The Noble Qur'an Encyclopedia

Idsapa ku (Allah) kanu manga malaikat (a pegketeng kanu ngyawa nu manga taw a di pamalityaya sa kapegketeng a mapasang).

Idsapa ku (Allah) kanu manga malaikat (a malangkas i kapegkuwanin kanu ngyawa nu manga taw a pamalityaya.

Endu su manga malaikat a malangkas i kapedtuman nilan kanu suguwan kanilan nu Allah sa benal a malangkas.

Endu su manga malaikat a pegkuyakuya sa kapenggalebek sa kasuguwan kanilan.

Na su manga malaikat a bagatul (sa egkatamanan nu manga kaaden) sa kasuguwan.

Siya kanu gay a paganayan a kayup kanu Sanggakala a makugkung/kumegkel su dunya (na maibped matay su langun nu balangyawa.

Tundugan kanu kaduwa a kayup kanu Sanggakala (egkawyag embalingan su manga balangyawa).

Su manga pusung (nu manga kafir) kanu entuba a gay na egkyab-kyab (kukuken).

Su kapangingilay nilan na luntana (matayungu) (sabap sa gilek ilan kanu entuba gay).

Ya nilan madtalu: ngintu makambalingan tanu pamun kanu andangan a mambebetad tanu kanu uliyan nu kapatay tanu?

Apya yanin kaaden i su manga tulan tanu na mimbubuk den?

Ya nilan edtalun: su entuba a kinawyag nami na kena besen ka uyag-uyag a kalugyan (lugi lumugi).

Ya bu kabpelesing (kagkag) kanu entuba na makaisa bu (kanu ika-duwa a kayup kanu Sanggakala).

Na silan bantu kanu entuba a gay na midtudayuk sa ya nilan kinaimaman na siya kanu liyawaw nu bagu den a lupa.

Ngintu nakatingguma sa leka (Muhammad) su tudtulan kanu Musa?

Kutika a kinatawag sa lekanin nu Kadenan nin siya kanu bawgan a suti a binedtuwan sa Tuwa (bawgan sa palaw sa Sina).

"Angay ka lu kani Fir’awn ka saben-sabenal na sekanin na mindupang.

Edtalu ka (Musa kani Fir’awn): "Ngintu aden pan sa leka i kadtawbat nengka (kanu manga dusa nengka)?"

"Ka tutulun ku seka lu kanu Kadenan nengka na mabaluy a magilek.

Ulyan nu entu na pinailay ni Musa si Fir’awn sa tanda a masla.

Na pinadalbutin (si Musa) endu sinupakin.

Mawli na tinemaligkud na namagayas mawa (na pinatalus nin su kapendupang nin).

Na linimudin na nanawag (sa manga taw nin).

Sa pidtalu nin "Saki su Kadenan nu a mapulu!.”

Tinumpalak (siniksa) sekanin nu Kadenan (Allah) sa siksa sa akhirat endu siksa sa dunya.

Saben-sabenal kanu entuba na ibalatan (indawan) a masla kanu entayn i magilek (kanu Allah)

"Ngintu sekanu den ba i labi i kapasangin a binaluy? Ataw ka su langit a pimbalay nin (Allah)?"

Inipulu nu Allah su langit sa dala daway nin.

Endu pinagkenemin su magabi nin endu pinagkaliwanagin su malamagin.

Endu su lupa kanu uliyan a entuba na binelatin.

Pinambuwat nin su manga ig, manga utan.

Endu su manga palaw sa inipasekin ku lupa.

Kawyagan nu sekanu endu su manga pangangayamen nu.

Na amengka makawma den su bangkit a masla (gay a mawli).

Gay a mendudulugud nu manusya su langun nu nanggalebekin (magidsan i mapya endu mawag).

Endu ebpapayag den su apuy sa jaheem siya kanu entayn i dayt a makailay lun.

Makapantag kanu entayn i mindupang.

Endu inilabi nin su uyag-uyag sa dunya.

Na saben-sabenal na su apuy sa naraka jaheem na entuba i kadtakenanin.

Endu makapantag menem kanu entayn i inikagilek in su kapangadap in kanu Kadenan in (Allah), endu kinumpen nin su ginawa nin kanu nafsu hawa.

Na saben-sabenal na su surga i kadtakenan in.

Ibpagidsa nilan sa leka (Muhammad) kanu i kawma nu bangkit?

Na kena man seka i dayt a makalabit lun.

Su Kadenan nengka (Allah) i pegkatawkataw lun.

Ya bu man leka na kabpanginggilek kanu entayn i magilek kanu gay a mawli.

Kataw nilan kanu kinawget ilan sa dunya na nalalamagan bu ataw ka nagagabyan.