The Noble Qur'an Encyclopedia

Makapantag kanu ngin i ibamagidsaya nilan?

Pantag kanu tudtulan a masela?

Su silan entu kanu entuba na pembida-bida silan.

Benal a katukawan nilan.

Mawli sa entu na benal a katukawan nilan.

Ngintu da nami baluya su lupa sa belat?

Endu su manga palaw sa nakabuladtek endu nakapasek.

Na endu inaden nami sekanu sa edtitiwalay.

Endu inaden nami su kapedtulug nu sa ibpangintelenen nu.

Endu binaluy nami su magabi sa tanggub.

Endu binaluy nami su malmag sa ibpangilay nu sa kawyagan.

Pimbalay nami san kanu pulu nu su pitu lapis a langit a pimbagelan.

Endu inaden nami su senang sa pedsalindaw (egkalapat nin su dunya).

Endu papedtulunen nami ebpun kanu dadtem su ulan a maleges.

Endu nami makapatu’ sabap lun (ulan) su unud endu su mangengetu.

Endu su manga pamulan a manga malabung.

Saben- sabenal a su gay a mawli na aden timpu nin

Kanu gay a yupen su sanggakala na makatingguma kanu den (manga taw a pengguyung-guyung) sa lumpuk-lumpukan.

Endu kabukatan den su langit sa maaden lun su manga bengawan

Endu mamakanayug su manga palaw sa matunag a mabaluy a ig.

Saben-sabenal su naraka jahannam na ya nin kaaden na ebpangangata.

Sya kanu manga taw a dalwaka.

Lu ba silan dayun sa dayun.

Da mananam nilan a matenggaw endu da mainem nilan.

Ya bu tabya na ig a pedsebu-sebu endu dana (uta, ating endu manga kaped pan manga maledsik).

Balas a pakadayt (kanu kinasupak nilan).

Saben-sabenal na silan entu na di nilan gadsingani su kagkwinta (kanu manga galebekan).

Endu pinandalbut nilan su ayatan nami sa tidtu a kinapandalbut.

Endu su langun u enggaga-isa na inisulat nami sa tidtu-tidtu

Na tepengi nu ka daden makawman nami sa lekanu ya tabya na siksa.

Saben-sabenal na aden siya kanu manga magilek (kanu Allah) i bantugan (sulga).

Aden lun i manga pamulan endu manga anggur (grapes).

Endu manga laga a bagu sukud (manga mataya endu mamagidsan sa umul).

Endu manga basu a nangapenu (alak sa sulga).

Da makineg nilan (lu sa sulga) a da kapantag in a bityala endu kalbutan.

Balas a ebpun kanu Kadenan nengka (Allah) a inenggay a paka-ustu (kanu nanggalebekan nengka).

Kadenan (Allah) a pedtiyakap kanu pitu lapis a langit endu lupa na endu su nganin a nakapagelet kanilan duwa, sangat den a malimu (sa dunya), dala makatika sa kanilan embityala kanu Allahu Ta’ala (kanu gay a mawli).

Gay a edtindeg si Jibril endu su manga malaikat sa egkuyug-kuyug silan, di silan makadtalu ya tabya na entayn i sugutan nu Ar-Rahman (Allah) sa ya nin madtalu na endaw i benal.

Entuba su gay a bantang, na entayn i taw a magkahanda nin embalingan kanu Kadenan nin a (Allah) na embalingan den (gagalu a uyag-uyag pan siya sa dunya).

Saben-sabenal sa lekami na pina-ingat nami sekanu su kasiksan a masupeg, kanu gay a mailay nu taw su nganin a nanggalebek u duwa a lima nin, sa ya madtalu nu supak (kafir): nyaba ka naaden aku a libubuk.