinalyu nin su lima nin, kena ka maputi a mapya i palas nin (pegkendap).

Ya pidtalu nu egkangaunutan kanu taw nu Fir’awn na: saben-sabenal inan na mataw gayd sa sih’r (manga pakayd).

Ya nin kyug na makalyu kanu sa kanu dalpa nu, (su Fir’awn na minidsa): na ngin i enggulan nu?

Pidtalu nu kangasaligan (ni Fir’awn): lumbatan su manga dalpa tanu endu su suled nin, ka pasuguy ka (Fir’awn) su manga dalpa.

Ka endu kapananggitan ka nilan sa manga matagel sa sih’r (manga pakayd).

Endu nakawma su manga mategel (sa manga pakayd) lu sa kani Fir’awn, ya nilan pidtalu: aden sukay tanu (premyu) amayka sekitanu i tumalaw (tumaban)?

Tig nu Fir’awn: uway endu makasupeg kanu sa laki.

Tig nilan kani Musa: seka i muna mamutawan, ataw ka sekami i muna mamutawan?

Tig nu Musa: butawan kanu den, guna silan pembutawan, nilangut nilan su mata nu manga taw endu pinakagilekan nilan su manga taw endu pinambwat nilan i sih’r a masla (masla a pakayd).

Endu ini-wahi nami kani Musa i pitasi ka i balala (tungked) nengka anan, na ngimpan ka pinanakab (pinangan) su langun nu pinambwat nilan a kalbutan.

Na napayag su bantang, na batal su penggalebeken nilan.

Lu ba silan tinalaw, na makaganat silan sa namakalusak.

Na nakasugyud su kigkwan sa sih’r.

Pidtalu nilan: nangimbenal kami sa Kadenan nu dunya.

A Kadenan ni Musa endu si Harun.

Tig Nu Fir’awn: babaya kanu den nangimbenal (kani Musa) sa da ku pan makasugut sa lekanu, nan na naumpungan nu bun a ipamakayd nu sya sa dalpa (i sih’r) anan ka endu nu pakapalyu su manga taw nin, na katawan nu bu i pakaydan ku sa lekanu.

Tebpaden ku i manga lima nu endu manga ay nu sa pagkibangan, mawli na palpang ku sekanu tanan.

Tig nilan: sekami na lu kami embalingan kanu Kadenan nami.

Endu (seka Fir’awn) na da i pedtila nengka (ipegkalipunget) ya tabya na nangimbenal kami kanu manga ayatan nu Kadenan nami sa kinawma nin sa lekami, Kadenan nami, penuwi kami sa kasabar endu imatayi kami a Muslim kami.

Endu pidtalu nu kangaunutan a taw ni Fir’awn: ipedtagak nengka si Musa endu su manga taw nin na maminasa kanu dalpa, endu tagaken ka nin endu su kadenan nengka, tig ni Fir’awn: imatayan tanu i manga wata nilan a mama, uyagen tanu i manga babay nilan endu sekitanu i mapulu sa kanilan a pamakagaga.

Tig nu Musa kanu taw nin: patabang kanu sa Allah endu edsabar kanu ka su lupa na kanu Allah, pawarisan nin kanu magkahanda nin kanu manga ulipen nin endu su mapya a mawli (su kapegkataban) na kanu magilek.

Tig nu (tupu nu Israel): napasangan kami sa da ka pan makawma sa lekami endu ulyan den a kinawma nengka, tig nu Musa: su Kadenan nu na binasan nin i satru nu endu isambi kanu nin sya sa dalpa, ka ilayn nin u panun menem i lekanu a peng-galebeken.

Endu bininasa nami su kadakel nu Fir’awn sa lagunan (sa kinapanenang), endu su manga unga (pamulan sa di den munga) ka basi ma-indaw silan.

Na amayka mawma na mapya silan, ya nilan kadtalu: lekitanu bun i nya, amayka nasugat silan a mapasang na pidtempwan nilan si Musa endu su manga bamaginugut, na langun na ipedtempu nilan na lu sa Allah, ugayd na ya madakel sa kanilan i di manga mataw.

Endu pidtalu nilan (kani Musa): apya ngin den i kapambwat nengka sa tanda a sih’r nengka sya sa lekami na di nami seka pangimbenalen.

Na sinugu nami sa kanilan i kadalem endu tapudi endu manga saldu endu babak endu lugu a manga tanda a kapegkagaga nu Allah a pidtinatad, na mimamasla silan, endu silan i manga taw a mujrimeen (dupang, pedsakutu, baradusa).

Endu makawma sa kanilan su siksa sa kanilan (namba nangalabit anan), ya nilan pidtalu: Hay Musa! Pangeni ka pan sa lekami kanu Kadenan nengka sa pasad nin sa leka amayka ma-awa nengka i siksa a nya na mangimbenal kami den sa leka endu paunuten nami den sa leka su tupu nu Israel.

Guna nami ibpagawa sa kanilan su siksa sa taman a di bu pakawma su kageled nilan, kena ka dala nilan tumana su pasad nilan.

Sinulyan silan sa pinageled nami silan kanu lagat, kagina silan i napan-dalbut kanu manga ayatan nami endu silan kanu manga ayatan nami na dala sa atay nilan.

Endu ya nami pinawaris na manga taw a dala alaga nin (pinakapasangan) sa sebangan-sedepan nu dalpa, a dalpa a pinambarakat nami, endu ya bun nakapanalus na su kadtalu nu Kadenan nengka a mapya kanu tupu nu Israel, sabap kanu kinadsabar nilan endu bininasa nami su pakayd nu Fir’awn endu su manga taw nin endu su manga pamulan nin.

Endu pinalipus (linepas) nami su tupu nu Israel kanu lagat, nawma nilan i manga taw a pedtamengan nilan i barahala nilan, pidtalu nilan kani Musa: umbali kami sa kadenan a maytu ba sa kadenan nilan, tig nu Musa: sekanu su manga taw na dala sabut nu.

Saben-sabenal sa kanilan (a pedsakutu) na mabinasa bun i galebekan nilan endu mabatalu langun a penggalebeken nilan.

Tig nu Musa: salakaw pan sa Allah i kyugan nu a kadenan nu, na inilabi kanu nin (sa kapyanan) kanu taw na dunya.

Endu labit ka su kinalepas nami sa lekanu kani Fir’awn sa ped-siksan kanu nin sa mawag a siksa, bamunun nin i manga wata nu a manga mama, ya bu baguyagen na manga babay endu lu ba su tyuba sa lekanu a ebpun sa Kadenan nu a masla.

Endu pibpasadan nami si Musa sa telu-pulu ka magabi endu inumanan nami sa sapulu na sampulna sa pat pulu gay a magabi, na pidtalu nu Musa kanu suled nin a si Harun: ganti aku kanu manga taw ku endu pagkapiya ka (tuntul ka sa tutulu) endu daka munut kanu manga taw a baminasa.

Guna mawma nu Musa su waktu (oras) a pasad na ipembityalay nu Kadenan nin, tig nu Musa: Kadenan ku pailay ka pan sa laki, tig nu Allah: di aku nengka mailay ugayd na ilay ka i palaw anan ka amayka gumanggan su nabetadan nin na mailay aku nengka, guna pembayang-bayang su kadenan nin kanu palaw na nalupit su palaw, nakalundub su Musa sa dala tanud nin, guna maka-imaman na tig nu (Musa): mahasutika, midtawbat ako sa leka, endu saki i paganay a nangimbenal sa leka (su kapabpagilay nu Allah na manawt bu a benal ka mana bu tugku nu kingking na di den penggaga su palaw- hadith ni Tirmidhi).

Tig nu Allah: Musa, pinamili Ku seka kanu manga taw sa kanu suguwan Ku endu su kadtalu Ku na kwa ka su inenggay ku sa leka, endu pangaden ka sa makuyug ka kanu manga barasukur.

Endu inisulat nami kanu Taurat i langun na indawan endu pinayagan sa langun na enggaga-isa, na kamali ka sa mabagel endu sugu ka su manga taw nengka sa kamalan nilan sa mapya, ka ipailay ku sa lekanu su dalpa nu manga faasiq (nakalyu kanu kasugwan su galebek nin).

Isibay ku su manga ayat ku (Qur’an) kanu manga taw a pemamasla silan sya sa lupa sa dala kawagib nin, u nailay nilan i tanda ataw ka ayat na di silan mangimbenal, endu u nakailay silan sa lalan a nakatidtu (kapangimbenal sa Allah) na di nilan baluyn a ukitan, endu u nakailay silan sa lalan a kadusan na baluyn nilan i namba i ukitan nilan, kagina entuba su manga taw a napandalbut kanu manga ayatan nami endu dala sa ginawa nilan i manga ayat ku.

Endu su manga taw a napandalbut sa ayatan nami endu su gay a mawli, na nagugul i manga galebek nilan, dala balas nilan ya tabya na su pinggalebek nilan.

Ulyan a kinalikud nu Musa na inumbal nu manga taw nin su manga pagigimwan nilan (a bulawan) sa sapi a aden suwara nin (mana wata a bagulyang) a sinimba nilan, dala nilan madsangginu (madsuliman) i di nilan pakambityala silan endu di silan gatutulu, binaluy nilan a kadenan endu na-aden silan sa dhalimeen (pedsakutu, mangalimban, salimbuten).

Endu guna den silan makadsendit, (kanu kinambalingan ni Musa) endu nailay nilan i natadin silan, ya nilan nadtalu: u di tanu ikalimu nu Kadenan tanu endu u di tanu nin ampunen na nakuyug tanu den kanu manga taw a nangalugi.

Guna makawli si Musa lu kanu manga taw nin sa galipunget a galidu i ginawa nin, pidtalu nin: ngin den a kawag i nalikudan ku sa lekanu, ngintu ka pinamagayasan nu i siksa nu Kadenan endu inibetad nin su Taurat, na kinwa nin i ulu nu suled nin (kinakangan nin sa buk) sa tinundan nin, tig nu suled nin (Harun): o wata ni ina (Musa), manga taw a nya na pinakalubay aku nilan, endu paydu saman na bunun aku nilan, na dika pedtempu (pedsendit) sa laki i manga satru anan, endu di aku pagkuyug kanu manga taw a dhalimeen.

Tig nu Musa: Kadenan ku ampun ka sa laki endu su suled ku, endu paludep kami kanu limu nengka endu seka i malimu kanu langun u malimu.

Su manga taw a minumbal sa sapi a sinimba nilan na makwa (masugat) silan a lipunget ebpun kanu Kadenan nilan endu makalusak sya sa uyag-uyag sa dunya, na mamba i kabalas nami kanu manga taw a pedtetebu sa kalbutan.

Endu su manga taw a penggalebek sa manga malat, mawli na midtawbat sa ulyan nin endu nangimbenal silan na su Kadenan nengka sa ulyan antu na bangampun a malimu.

Guna den makatelen su lipunget nu Musa na kinwa nin su Taurat endu nakasulat su tutulu endu limu lu kanu manga taw endu bangandamen nilan i Kadenan nilan.

Endu namili si Musa kanu taw nin sa pitu pulu a mama kanu waktu nami, guna silan masugat na linug (sabap kanu pidtalu nilan kani Musa sa di kami mangimbenal sa leka, taman sa di nengka ipailay su Kadenan nengka) tig nu Musa: Kadenan ku u kahanda nengka i binasan silan, na nawna den abpeg ku, na di kami pembinasa sabap kanu galebekan nu manga di mataw sa lekami, ka dala i nya ya tabya na tyuba nengka, ipedtading nengka kanu magkahanda nengka, endu pedtutulun nengka su magkahanda nengka, seka i pedtuldu sa lekami na ampun kami nengka, ka seka i mapya gayd a mangampun.

Endu inggay nengka sya sa dunya i mapya endu lu sa akhirat sa lekami, sekami na midtawbat kami sa leka, tig nu Allah: isugat ku i siksa ku kanu magkahanda ku endu su limu ku na mawlad kanu langun nu enggaga-isa, na inggay ku kanu manga taw a magilek, endu pedzakat silan na bangimbenal kanu manga ayatan nami.

Silan ba su manga taw a minunut kanu rasul a nabi (Muhammad) a di makabatya, sa sekanin i naparuli nu manga Yahudi a nakasulat i ngala nin lu kanu Taurat endu lu sa Injil a simugu sa kanilan sa mapya endu sumapal sa kanilan sa mawag, endu ini-halal sa kanilan su manga mapya endu ini-haram sa kanilan su manga maledsik endu iyawa nin sa kanilan su mawgat (kapegkagan silan kanu ka simba nilan) endu su manga mapasang lu kanu agama nilan, su nangimbenal sa lekanin (Muhammad) endu pinakasla nilan endu inidsabek nilan endu inunutan nilan su sigay (Qur’an) a initulun sa lekanin, na silan i manga taw a namakauntung.

Edtalu ka (Muhammad): sekanu a manga taw, saki na sinugu aku nu Allah sa lekanu langun, a sekanin i kigkwan kanu manga langit endu lupa, na dala kadenan a wagib a pedsimban a lyu sa lekanin, banguyag endu bangimatay, na pangimbenal nu su Allah endu su sinugu nin a di makabatya, a bangimbenal sa Allah endu su manga kadtalu nin, endu unuti nu, ka malemu-lemu sa lekanu i matutulu kanu.

Endu aden kanu taw nu Musa i manga taw a pedtutulu sa bantang endu ipembantang nilan su hukuman.

Endu pinagepad nami (pimbad-bad) sa sapulu endu duwa (su manga wata nu Ya'kub) endu ini-wahi nami kani Musa kanu kabpangeni nu taw nin sa ig: ibetay nengka (Musa) su tungked nengka san sa watu, na mimbwat i sapulu endu duwa a buwal, na natawan na umani-isa ka-tupu i baginuman nilan endu sinilungan nami silan sa gabun endu initulun nami sa kanilan (alman- pegken a manga mamis) endu salwa papanuk (a pedtumpis) sa kan kanu sa kanu manga mapya a rizki nami sa lekanu endu dala kami nilan dupanga, ugayd na ginawa nilan i dinupang nilan.

Endu pidtalu sa kanilan: tanan kanu sya sa dalpa (Baital Muqaddas) endu kan kanu sa endaw den i pegkyugan nu endu edtalu nu i ampunen kanu, endu ludep kanu sa bengawan sa sugyud kanu ka ampunen nami sekanu kanu kadusan nu, na umanan nami pan su manga mapya sa lekanu.

Na sinambyan nu manga dupang kanilan su kadtalu sa di kena su pidtalu sa kanilan, na sinugu kanilan i siksa ebpun sa langit sabap kanu kapendupang nilan.

Endu idsa nengka (Muhammad) sa kanilan a Yahudi su dalpa a masiken sa lagat, a sinupak nilan su inisapal sa kanilan su saptu (di manginseda silan sa saptu), makawma sa kanilan (i seda a madakel) ataw ka embwat i manga seda sa gay na saptu sa madakel, endu gay a di kena saptu na di embwat su seda, mamba i kapembatalu nami sa kanilan sabap kanu kabpelyu nilan sa inugut.

Endu pidtalu nu kaped sa kanilan: ngintu ka bangindawn pan i manga taw na su Allah bu i minasa sa kanilan ataw ka sumiksa sa kanilan sa siksa a mapasang, pidtalu nu (bamangindaw): nya ba i di tanu ka-amung (di tanu makamung) sa tyuba na kapangindaw, endu malemu-lemu i kagilekan silan.

Guna nilan ipedtagak su indawan sa kanilan na linepas nami su pedsapal kanu malat endu tinyuba nami su manga dupang sa siksa a sangat i kapasang nin sabap sa kinalyu nilan sa inugut sa Allah.

Guna nilan pedsungkanga su inisapal sa kanilan na pinambaluy nami silan a ubal a nakalusak i palas nin.

Endu pinakatawan nu Kadenan nengka i pambwatan nin silan (a manga Yahudi) taman sa gay a mawli sa sumiksa sa kanilan sa mawag a siksa, su Kadenan nengka na mangagan i kasiksa nin endu sekanin na bangampun a malimu.

Endu pinabpitas nami (Yahudi) sya sa lupa su manga taw, kaped sa kanilan i manga mapya endu kaped sa kanilan na di kena mapya, endu binatalu nami silan sa mapya endu di mapya, ka malemu-lemu sa kanilan i edtinidtwan silan.

Nasukeli sa ulyan nilan (i manga taw) a nakatundug a nakawaris kanu Taurat a pegkwa sa haram apya kaumbayan (nilan) su Taurat, silan sa sagugunay (bamantiyali) apiya supak sa Taurat endu ya nilan kadtalu: ampunen bun sa lekitanu, endu amayka nakawma sa kanilan i pantyali a pagidsan nin na kwan nilan, saben-sabenal a nakabpasad sa kanilan kanu kitab (Taurat) i di silan edtalu sa Allah ya tabya na bantang, endu napangagyan nilan su dalem nin, endu su dalpa a akhirat na ya labi i kapya nin kanu manga magilek, na ngintu ka di kanu magungangen?

Endu silan i pegkamal kanu kitab endu pedsambayang silan, (tig nu Allah): sekami na di nami dadagen su balas nu manga taw a papegkapya.

Endu inipulu nami su palaw kanu pulu nu mana den su gabun a pedsilung sa lekanu endu na-antap nilan i makadadsang sa kanilan (di nin bun idadsang), kamali nu su inenggay nami sa lekanu (su Taurat) sa mabagel endu tademi nu su dalem nin ka malemu-lemu i kagilekan kanu.

Endu namaruli su Kadenan nengka sa tupu nu Adam sa lu pan sa manga bigkugung nilan su mauli a taw nilan endu pinadsaksi nu Allah silan sa ginawa nilan, tig nu Allah: ngintu di kena saki i Kadenan nu? Tig nilan: Seka! Midsaksi kami, ka endu di nilan madtalu lu sa gay a mawli i da sabut nu sa namba.

Ataw ka endu nu madtalu i sinumakutu bun su ka-apwan nami, na sekami na mawli a taw kami bu a nakatundug bu sa kanilan, na ngintu binasan kami nu sabap sa galebek nu manga baatil?

Endu mamba i kapedtinatad nami kanu manga ayat, ka malemu-lemu sa kanilan i maginuntulan silan.

Endu batya ka sa kanilan (Muhammad) su tudtulan kanu inenggan nami sa kanu ayatan nami (ped kanu lumpukan na Yahudi) na linuwas nin (tinagak nin) su kataw nin na inunutan nu Shaytan, na nakuyug kanu manga taw a nangabinasa.

Endu u nagkahanda nami bu na inipulu nami den (i pangkatan nin sabap) kanu kataw nin, ugayd na ya natagu sa ginawa nin na tatap sa dunya (di matay) endu inunutan nin i kyug na ginawa nin, na ya nin upaman na aso a magidsan i galugat ataw ka dili na penggemaw i dila nin, upaman u manga taw a napandalbut kanu manga ayatan nami, na panudtul ka (Muhammad) su manga tudtulan ka basi makapamikil silan.

Mawag a upaman i manga taw a napandalbut kanu manga ayatan nami endu silan bun i pendupang sa kanu ginawa nilan.

Su tinutulu nu Allah a entuba i natutulu (sa bantang) endu su tadingen nin na silan menem i nangalugi.

Endu saben-sabenal a binaluy nami i madakel a jin endu manusya a inidasek sa naraka jahannam, ka aden bun manga atay nilan na di nilan ituntay endu aden bun manga mata nilan na di nilan ipangingilay endu aden bun manga tangila nilan na di nilan ipanuliman, silan na mana bun manga binatang, taman sa muna pan silan (sa binatang) i kinatading nilan, silan a manga taw na dala natawan nilan.

Endu kanu Allah su manga ngala a manga mapya, na pangeni kanu sa Allah kanu manga ngala nin, endu pasagadi nu su bagumbayan nin i manga ngala nu Allah, ka di ebplis na balasan silan kanu penggalebeken nilan.

Endu kaped a binaluy nami i manga taw a banutulu sa bantang (haqq) endu pembantang sa hukuman sabap kanu haqq.

Su manga taw a napandalbut kanu manga ayatan nami na belayatan nami silan (sa siksa) sa di nilan katawan i ulyanan nilan.

Endu pelanatan ku silan (di silan tundugen sumiksa ka basi magumbaya) ka su kapakayd ku (sa kanilan) na mapasang.

Ngintu ka di nilan kapamikir su tagapeda nilan a (Muhammad) na di kena buneg, sekanin ipabpagingat a mapayag.

Ngintu da nilan madsuliman i manga masulen manga langit endu su lupa endu su binaluy nu Allah enggaga-isa, endu di ebplis na pakasupeg sa kanilan su ajal nilan (kapatay) na ngin pan a kadtalu sa ulyan (na Qur’an) i pangimbenal nilan?

Su taw a tadingen nu Allah na dala den makatutulu lun, endu itagak nin silan kanu kadupangan nilan sa anteng-anteng silan (mana pisek a pedtatalyung).

Idsa nilan sa leka (Muhammad) su gay a mawli u kanu i kawma nin, edtalu ka (Muhammad): kataw lun na lu sa Kadenan ku, dala makapayag lun i timpu nin ya tabya na sekanin (ka namba) na mawgat sa manga langit endu su lupa, di makawma sa lekanu ya tabya na makatekaw (dala makaingat) idsa nilan sa leka ka mana nengka katawan bun (Muhammad), edtalu ka sa kanilan: kataw lun na lu sa Allah, ugayd na ya madakel sa taw na di nilan katawan.

Edtalu ka (Muhammad): di ku kamilikan i ginawa ku sa kagkapya nin endu kagkayd ya tabya na kahanda nu Allah, endu u katawan ku bu i gayb (di gailay) na nakapakadakel ku den i mapya (kakawasan), endu di aku mawma na malat, dala sa laki (intu) ya tabya na (saki) papegkagilek aku endu papegkalilini aku kanu bamangimbenal.

Sekanin a (Allah) i minaluy sa lekanu sa isa bu a napas i nabpunan (Adam) endu lu nin ba binaluy i kaluma nin a katelenan nin (makapatana sa kanu uyag-uyag nin) na guna den su sinumbak nin si kaluma nin na migkagingay sa mapegkag (di kawgatan) na dala mapinda su kagingay, guna den pegkasla (su kagingay) na nangeni silan (Adam-Hawa) sa Kadenan nilan sa amayka enggan kami nengka sa mapya a wata na makadsukur kami.

Guna den silan kanggay sa salih a wata na binaluy nilan a nakasakutu silan sa kinabedtu lun sa ngala, mahasuti su Allah kanu ipedsakutu nilan.

Pedsakutu silan sa apya paydu na dala gabaluy nin (dala naumbal u pedsimban nilan), endu silan pan i bagumbalen (nu Allah).

Endu su manga barahala na dala magaga nin tumabang kanilan, endu di nilan kadtabangan su ginawa nilan.

Endu amayka enggaten nengka silan sa katuntul (kanu bantang) na di kanu nilan unutan, magidsan pan i inenggat nu silan ataw ka linumenek kanu.

Saben-sabenal kanu pedsimban nu salakaw sa Allah na manga ulipen a pagisan nu bun, na tawag nu kun ba silan, ka sawalen kanu nin amayka benal kanu.

Ngintu aden ay nilan a ibpelakaw nilan? Ataw ka manga lima a ipangunguyamay nilan? Ataw ka manga mata a ibpagilay nilan? Ataw ka manga tangila a ibakikineg nilan? Edtalu ka (Muhammad): tawag nu i manga barahala nu, mawli na pamakaydi aku den, na di bun katagadan (kawgatan) i kabinasa nu.

Ka saben-sabenal na ya pidtalad nu sa laki (Muhammad) na su Allah, a napatulun sa kitab (Qur’an) endu sekanin i tumuganul kanu manga taw a salih (manga mapya).

Endu su pedsimban nu a salakaw sa Allah na di silan makatabang sa lekanu endu di nilan kadtabangan i ginawa nilan.

Amayka tawagen nu (Muslim) silan sa tutulu, di silan makakineg, endu matag kanilan pedtulikan na di silan pakailay.

Kamali ka i katigkel endu isugu nengka i mapya endu embalawagi ka ataw ka di ka bamimiyas su dala manga sabut nin.

Endu amayka pedsasaten ka na shaytan na lindung ka sa Allah ka sekanin i pakakineg a mataw.

Su manga taw a nagilekan sa Allah na amayka sinasat nu shaytan na tumadem silan sa Allah, na nakaimaman silan.

Endu su pagali nu manga shaytan na pedtapiden nu manga shaytan sa katading (kanu manga taw) sa di nilan indalaynun.

Endu amayka di nengka silan kapananggitan sa ayat na pedtalun nilan: namba ka minumbal ka den sa ayat, edtalu ka (Muhammad): ya ku bu bagunutan na su ini-wahi sa laki ebpun sa kadenan ku a namba i ipabpagilay (sa lekanu) endu tutulu endu limu kanu manga taw a bangimbenal.

Endu amayka binatya i Qur’an na pakikineg nu, endu tana kanu, ka malemu-lemu sa lekanu i ikalimu kanu.

Endu tademi ka (Muhammad) su Kadenan nengka kanu ginawa nengka (pusung endu dila) sa bangumpaya endu gilek, endu di kena matanog a kadtalu sa mapita-malulem, na daka enggula sa makuyug ka kanu manga taw a limpang sa Allah.

Su manga malaikat lu sa Allah na di silan pemamasla sa kasimba sa Allah endu pedtasbih silan sa Allah endu pedsugyud silan sa Allah Ta’ala.