The Noble Qur'an Encyclopedia

Hay seka a migkumbung.

Tindeg ka kanu magabi (tahajud ka) sa paydu bu.

Sabad kanu magabi atawaka kulangi ka sa paydu.

Atawaka umani ka, endu atul ka sa mapya i kabatya negka sa Qur’an.

Ka saben-sabenal a sekami na pelulanan nami seka sa kadtalu a mawgat.

Saben-sabenal su kambangun sa magabi na magayun gayd su dila kanu pusung, endu mapayag gayd i katuntay nu pusung kanu pembatyan nu dila.

Saben-sabenal aden sa leka kanu malamag i kanggalebek a malendu.

Endu tademi ka su ngala nu Kadenan nengka endu pangalimbaban ka sa lekanin.

Na kadenan nu sebangan-sedepan, dala wagib a simban a salakaw sa lekanin, na baluy ka sekanin a saligan nengka.

Endu edsabari ka su langun a pedtalun nilan endu tagak ka silan sa matilak.

Endu pasagadi ka, endu su papendalabut a pedsalig sa tamuk nilan, endu lanati ka den mun silan sa paydu.

Ka saben-sabenal a sya bun sa laki su lantay-lantay endu su naraka jaheem.

Endu pegken a aden swag nin endu siksa a masakit.

Kanu gay a kemegkel su lupa endu su palaw, endu mabaluy su palaw a libubuk.

Saben-sabenal a sinugu nami sa lekanu (si Muhammad) a makadsaksi sa lekanu sa mana bun su kinasugu nami lu kani Fir’awn sa rasul (Musa).

Na sinupak ni Fir’awn su sinugu, na bininasa nami si Fir’awn sa binasa a mapasang.

Panun i kadalinding nu sa naraka sa migkafir kanu? A namba a gay na su manga wata na egkaputi su buk nilan sabap sa kapasang nin.

Su langit na galupet, na manggula su langun nu pasad nin.

Saben-sabenal i nya ba indawan, entayn i pegkyug (sa surga) na mumbal silan sa lalan sa Allah.

Saben-sabenal a katawan u Kadenan nengka i pedsambayang ka sa lamig den a gay, endu sabad endu ikatelu bad kanu magabi, endu su bagunut sa leka a manga bamaginugut, su Allah i bagatul kanu magabi endu malamag, katawan nu Allah su inib-palyugat nin sa lekanu, na batya nu su kalemwan kanu su Qur’an, katawan nu Allah su kaped sa lekanu na pendalu, su kaped menem sa lekanu na bangangawid sa lupa, ka bangilayn nilan su limu nu Allah, su kaped menem sa lekanu na pembunuwa sa lalan sa Allah na batya nu su Qur’an sa kalemwan kanu, endu itindeg nu su lima a waktu endu inggay nu su zakat nu, endu pautang nu su Allah sa mapya, su nganin a ini-una nu kanu ginawa nu na mawma nu bun lu sa Allah a labi pan i kapya nin, endu labi i kasela nin, pangeni kanu sa ampun sa Allah ka sekanin i bangampun a malimu.