The Noble Qur'an Encyclopedia

Migkalibedteng endu tinemaligkud (si Muhammad).

Kanu kinawma sa lekanin nu buta (di pakailay).

Endu di nengka egkatawan (Muhammad) i sekanin besen i pedsuti (malityaya) sa leka.

Ataw ka makandudulugud na makangguna lun su patadem.

Makapantag kanu entayn i di pakanasisita.

Na sekanin i inipamamantag nengka.

Endu da bun sa leka i dusa amengka di sekanin makadsuti (malityala).

Endu makapantag kanu entayn i nakawma sa leka a bamagayas.

Na sekanin banan i egkagilekan (kanu Allah).

Na sekanin i nakadtalipenda nengka.

Di kena maitu! Ka saben-sabenal na su Qur’an na patadem.

Na entayn i egkalilini (sa labitan/pangagi) na tademan nin intuba.

Siya kanu suhuf (Qur’an) masla/bala-alaga.

Mapulu (i pangkatan nin) a suti.

Siya kanu lima nu manga malaikat (a bamedsulat).

Manga mapulu i pangkatan nin endu matidtu

Gimela (namulkan) su manusya kanun ngin den a kinasupakin.

Endaw ebpun a enggaga-isa i binaluyan sa lekanin nu Kadenan?

Ebpun kanu ig (mama endu babay) i kinalimbag lun, mawli na dinyangka nin.

Mawli na su lalan a mapya na pinakalemuwanin sa lekanin.

Mawli na inalap sekanin (nu Allah) na inipalebengin.

Mawli na amayka magkahanda nin na pambuwaten nin (kanu ulyan nu kaalap).

Benal a da ka-ebplis in na da nin makatunay su nganin a kasuguwan sa lekanin.

Na panulimanen nu su manusya su makanin/pegkenin.

Saben-sabenal na sekami na inibubus nami su ig sa sampulna a kinabubus,

Mawli na pinambutekad nami su lupa sa kinambutekad.

Na pinatu’ nami kanu manga lupa su manga unud (lagas).

Endu manga anggur endu manga kakamun.

Endu zaitun endu kulma.

Endu manga pamumulan a malalabung.

Endu manga unga na kayu endu manga kawyagan nu manga binatang,

Kawyagan nu sekanu endu su manga pangangayamen nu.

Na amayka makatalingguma su kisek (kabangkit).

Gay a palaguyan nu taw su suledin.

Endu si ina nin endu si ama nin.

Endu si kaluma nin endu si wata nin,

Uman isa kanilan kanu entuba a gay na ya nin madtulan na ginawa nin.

Su manga pamenengan kanu entuba a gay na pedsigay.

Sa pedtatawa a masigalaw.

Endu pamenengan kanu entuba a gay aden lun i libubuk.

Nabawsan na kalibutengan.

Silan ba entu su manga sinumupak kanu Allah a manga dupang.