The Noble Qur'an Encyclopedia
Towards providing reliable exegeses and translations of the meanings of the Noble Qur'an in the world languagesThe emissaries [Al-Mursalat] - Filipino Translation (Maguindanaon) - Rowad Translation Center
Surah The emissaries [Al-Mursalat] Ayah 50 Location Maccah Number 77
Saki (Allah) idsapa ku su sambel a pedtundug-tundug.
Saki (Allah) idsapa ku su sambel a sangat i kabagel nin.
Saki (Allah) idsapa ku su sambel a pedtayak kanu dadtem.
Saki (Allah) idsapa ku su Qur’an a napadsenggaya sa halal-haram.
Saki (Allah) idsapa ku su manga malaikat a bananggit sa wahi a pebpayag.
Sa manga uzur nu manga taw, atawaka ipapegkagilek.
Saben-sabenal su inibpasad sa lekanu na mawma (gay a mawli).
Amayka egkanan su bitun (dala sigay nin).
Endu amayka magubal den su manga langit.
Endu amayka makabayug den su manga palaw.
Endu amayka mabulig den su manga sinugu kanu waktu nin.
Kanu gay a masla a nataglay sa paydu.
Su gay a kagkukum.
Dili nengka gatawan i pidtalu a gay a kagkukum?
Su bawgan sa naraka kanu namba a gay i kandalpan nu papendalbut (kanu manga ayatan).
Saben-sabenal a bininasa nami su nangawna a manga taw.
Mawli na itundug nami su mawli sa kanilan.
Mamba i pakaydan nami kanu manga darwaka.
Su bawgan sa naraka kanu namba a gay i kandalpan nu papendalbut (kanu manga ayatan).
Saben-sabenal a binaluy nami sekanu sa ig a malubay.
Binaluyan nami sa kadtakenan nin sya kanu rahim nu babay.
Sa taman a di gawma i kalyu nin (kambata lun).
Langun a entu na mapya gayd i kina-ukulun.
Su bawgan sa naraka kanu namba a gay i kandalpan nu papendalbut (kanu manga ayatan).
Benal a binaluy nami su lupa sa mindadalapisa.
Sa manga bibiyag endu manga namamatay.
Endu binaluy nami sya kanu lupa i manga palaw a mapulu endu pina-inem nami sekanu sa ig a tabang.
Su bawgan sa naraka kanu namba a gay i kandalpan nu papendalbut (kanu manga ayatan).
Angay kanu sa naraka a di nu bangimbenalen.
Lu kanu ka aden bel nin, amayka nakapulu na telu ka biyas i palas nin.
Di kasilungan endu di kadalungan ka mayaw.
Saben-sabenal a padsabulakan nin i apuy a sangat i kangasela nin.
Mana den su manga unta a binaning a manga masla.
Su bawgan sa naraka kanu namba a gay i kandalpan nu papendalbut (kanu manga ayatan).
Namba su gay a da sa kanilan i kadtalu.
Endu da den kanilan i makadawa pan silan.
Su bawgan sa naraka kanu namba a gay i kandalpan nu papendalbut (kanu manga ayatan).
Namba su gay a kagkukum, binulig nami sekanu endu su nangawna.
Na amayka aden pamun akal nu, na pagakal kanu bun.
Su bawgan sa naraka kanu namba a gay i kandalpan nu papendalbut (kanu manga ayatan).
Saben-sabenal su manga taw a magilek na sya sa kasilungan endu manga buwal.
Endu unga na kayu endaw i kyug nilan.
Kan kanu endu inem kanu sa mapya kanu lalaw nu galebekan nu (a mapya).
Saben-sabenal a mamba i kabalas nami kanu manga mibpya-piya.
Su bawgan sa naraka kanu namba a gay i kandalpan nu papendalbut (kanu manga ayatan).
(Su manga dupang) na kan kanu, endu egkakalini kanu sya sa dunya ka manga dupang kanu.
Su bawgan sa naraka kanu namba a gay i kandalpan nu papendalbut (kanu manga ayatan).
Amayka pidtalu sa kanilan i ruku’ kanu na di silan rumuku’.
Su bawgan sa naraka kanu namba a gay i kandalpan nu papendalbut (kanu manga ayatan).
Na ngin pan i kadtalu a mawli (sa Qur’an) a palityayan nilan.