The Noble Qur'an Encyclopedia

Alif Laam Raa Sunniin keeyyattoota kitaabicha ogummaan guutameeti. [1]

Sila gara nama isaan irraa ta’ee (nabi muhammad) “nama akeekkachiisi; warra amanes toltuun dabre Rabbii isaanii bira isaaniif jiraachuudhaan gammachiisi” jechuun wahyii godhuun keenya namootatti dinqii ta’eeraa? Kaafirtoonni: “Dhugumatti, inni kun falfalaa ifa bahaadha” jedhan

Gooftaan keessan Allaah Isa samiifi dachii guyyoota jaha keessatti uumee, ergasii Arshii irratti (ol ta’iinsa isaaf malu) ol ta’eedha. (amrii) Waan hundaa garagaggalcha. Araarsaan homaatuu hayyama Isaatiin booda malee hin jiru. Kun Rabbi Gooftaa keessani Isa qofa gabbaraa. Sila isin hin gorfamtanuu?

Deebiin hunda keessanii gara Isaati. Waadaa Rabbiin (beellamee dha) kandhugaati. Isatu uumuu jalqabee, ergasiis isa deebisa. Isaan amananii, toltuu dalaganiif haqaan mindaa isaaniif kennuuf (akkas godhe). Isaan kafaran waan kafaraniif jecha isaanif dhugaatii danfaa irraa ta’eefi adabbii laalessaatu jira.

Inni Isa aduu madda ifaa, baatii ifa taasisee, akka lakkoofsa waggootaafi herregaa beektaniif jecha bakka (buufata) isaaf (Ji’aaf) godheedha. Rabbiin kana dhugaan malee hin uumne. (Rabbiin) keeyyattoota namoota beekaniif addeessa. [2]

Dhugumatti, bakka wal bu’uu halkaniifi guyyaa keessa, waan Rabbiin samiileefi dachii keessatti uume keessaas namoota (Rabbiin) sodaataniif mallattooleetu jira.

Dhugumatti, isaan qunnamtii keenya hin sodaanne, kan jireenya addunyaa qofa fedhanii, isheetti gammadaniifi isaan keeyyattoota keenya irraa dagatoo ta’an.

Isaan sun waan hojjachaa turaniif jecha teessoon isaanii ibidda.

Isaan amananii, gaggaarii hojjatan Gooftaan isaanii iimaana isaanitiin isaan qajeelcha. Jannatoota qananii keessa laggeen isaan jala yaati.

Kadhaan isaanii ishee keessatti (yeroo waan tokko fedhan) “yaa Allaah! Qulqulliini keeti” jechuudha. salamataan isaaniis ishee keessatti “nagayaa” jechuudha. Kadhaan isaanii kan boodaas “faaruun hundi kan Rabbii gooftaa aalamaati” jechuudha.

Odoo Rabbiin namaaf akka isaan gaarii (argachuuf) jerjerfatanitti hamtuu isaaniif jerjersee, silaa beellamni (adabbii) isaanii, isaaniif raawwatama ture. Isaan wal ga’ii keenya hin sodaanne, jallina isaanii keessa dhama’oo tahanii isaan dhiifna.

Ilmi namaa yeroo rakkinni wahii isa tuqe, cinaacha isaa irratti yookiin taa’eetis yookiin dhaabbateetis Nu kadhata. Yeroo Nuti rakkina isaa isa irraa fuune akka waan rakkina isa tuqeef Nu hin kadhatiniitti (jallina isaa) itti fufa. Akka kanatti daangaa dabartootaaf wanti isaan hojjachaa turan miidhagfame. [3]

Dhugumatti, dhaloota isin duraa irraa balleessinee jirra yeroo isaan lubbuu isaanii miidhanii, ergamtoonni isaanii raajii mul'ataan isaanitti dhufanii hin amanin (balleessinee jirra). Akka kanatti ummata badii raawwattoota ta’aniif galata galchina.

Ergasii isaan booda dachii keessatti bakka bu’oota isin taasifne akkam akka dalagdan ilaaluuf jecha.

Yeroo keeyyattoonni keenya ifa ta’anii isaan irratti dubbifaman, isaan qunnamtii keenya hin kajeelle (sodaanne) “Qur’aana kana hin ta’iniin nutti kottu; yookiin isa jijjiiri” jedhu. jedhi “Ani lubbuu tiyya biraa isa jijjiiruun naaf hin ta’u. Waan gara kiyyatti wahyii godhamu malee hin hordofu. ani yoon ajaja Gooftaa kiyyaa dide, adabbii guyyaa guddaan sodaadha” (jedhi).

Jedhi “Odoo Rabbiin fedhee, silaa ani isa isin irratti hin dubbisu. Innis (Rabbis) isa isin hin beeksisu. Dhugumatti, ani isa dura yeroo dheeraa (waggaa 40) isin keessa jiraadheera. Sila isin sammuu hin qabdanii?” jedhiin.

Nama Rabbi irratti kijiba uume yookiin kan keeyyattoota Isaa sobsiise caalaa namni miidhaa hojjate eenyu? (hinjiru). Dhugumatti badii raawwattoonni hin milkaa’anu.

Rabbiin ala waan isaan hin miineefi hin fayyadne gabbaranii “Isaan kun Rabbiin biratti manguddoota (araarsitoota) keenya” jedhu. “Sila isin waan Inni samiileefi dachii keessatti hin beekne Rabbitti himtuu? Inni (Rabbiin) waan isaan Isa waliin gabbaran irraa qulqullaa’e, ol ta’ee jira” jedhi.

Ilmi namaa ummata tokko malee hin turre. Booda irra wal dhaban. Odoo jechi Gooftaa kee irraa ta’e dursee dabruu baatee, silaa waan isaan irratti wal dhaban keessatti gidduu isaaniitti ni murteeffama ture.

“Mallattoon Gooftaa isaa irraa maaliif isa irratti hin buufamin?” jedhu. “Wanti fagoo hundi Rabbumaafi. (dallansuun Rabbii warra dharaarratti bu'uu) Isinis eegaa; Anis isin wajjin warra eegan irraayi” jedhiin.

Yeroo namoota erga rakkoon isaan tuqxee booda rahmata isaan dhandhamsiifne, yeroma san keeyyattoota keenya keessatti shira baasuun isaaniif ta’aadha. “Rabbitu tooftaatti irra jarjaraadha” jedhi. Dhugumatti, ergamtoonni keenya (maleykonni) shira isin baaftan ni barreessu.

Inni Isa dachii goyduufii bishaan (bahara) keessas isin deemsisu. hanga Yeroo dooniwwan keessatti taatanii qilleensa gaarii keessa isaaniin deemanii, isheetti gammadan, qilleensi bubbisaan isitti dhufee; danbaliin bakka hunda irraa isaanitti dhufe; isaanitti marfamuu yaadan. Rabbiin qofa kadhatan, ibaadaa Isaaf qulqulleessanii, "Yoo Ati (balaa) kana irraa nagaa nu baafte, nuti dhugumatti, warra (si) galateeffatan irraa taana” (jedhan).

Yeroma Inni nagaa isaan baase, isaan yoosuu haqaan malee dachii keessatti daangaa dabru. isin Yaa ilmaan namaa! Daangaa dabriinsi keessan lubbuulee keessan irratti. Qananii jireenya addunyaa (xiqqoo qananiitu), San booda deebiin keessan gara keenyattii, Nuti waan isin dalagaa turtan isinitti himna.

Dhugumatti, fakkeenyi jireenya addunyaa, akka bishaan Nuti samii irraa isa buufnee (roobaa), ergasii biqiltuuwwan dachii kan waan ilmi namaatiifi horiin nyaatan (midhaaniifii marga) irraa ta’an isaan wal makamanii, hanga dachiin faaya ishee qabattee, miidhagdee, abbootiin ishee ishee (oomishachuu) irratti danda’oo ta’uu yaadan, adabbiin keenya halkan yookiin guyyaa isheetti dhufee, akka waan kaleessa achitti hin ta’iniitti (hin jirreetti) (dhabamaa) haamamaa ishee goone. Akka kanatti mallattoolee ummata xiinxalaniif adda baafna.

Rabbiin gara mana nagayaatti waama. Nama fedhe gara karaa qajeelaati qajeelcha. [4]

Isaan toltuu hojjataniif (mindaa) gaariifi dabalataatu jira. dabalataatu jira. Gurraachinniifi salphinni fuulleen isaanii hin haguugu. Isaan sun warra jannataati. Isaan ishee keessatti hafoodha. [5]

Isaan hamtuu hojjatan mindaan hamtuu fakkaatuma isheetiin ta’a. Salphinni isaan haguugdi. Rabbi irraa wanti isaan tiksu isaaniif hin jiru. Fuulli isaanii akka waan kutaa halkan dukkaneessaa ta’e irraa ta’een hagoogamanii fakkaatti. Isaan sun warra ibiddaati. Isaan ishee keessatti hafoodha.

Guyyaa isaan hunda walitti qabnus, (dubbadhu). Ergasii isaan Nutti qindeessaniin ni jenna: “Isiniifi warri isin Nu waliin gabbaraa turtanis iddoo jirtan dhaabadhaa!” Sana booda gidduu isaanii addaan baafne. Warri isaan Nu waliin gabbaraa turan: “Isin nu gabbaraa hin turre” jedhan.

Rabbumatu ga’aadha. ragaa ta’uuf “Gidduu keenyaafi gidduu keessanitti Dhugumatti, nuti isin gabbaruu irraa dagatoo taanee turre.”

Achitti lubbuun hundi waan dabarsite ni beekkatti, Gara Rabbii Gooftaa isaanii kan dhugaa deebifamu. wanni isaan kijibaa turan isaan irraa bada.

jedhiin “Eenyutu samiifi dachii irraa isin soora? Yookiin dhageettiifi argituuwwanillee eenyutu dhuunfata? Ammas eenyutu jiraataa du’aarraa baasa, du’aa jiraatarraa baasa? Eenyutu waan hunda gara gaggalchas?” (jedhi). ‘Rabbuma’ jedhu. “Sila Rabbiin hin sodaattanii?” jedhiin.

Sun Allaah, Gooftaa keessan kan dhugaati. Dhugaa booda jallina malee maaltu jira? (hinjiru). Akkamitti irraa gara galfamtan?

Akka kanatti jechi Gooftaa keetii, warra fincilan irratti mirkanoofte. isaan hin amanan.

Jedhi.“Sila warra isin Rabbii wajjiin gabbartan irraa warri uumama jalqabee, ergasii isa deebisu jiraa?". jedhi “Rabbiin uumama jalqabeeti, ergasiis deebisa. Akkamumatti gara galfamtu?”

Jedhi.“Sila warra isin Rabbii wajjin gabbartan irraa warri gara haqaatti qajeelchu jiraa?”. jedhi Rabbiin gara haqaatti qajeelcha. Sila Isa gara haqaatti qajeelchutu hordofamutti haqamoo isa yoo qajeelfame malee qajeeluu hin dandeenyee dha? Sila isin maaltu isiniif tahe, akamitti murteessitan? [6]

Irra hedduun isaanii shakkii malee hin hordofan, shakkiin dhugaa irraa homaa hin duroomsu, Rabbiin beekaa waan isaan hojjataniiti.

Qur’aanni kun Rabbii gaditti sobaan kan uumamu hin taane. Garuu dhugoomsaa (kitaabota) isa dura turaniitiifi addababaasaa kitaabaati, mamiin isa keessa hin jiru, Gooftaa aalamaarraa irraayi.

Moo sila isaan “isatu (Muhammadtu) of irraa isa uume” jedhu? jedhi suuraa tokko kan isa fakkaattu fidaa, Rabbii gaditti nama dandeessan (gargaarsaaf) waamadhaa, Yoo kan dhugaa dubbattan taatan (jedhi).

Garuu isaan waan beekumsa isaatiin hin marsiniifi waan hiikkaan isaa amma dura itti hin dhufin kijibsiisu, Warri isaan duraas akkuma kanatti kijibsiisan, Booddeen miidhaa raawwattootaa akkam akka ta’e ilaali.

Isaan irraa namoota isatti amanantu jira. Isaan irraas namoota isatti hin amannetu jira. Gooftaan kee badii hojjattoota akkaan beekaadha.

Yoo si kijibsiisan jedhi.“Anaaf dalagaa kiyyatu jira; isiniif dalagaa keessantu jira. Isin waan ani dalagu irraa qulqullaa’oodha; anis waan isin dalagdan irraa qulqulluudha”.

Isaan irraa kanneen gara kee dhageeffatantu jira. Sila ati namoota gurri duude dhageessiftaa? odoo isaan aqlii hin qabaannellee.

Isaan irraas kanneen gara kee ilaalantu jira. Sila ati jaamaa qajeelchitaa? odoo isaan hin argine tahanillee.

Rabbiin nama waatakkallee hin miidhu, Garuu namoonni ofiif lubbuulee isaanii miidhu.

Guyyaa (Rabbiin) walitti isaan qabu [yaadadhu]. Haala akka waan sa'aa takka guyyarraa taate malee hin turin itti fakkaatuun, gidduu isaaniitti wal beekan. Dhugumatti, warri qunnamtii Rabbii kijibsiisan hoonga’aniiru; qajeeloo hin taane.

Garii waan waadaa isaaniif seennee (azaabarraa) yoo sitti argisiifne (toleera); yookiin yoo (sanduratti) si ajjeefne deebiin isaanii (guyyaa qiyaamaa) garuma keenya. Ergasii Rabbiin waan isaan dalagan irratti ragaadha.

Ummata hundaaf ergamaan (ergamee) jira. Yeroo ergamaan isaanii dhufe jidduu isaaniitti haqaan murteeffama isaan hin roorifaman.

Nijedhan “beellamni kun yoomi Yoo kan dhugaa dubbattan taataniif ?”.

Jedhi “ ani lubbuu tiyyaaf miidhaas ta’ee bu’aas fiduu hin danda’u Waan Rabbiin fedhe malee, Ummata hundaaf beellamatu jira. Yeroo beellamni isaanii dhufe, sa’aatii tokkos booda hin aanan; duras hin dabran.” [7]

(warra azaaba jarjarfatuun) Jedhi “Mee naaf himaa! yoo adabbiin Isaa halkan yookiin guyyaa isinitti dhufe, badii raawwattoonni isa irraa maal jarjarfatu?”.

“Sila ogga inni argamee booda isatti amantuu? Sila odoo duraan jarjarfataa turtanii amma amantuu?” (jedhamaan). [8]

Ergasii isaan miidhaa hojjataniin ni jedhama: “Azaaba zalaalam dhandhamaa! Sila waan hojjataa turtaniin malee galata nigalfamtanii?”

“si odeeffatu Sila inni (Guyyaan Qiyaamaa) dhugaa dhaa?” (jechuun). “Eeyyeen! Gooftaa kiyyatti kakadhee! Inni dhugaadha, Isin (Rabbiin) dadhabsiisoo hintaane” jedhi.

Odoo lubbuu (kafaruudhaan) miidhaa raawwatte hundaaf wanti dachii keessa jiru (hundi) ta’eefii (azaaba jalaa) isaan of furti, Yeroo azaabicha argan sheenaa ni dhooyfatu, Gidduu isaaniitti haqaan murteeffama isaan hinmiidhaman.

Dhagayaa! Dhugumatti, wanti samiileefi dachii keessa jiru kan Rabbiiti. Dhagayaa! waadaan Rabbii dhugaadha. Garuu irra baay’een isaanii hin beekan.

(Rabbiin) Inni ni jiraachisa; ni ajjeesas; gara Isaatitti deebifamtu.

Yaa namootaa! Dhugumatti, gorsi Gooftaa keessan irraa taate isinitti dhufte, qorichi waan qomoowwan keessaas, qajeelfamaafi rahmanni mu’uminootaas (isinitti dhufe).

Jedhi “Tola Rabbiitiifi rahmata Isaatiin (dhufte), isa sanitti haa gammadanu, Waan isaan walitti qaban irra isatu caalaa”.

Mee naaf himaa jedhi “ waan Rabbiin isiniif buuse hirerraa isin ergasii isa irraa dhorgamaafi hayyamamaa taasiftan san“, Sila (halaaleysuufii haraameysuu) Rabbitu isiniif hayyamemoo Rabbi irratti kijiba uumtanii odeessitu?”

Sila isaan Rabbi irratti kijiba odeessan Guyyaa Qiyaamaa maal yaadu? Dhugumatti, Rabbiin namoota irratti abbaa tola (guddaa)ti. Garuu irra hedduun isaanii hin galateeffatan.

(Yaa Muhammad!) Hojii kamillee keessatti hin taatu, Qur’aana irraas isa hin dubbiftu, dalagaa irraa waan tokkos hin hojjattan, yeroo isin isatti seentan Nuti isin irratti ragaalee taanu malee hin hafu. Wanti hanga atomii dachii keessattis ta’ee, samii keessattis (beekkomsa) Rabbii kee irraa hin fagaatu. Wanti san irra xiqqaas ta’ee guuddaan kitaaba addeessaa ta’e keessatti jiraatu malee hin hafu.

Dhagayaa! jaalalleewwan Rabbii sodaan isaan irra hin jiraatu; isaan hin gaddanis.

Isaan warra amananii, (Rabbiin) sodaachaa turaniidha. [9]

Isaaniif jireenya addunyaa keessattifii kan Aakhiraa keessattis gammachuutu jira. Jechoota Rabbii jijjiiraan hin jiru. Sun isumatu milkii guddaadha.

Jechi isaanii (kan diin arrabsuufii xiqqeessuu keessatti tahe) sin gaddisiisin. Dhugumatti, jabeenyi hunduu kan Rabbiiti. Inni dhaga’aa beekaadha.

Dhagayaa! wanti samii keessa jiruufi wanti dachii keessa jiru kan Rabbiiti. Isaan Rabbiin malee wantoota biraa qindiifamoota gabbaran maal hordofan?. hinhordofan mamii malee. isaan kijiba qofa uumanii odeessoo malee hintaane.

Inni (Rabbiin) Isa halkan akka isa keessa boqattan isiniif taasiseedha, guyyaa immoo kan ibsu (taasiseedha). Dhugumatti kana keessa namoota dhagayaniif mallattooleetu jira.

“Rabbiin ilma godhate” jedhan. Inni (kana) irraa qulqullaa’ee jira. Inni durreessa, Wanti samiilee keessa jiruufi wanti dachii keessa jiru kan Isaati, Kanatti ragaa homaatuu hin qabdan. Sila waan hin beekne Rabbi irratti jettuu?

“Dhugumatti, isaan Rabbi irratti kijiba kijiban hin milkaa’anu” jedhi.

(Kun) qananii addunyaa keessatti taateedha. Ergasii deebiin isaanii gara keenyatti qofa ta’a, Ergasii waan isaan kafaraa turaniif adabbii cimaa isaan dhandhamsiifna.

Oduu Nuuh isaan irratti dubbisi, Yeroo inni ummata isaatiin jedhe “yaa ummata kiyya! Yoo (isin waliin) turuun kiyyaafi keeyyattoota Rabbiitiin (isin) yaadachiisuun kiyya isinitti guddate, ani Rabbi irratti hirkadhee, tooftaalee keessaniifi qindeeffamoota keessan walitti qabadhaa; ergasii dharti keessan isin irraa dhokataa hin ta’in; ergasii narratti raawwadhaa yeroo naaf hin kenninaatii ”(jedhe). [10]

“Yoo gara galtan, mindaa homaatuu isin hin gaafadhu. Mindaan kiyya Rabbi irratti malee hin taane. Ani Muslimtoota irraa ta’uuttiin ajajame.”(jedhi).

Isaan isa kijibsiisani, ergasii Nuti isaafi namoota isaa waliin jiranis doonii keessatti nagaya baafne. Bakka bu’oo isaan gooneeti warra keeyyattoota keenya sobsiisan bishaaniin dhidhimsiifne. Booddeen dinniinamtootaa akkam akka ta’e ilaali.

Ergasii isa booda (nuuh booda) ergamtoota gara ummata isaanii ni erginee, mallattoowwan ifa ta’aniin isaanitti dhufan. Isaan waan san dura kijibsiisan sanatti kan amanan hin taane. Akka kanatti onnee daangaa dabritootaa irratti cufna.

Ergasii isaan booda Muusaafi Haaruuniin gara Fir’awnaafi qondaalota isaa aayatoota keenyaan erginee jirra. Isaan boonaniiti, badii raawwattoota irraa ta’an.

Yeroo dhugaan Nu biraa isaanitti dhufu “dhugumatti, kun falfala ifa ba’aadha” jedhan.

Muusaan ni jedhe “sila dhugaan isinitti dhufnaan (kana) jettaniinii? Sila inni kun falfalaa? Falfaltoonni hin milkaa’an.” [11]

Isaan ni jedhan: “Sila ati waan abbootii keenya isa irratti argine irraa nu garagalchuuf, ol aantummaan dachii keessatti akka isin lamaaniif taatuuf nutti dhuftee? Nuti isin lamaaniif (muusaafii haaruuna) hin amannu.

Fir’awna ni (ummata isaatiin) jedhe: “Cufa falfalaa beekaatiin natti koottaa.”

Yeroo falfaltoonni dhufan, Muusaan isaaniin ni jedhe: “isin Waan darbuu deemtan darbaa.” [12]

Yeroo isaan darban Muusaan ni jedhe: “Wanti isin isaan dhuftan falfalaa, Rabbiin isa balleessa. Rabbiin dalagaa badii hojjattootaa hin tolchu.

Rabbiin dhugaa jechoota Isaatiin mirkaneessa.Odoo badii raawwattoonni jibbanillee,”

Muusaaf hin amanne, Dhaloota ummata isaa irraa ta’e malee, Fir’awnaafi qondaaltonni isaa isaan jallisuu sodaachuun wajji, Fir’awna dachii keessatti of tuulaadha. Ammas inni daanga dabritoota irraayi.

Muusaanis ni jedhe: “Yaa ummata kiyya! Yoo kan Rabbitti amantan taatan, Isuma irratti hirkadhaa; yoo Muslimoota taatan.”

Isaanis ni jedhan: “Nuti Rabbi irratti hirkannee jirra. Yaa Gooftaa keenya! Ummata miidhaa raawwattootaaf sababaa jallinnaa nu hin taasisin.

ummata kaafirootaa jalaa Rahmata keetiin nagaa nu baasi.”

Muusaafi obboleessa isaatti wahyii goone: “Isin lachanuu ummata keessaniif Misratti manneen qopheessaa; manneen keessan iddoo ibaadaa taasisaa; salaata dhaabaa; mu’uminoota gammachiisi” jechuun .

Muusaan ni jedhe: “Gooftaa keenya! Ati Fir’awnaafi qondaalota isaatiif jireenya addunyaa keessatti miidhaginaafi qabeenyaalee kennitee jirta, (yaa) Gooftaa keenya! Karaa kee irraa akka (namoota) jallisaniif jecha (namaan jallisuuf ittigargaaraman). Gooftaa keenya! Qabeenya isaanii mancaasi; onneewwan isaanii irratti jabeesi. Isaan hanga adabbii laalessaa arganitti hin amanan.”

(Rabbiin) (muusaafii haaruuniin) ni jedhe: “Dhugumatti, kadhaan keessan lamaanii qeebalamtee jirti, Karaa qajeelaa irratti gadi dhaabbadhaa; karaa warra hin beeknee hin hordofinaa.”

Ilmaan Israa’iil galaana ceesifneeti, Fir’awnaafi waraanni isaas jibbaafi diinummaaf isaan hordofan; hanga bishaaniin nyaatamuun isa dhaqqabutti “Isa Ilmaan Israa’iil itti amanan malee haqaan gabbaramaan biraa hin jiruu amaneera. Ani Muslimtoota irraayi” jedhe. [13]

(Yaa fir'oowna) Sila odoo duraan dilooytee, balleessitoota irraa taatee jirtuu amma (amantaa)?! (iimaanni kee yeroon isaa dabartee fudhatama hinqabu)

Har’a qaama keetiin (reeffa kee) akka ati namoota si boodaatiif mallattoo taatuuf si baafna. Dhugumatti, hedduun namoota irraa ta’an mallattoolee keenya irraa dagatoodha.

Nuti dhugumatti, Ilmaan Israa’iil iddoo dhugaa (kabajamaa) (Shaamiifi Misraan keessa) isaan qubachiifnee jirra. Wantoota gaggaarii (halaal) irraas hiree isaanif kenninee jirra. Hanga beekumsi (qur'aanni) isaanitti dhufutti wal hin dhabne. Gooftaan kee guyyaa Qiyaamaa gidduu isaaniitti ni murteessa, waan isaan keessatti wal dhabaa turan keessatti.[14]

Yoo waan Nuti gara keetti buufne irraa (qur'aanarraa) shakkii keessatti taate, isaan si dura kitaaba dubbisaa turan gaafadhu. Dhugumatti, haqni Gooftaa kee irraa sitti dhufee jiraa, shakkitoota irraa hin ta’in.

Isaan keeyyattoota Rabbii kijibsiisan irraas hin ta’in; hoongoftoota irraa taataa. [15]

Warri jechi Gooftaa keetii (kufrirratti du'uun) isaan irratti mirkanoofte hin amanan.

Odoo mallattoon hundi isaanitti dhuftellee hanga adabbii laalessaa arganitti (hin amanan).

Sila magaalaan (erga adabbii Rabbii argitee) amantee ergasii iimaanni ishee ishee fayyade ummata Yuunus malee maaliif hin jiraatini? (Hin jirtu jechuu dha). Isaan amannaan jireenya addunyaa keessatti adabbii salphisaa isaan irraa saaqne, hanga yeroo murtaa’eetti isaan qanansiifne.

Gooftaan kee odoo fedhee namni dachii keessa jiru hundi isaanii marti ni amana ture. Sila ati hanga isaan mu’uminoota ta’anitti namoota dirqisiiftaa? (lakki hindandeessu dirqamaan nama amansiisuu).

Lubbuu kamiifuu hayyama Rabbiitiin malee amanuun hin taane. Isaan sammuu hin qabne irrattii najisa (adabbii) taasisa.

“Mee wantoota samiileefi dachii keessa jiran (hunda) ilaalaa” jedhi. keyyattooleefi akeekkachiiftonni namoota hin amanne irraa homaa hin deebisanu. [16]

Sila ni eeganii fakkaataa guyyoota warra isaan dura dabranii malee? “Egaa, anis isin waliin eegdota irraayi” jedhi.

Ergasii ergamtoota keenyaafi warreen amananis nagaa baafna! Akka kanatti mu’uminoota nagaa baasuun Nu irratti haqa.

jedhi “isin Yaa ilmaan namaa! Yoo amantii kiyya irraa shakkii keessa taatan, isaan isin Rabbii gaditti gabbartan san ani hin gabbaru; garuu Rabbii isa isin ajjeesun gabbara. Ani mu’uminoota irraa ta’uuttin ajajame” (jedhi).

“Fuula kee qajeelchi (amantii dharaarraa dabuudhaan) amantii (haqaatti) gara galchi; mushrikoota irraa hin ta’in” (naanjedhame).

Rabbii gaditti waan si hin fayyadneefi si hin miine hin gabbarin. Yoo (akkas) hojjatte, dhugumatti ati yoos miidhaa hojjattoota irraa taata.”

Yoo Rabbiin rakkinaan si tuqe, Isa malee kan isa fuudhu (sirraa kaasu) hin jiru; yoo toltuun si fedhees tola Isaa kan deebisu (kan sidhowwatu) hin jiru. Isaan (tola saniin) gabroota Isaa irraa nama fedhe tuqa. Inni araaramaa rahmata godhaadha.

Jedhi “Yaa ilmaan namaa! Dhugumatti Gooftaa keessan irraa dhugaan (qur'aanni) isinitti dhufee jira. namni qajeele, kan inni qajeelu lubbuma isaatiifi. Namni jallates, kan inni jallatu ishee irratti. Ani isin irratti ramadamaa miti”.

Waan gara keetti wahyii godhame hordofi. Hanga Rabbiin murteessutti obsi. Inni irra caalaa murteessitootaati.