The Noble Qur'an Encyclopedia

Idsapa ku kanu manga bitun a masla.

Idsapa ku kanu gay a inibpasad (gay a mawli).

Idsapa ku kanu pedsaksi endu su pedsaksiyan.

Namulkan su kigkuwan kanu kalut.

Su apuy a aden lun i manga laleg.

Lu silan kanu entuba a bamagagayan.

Endu silan kanu nganin a pinakaydan nilan kanu manga bamalityala na manga saksi.

Endu da nabaluy a inikabensi nilan ku manga mu’min ya tabya na su kabalityala nilan kanu Allah a mapulu a bamantugen.

A lekanin (Allah) su kadatu kanu manga langit endu lupa endu su Allah kanu langun u enggaga-isa na kadsaksiyan nin.

Saben-sabenal a su silan antu a namatalu kanu manga mu’min a manga mama endu manga babay mawli na di silan edtawbat na aden kanilan su kasiksan a jahannam endu aden sa kanilan su kasiksan a makatutung.

Saben-sabenal na silan antu a namalityala endu minggagalebek sa manga mapya na aden kanilan i kasulgan a pelagilay kanu kababan nin su manga lawas a ig entuba su bantugan a masla.

Saben-sabenal na su kasiksa nu Kadenan nengka Muhammad na sangat a mapasang.

Saben-sabenal na sekanin (Allah) i pangebpun endu papembalingan.

Endu sekanin (Allah) i bangampun endu labi a bala-gagaw.

Kigkuwan kanu Arash a mapulu.

A penggula-ula sa nganin a egkahandan nin.

Ngintu nakawma sa leka su tudtulan kanu manga sundalu?

Ni Fir’awn endu Thamud?

Ugayd na su silan a simupak na papendalbut.

Endu su Allah kanu taligkudan nilan na balibet.

Ugaid sekanin su Qur’an a mapulu

Siya kanu Lawh Al-Mahfudh.