The Noble Qur'an Encyclopedia

(Rabbiin) Inni mootummaan (waan hundaa) harka Isaa jiru tolli isaa baay'ate. Inni waan hunda irratti danda'aadha. [1]

(Rabbiin) Isa du'aafi jireenya uumeedha eenyuu keessantu irra toltuu akka hojjatu isin qoratuuf jecha. Inni injifataa, araaramaadha.

(Rabbiin) Isa samii torba wal jalaa gubbaan uumeedha; uumaa Rahmaan keessatti wal dhabbii irraa homaa hin argitu. Mee agartuu kee (gara samii) deebisii dhoohaa irraa waan ta'e ni argitaa?

Ergasii yeroo baay'ee ija (laalcha) deddeebisi; ijji (kee) hoonga'aa dadhabaa ta'ee gara kee deebi'a.

Dhugumatti, samii addunyaa ibsaawwaniin (urjiiwwaniin) miidhagsineerra. Sheyxaanotaaf furguuggee ishee goone. Isaaniif adabbii ibidda boba'aa qopheessineerra. [2]

Isaan Gooftaa isaaniitti kafaraniif adabbii jahannamtu jira. Deebi’ichi waa fokkate!

Yeroo ishee keessatti darbaman isheedhaaf (sagalee akka) halaaka harree dhaga'u, haala isheen danfuutti jirtuun.

Dallansuu irraa kan ka'e ciccituutti dhihaatti; dhawaata gareen wahii ishee keessatti darbamuun waardiyyaan ishee "sila akeekkachiisaan (nabiyyiin) isinitti hin dhufnee?" (jechuun) isaan gaafata.

Nijedhu "Eeyyeen; dhugumatti akeekkachiisaan nutti dhufeera; kijibsiifneeti 'Rabbiin homaa hin buufne; isin jallina guddaa keessa jirtu' jenneen".

Nijedhan "Odoo kan dhageenyu yookiin kan xiinxallinu taanee, silaa warra ibidda boba'aa (seenu) keessaa hin taanu turre".

Dilii isaanii ni amanan. Warra ibidda (boba'aa)tiif (rahmata Rabbii irraa) fagaachuun haa tahu!

Warra Gooftaa isaanii fagootti sodaatan araaramaafi mindaa guddaatu isaaniif jira.

Haasawa keessan gadi qabadhaa yookiin ol qabadhaa; Inni beekaa waan qoma keessaati.

Sila Inni uumee (iccitii isaanii) hin beekuu! inni keessa argaafi beekaadha.

Inni Isa dachii laaffifamtuu isiniif godheedha; naannoo ishee keessa deemaatii hiree Isaa irraas nyaadhaa. Deebiin garuma Isaatti.

Sila isa samii olitti tahe sodaa dhabdanii? dachii isiniin cichisiisuu, achumaan isheen sossooti.

mmoo isa samii olitti tahe sodaa dhabdanii? bubbee cirracha qabu isin irratti erguu. Akeekkachiisni Kiyya akkam akka ta'e beekuuf jirtu.

Dhugumatti, warri isaaniin duraa sobsiisaniiru; (adabbiin) mormiin kiyya akkam tureree!

Sila gara simbirroota gubbaa isaaniitti koola (goflaa) (qoochoo) isaanii babal'isanii walitti dachaasanii hin ilaalanuu? Rahmaaniin malee homtuu isaan hin qabu. Inni waan hunda argaadha.

Sila innin sun ka Rahmaaniin achitti waraanaa isiniif ta'ee isinii tumsuu eenyuma? Kaafiroonni gowwummaa keessatti malee hintaane.[3]

Inni isin sooru sun eenyu Odoo Inni soorata Isaa (isinirraa) qabee? (hinjiru). Dhugumatti, isaan diddaafi (haqa) irraa baqachuu itti fufan. [4]

Sila nama fuula isaa irratti gonbifamee deemutu (kaafiraatu) irra qajeelaa moo isa dhaabbatee karaa qajeelaa irra deemutu (mu'iminaatu) (irra qajeelaadha?)

Jedhi: "Inni Isa isin uumee dhageettii (gurraafii), agartuuwwaniifi (ijaafii) onneewwan isiniif godheedha; hangi isin galatoomfattan xiqqaadha"

Jedhi: "Inni Isa dachii keessa isin facaaseedha; garuma Isaatti oofamtan."

(kaafirtoonni mormiidhaaf) Nijedhu "Yoo kan dhugaa dubbattan taataniif, beellamni (kaafamaa) kun yoomi?".

Jedhi: "Dhugumatti, beekumsi isaa (qiyaamaa) Rabbiin qofa bira jira. Ani immoo akeekkachiisaa ifa galaa qofa."

Yeroma dhihoo ta'ee isa (beellamicha) argan fuulleen warra kafaranii fokkatte "Inni kun isa waammataa turtaniidha" jedhame.

Jedhi "Mee naaf himaa! yoo Rabbiin anaafi nama ana wajjin jiru balleesse yookiin rahmata nuuf godhe, kan kaafiroota adabbii laalessaa irraa baraaru eenyu?".

Jedhi "Inni Rahmaani Isatti amanne; Isa irrattis hirkanne. Namni jallina ifa ta'e keessa jiru eenyu akka ta'e beekuuf jirtu".

Jedhi: "Mee naaf himaa! odoo bishaan keessan dachii keessa gadi lixaa ta'ee eenyu bishaan yaa'u isiniif fida?"