The Noble Qur'an Encyclopedia

(Isheen tun) Qulqullina Rabbiifi ergmaa Isaa irraa taate kan gara warra mushrikoota irraa (lola dhiisuuf) waadaa walii galtaniitti (dhaqqabduudha). [1]

Ji’oota afuriif dachii keessa deemaa, Isin Rabbiin dadhabsiisoo akka hin ta’in beekaa. Rabbiin salphisaa kaafirootaati. [2]

(Kuni) labsii Rabbiifi ergamaa Isaa irraa gara namaatti guyyaa hajji guddaa keessatti tahe, “Rabbiin qindeessitoota irraa qulqulluudha; Ergamaan Isaas (akkasuma), Yoo tawbattaniif, inni isiniif caalaadha, Yoo garagaltan immoo isin Rabbiin dadhabsiisoo akka hin ta’in beekaa” jechuudhaan. Warra kafaran adabbii laalessaadhaan gammachiisi. [3]

Garuu qindeessitoota irraa Warri waadaa walii seentanii sana booda homaa isin hin hirdhisiniifi (nama) tokkollee isin irratti hin gargaarin, malee, hanga beellama isaaniitti waadaa isaanii isaaniif guutaa, Rabbiin sodaattota isaa jaalata.

Yeroo ji’oonni kabajamoon dabran, mushrikoota bakka isaan argitanitti ajjeesaa; isaan booji’aa; isaan marsaa; karaa hunda irra isaaniif taa’aa, Yoo tawbatanii salaata gadi dhaabanii, zakaa kennan (lola irraa dhaabaa) karaa isaanii isaaniif gadi dhiisaa, Rabbiin araaramaa rahmata godhaadha.[4]

Yoo tokkoon qindeessitoota (kuffaara) irraa ta’e nagaya gochuu sirra barbaade, nagaya isaaf godhi hanga inni jecha Rabbii (qur'aana) dhagahutti, eegasii iddoo nagaya isaatiin isa ga’i, Kun waan isaan ummata hin beekne ta’aniifi.

Qindeessitootaaf waadaan Rabbiin biraafi ergamaa Isaa bira akkamitti tahaaf? (hintahuuf) warra masjiida kabajamaa biratti waadaa walii seentan malee (walii galtee hudeybiyyaa), waan isaan (waadaadhaan) isiniif dhaabbataniin isinis isaaniif dhaabbadhaa, Rabbiin warra Isa sodaatan jaalata.

Odoo isin irratti injifannoo argatanii, firummaafi waadaas isin keessatti kan hin eegganne ta’anii, akkamitti (waadaan isaaniif ta’a)? (hintahu). Afaanoowwan isaaniitiin isin jaallachiisu; Onneewwan isaanii immoo ni diddi. Irra hedduun isaaniis finciltoota.

Keeyyattoota Rabbiitiin bu’aa xiqqaa bitatanii karaa Isaa irraas (namoota) dhorgan, isaan wanti isaan dalagaa turan waa fokkate.

Mu’umina keessatti, firummaas ta’ee waadaa hin eeggatanu, Warri sun isaanumatu daangaa dabritoota.

Yoo tawbatanii, salaata gadi dhaabanii, zakaa kennan (isaan) amantii keessatti obboleeyyan keessani, keeyyattoota keenya ni addeessina Ummata xiinxallaniif .

Yoo erga waadaa seenanii booda waadaa isaanii diiganii amantii keessan xiqqeesan (arrabsan), hoggantoota kufriitin lolaa isaan waadaan isaaniif hin jiruu, akka dhorgamaniif. [5]

Sila hinloltaniinii? ummata waadaa isaanii diiganii, ergamaa (Rabbii) biyya irraa baasuuf barbaadan, isaan dursanii kan (lolaan) isin jalqaban odoo ta’anii jiranuu (maaliif isaaniin hin lolle?) (lolaanii) Sila isaan sodaattanii? Rabbitu isin Isa sodaachuutti irra haqa, Yoo mu’uminoota taatan.

Isaaniin lolaa, Rabbiin harkoowwan keessaniin isaan adaba; isaan salphisa; isaan irratti isinii tumsa; qomoowwan warra mu’uminootaa ni fayyisa.

Dallansuu onneewwan isaaniis ni deemsisa; Rabbiin nama fedhe irra toowbaa qeebala, Rabbiin beekaa, ogeessa.

Sila odoo Rabbiin isin irraa namoota qabsaa’aniifi kan -Rabbiin, ergamaa isaatiifi mu’uminootaan- malee jaalalloo hin godhatin adda hin baafne dhiifamtu seetuu? (hinsehinaa) Rabbiin waan isin dalagdan keessa beekaadha.

mushrikootaaf hin malu masjiidota Rabbii jiraachisuun, Odoo lubbuulee isaanii irratti kufrii ragaa ba’anii. Isaan dalagaaleen isaanii badde. Isaan ibidda keessa zalaalam jiraatu.

Masjiidota Rabbii kan jiraachisu nama Rabbiifi Guyyaa Qiyaamaatti amane, kan salaata gadi dhaabe, zakaa kenneefi Rabbiin malee homaa hin sodaanne qofa, Warri kun qajeelfamtootarraa tahuun mirkana’eera. [6]

Sila warra hajja’u obaasuufi masjiida kabajamaa jiraachisuu akka (imaana) nama Rabbiifi Guyyaa Qiyaamaatti amanee, karaa Rabbii keessatti qabsaa’ee gootanii? Rabbiin biratti wal hin qixxaawan. Rabbiin ummata midhaa hojjatoota hin qajeelchu. [7]

Isaan amananii, godaananiifi karaa Rabbii keessatti qabeenyaaleefi lubbuulee isaaniitiin qabsaa’an; Rabbiin biratti sadarkaadhaan irra guddatoodha. Isaan sun isaanumatu milkaa’oodha.

Gooftaan isaanii isaan gammachiisa rahmata isarraa taheen, jaalalaafi jannatoowwan ishee keessa qananiin yeroo hundaa isaaniif jirtuun.

Yeroo hunda ishee keessa kan jiraatan ta’anii (isaan gammachiisa); Rabbiin Isa bira mindaa guddaatu jira.

Yaa warra amantan! Abbootii keessaniifi obboleeyyan keessan (firoota keeysan hunaa) yoo isaan iimaana irra kufrii jaalatan jaalallee hin taasifatinaa, Isin irraa namni jaalallee isaan taasifate, warri sun isaanumatu midhaa raawwatoota.

Jedhiin “Yoo abbootin keessan, ilmaan keessan, obboleeyyan keessan, niitiwwan Teessan, firoonni keessan, qabeenyi isin ishee horattan, daldalli isin hir’achuu ishee sodaattaniifi manneen isin jaallattan Rabbi, ergamaa Isaatiifi karaa Isaa keessatti qabsaa’uu irra gara keessanitti (yoo) jaalatamaa ta’e, hanga Rabbiin murtii Isaatiin (adaba isaatiin) dhufutti eegaa” (jedhi). Rabbiin ummata finciltoota hin qajeelchu. [8]

Dhugumatti, Rabbiin iddoo baay’eetti isinii tumseera. Guyyaa (lola) Hunayni, yeroo baay’inni keessan isin dinqisiise, kan homaa isin irraa hin deebisin, dachiin bal’ina ishee wajjin isinitti dhiphattee, eegasii duubatti garagaltanii dheessitan (waan ta’e yaadadhu).[9]

Ergasii Rabbiin ergamaa Isaatiifi mu’uminoota irratti tasgabbii Isaa buuse. Waraana isin hin argines buusee, Isaan kafaran adabe. Kun galata kaafirootaati.

Rabbiin eegasii nama fedhe irraa tawbaa isaa qeebala. Rabbiin araaramaa, rahmata godhaadha.

Isin Yaa warra amantan! Mushrikoonni najisa; waggaa isaanii kana booda masjiidicha kabajamatti akka hin dhiyaanne. Yoo hiyyummaa sodaattan Rabbiin yoo fedhe tola Isa irraa ta’een isin duroomsa. Dhugumatti, Rabbiin beekaa, ogeessa. [10]

Isaan Rabbiifi Guyyaa Dhumaatti hin amannen lolaa, kan waan Rabbiifi ergamaan Isaa haraam godhe haraam hin godhin (hindhiisin), kan amantii haqaa hin fudhanne, warra kitaaba kennaman irraa kan ta’an hanga isaan salpatoo ta’anii gibira harkatti kennanitti (loolaani). [11]

Yahuudonni “Uzayr ilma Rabbiiti” jette. Kiristaanonni “Masiih ilma Rabbiiti” jette. Kun jecha isaanii (kankijibaa) kanuma afaanoowwan isaaniiti (baheedha). Jecha isaan duraan kafaraniitti ni fakkeessu. Rabbi isaan haa balleessu, akkamitti (dhugaa irraa) garagalu!

Hayyoota isaaniitiifi molokseewwan isaanii Rabbiin achitti gabaramtoota godhatan; Masiih ilma Maryamis (gabbaramaa godhatan). Gooftaa tokkicha (Allaah) gabbarutti malee hin ajajamne, Isa malee gabbaramaan haqaa hin jiru, Inni waan isaan itti qindessan irraa qulqullaa’e.

Isaan (kaafiroonni) ifaa Rabbii (islaamummaa) afaanoowwan isaaniitiin dhaamsuu barbaadan, Rabbiin ifaa Isaa guutuu malee (fedhii isaanii) ni dida, Odoo kaafirtoonni jibbanuu.

Inni (Rabbiin) Isa ergamaa Isaa (muhammadiin) qajeelumaafi (Qur'aanaafii) amantii haqaatiin ergeedha, amantii hundarra ol taasisuuf jecha, odoma mushrikoonni jibbanuu.

Yaa warra amantan! Dhugumatti irra hedduun qeesotaafi moloksootaa qabeenya namootaa dharaan (haqaan malee) nyaatan; karaa Rabbii irraa (namoota) deebisan (akka hin islaamoyne dhoowwan), Isaan meetaafi warqee kuusatan, kan karaa Rabbii keessatti ishee hin sadaqanne (zakaa irraa hinbaafne) adabbii laalessaan isaan gammachiisi. [12]

Guyyaa ibidda jahannam keessatti ishee irratti ho’ifamu, kan addawwan isaanii, cinaachowwan isaaniitiifi dugdoowwan isaanii isheen gubamtu (kawuyeeffamu), “Kun waan isin lubbuulee keessaniif kuusaattani; waan kuusaa turtan (adaba isaa) dhandhamaa” (jedhamu). [13]

Lakkoofsi ji’ootaa Rabbi biratti ji’a kudha lamaI, kitaaba Rabbii keessatti, gaafuma samiifi dachii uume. saan keessaa afur kabajamoodha. kanatu amantii sirriiti. Isaan keessatti lubbuulee keessan hin miidhinaa. Mushrikoota tokko ta’aatii lolaan akkuma isaan tokko ta’anii isiniin lolan; Rabbiin warra isa sodaatan wajjin ta’uu beekaa. [14]

(Kabajaa ji’a tokkoo gara ji’a birootti) siiysuun kufrii irratti (kufrii) dabaluudha, Warri kafaran isaan jallifamu, Waggaa tokko (keessa) hayyamamaa isa godhu; waggaa biraa immoo dhorgamaa isa godhu, Akka lakkoofsa wanta Rabbiin dhorgamaa godhee qunnamaniif jecha, waan Rabbiin dhorgamaa godhe hayyamamaa godhu, Fokkataan hojii isaanii isaaniif miidhagfame, Rabbiin ummata kaafira hin qajeelchu.

Yaa warra amantan! Maaltu isiniif jiraayyi yeroo karaa Rabbii keessatti (lolaaf) bahaa isiniin jedhame gara lafaatti rinciccan? Sila jireenya Addunyaa Aakhiraarra jaalatanii? Qananiin jireenya Adunyaa Aakhiraa biratti xiqqo malee hintaane. [15]

Yoo isin (jihaadaaf) bahuu baattan, (Rabbiin) adabbii laalessaa isin adaba; Ummata isin hintahin (qajeelaa) bakka keessan buusa; isin homaa Isa hin miitan, Rabbiin waan hunda irratti danda’aadha.

Yoo isin isaaf tumsuu baattan, dhugumatti Rabbiin isaaf tumseera -yeroo warri kafaran lammaffaa nama lamaa ta’ee isa (Makkaarraa) baasan, yeroo isaan lamaanuu goda (sawrii) keessatti ta’an, yeroo inni saahiba isaatiin (Abiibakri ssiddiiqiin) “hin gaddin Rabbiin nu waliin jiraa; ” jedhu san- (Rabbiin isaaf tumseera). tasgabbii Isaa Rabbiin isa irratti buuse; waraana isin ishee hin arginiinis isa jabeesse, Jecha warra kafaranii gad aantuu taasise, Jechi Rabbii isheedhumatu ol aantuudha, Rabbiin injifataa ogeessa. [16]

Salphoo taatanii yookiin ulfaatoo taataniis duulaaf bahaa; Qabeenyaaleefi lubbuulee keessaniin karaa Rabbii keessatti lolaa. kanatu isiniif caalaadha, Yoo kan beektan taatan. [17]

(Wanti ati itti isaan waamtu) odoo bu’aa dhihoofi imala giddu galeessa ta’ee silaa si hordofu turan. Garuu imalatu isaanitti fagaate, “Odoo dandeenyee silaa isin wajjiin baana turre” (jedhanii) Rabbiin kakatu. Lubbuulee isaanii balleessu. Rabbiin nibeeka kijibdoota ta’uu isaanii. [18]

(Yaa Muhammad!) Rabbiin dhiifama siif godhee, (lola irraa hafuu) maalif isaaniif hayyamte? hanga isaan dhugaa dubbatan siif adda bahanii warra soban beektutti.

Isaan Rabbiifi Guyyaa Aakhiraatti amanan qabeenyaaleefi lubbuulee isaaniitiin qabsaa’uu irraa (hafuuf) hayyama sin gaafatan. Rabbiin warra Isa sodaatu beekaadha.

(Lola irraa hafuuf) hayyama kan si gaafatu isaan Rabbiifi guyyaa aakhiraatti hin amanin kan onneewwan isaanii shakkiteedha (munaafiqoota); Isaan shakkii isaanii keessa deddeebi’u.

Odoo (lolaaf) bahuu fedhanii silaa qophii isaaf qophaa’u turan, Garuu Rabbiin bahuu isaanii jibbee duubatti isaan hanbise; “warra taa’uu wajjiin taa’aa” jedhame[19].

Odoma isiniin waliin ba’aniiyyuu badii malee homaa isiniif hin dabalanu. Rakkoo kan isinitti barbaadan ta’anii, jeequmsaan gidduu keessan fiigu turan, Isin keessa namoota isaaniif dhaggeeffatantu jiru. Rabbiin miidhaa hojjattoota ni beeka.

isaan amma duras rakkoo barbaadanii dhimmoota siif gara gaggalchanii turan, hanga dhugaan dhufee murtiin Rabbii ifa ba’utti osomaa isaan jibbanuu.

Isaan irraa nama “(hafuuf) naaf hayyami; nan mokkorin” jedhuutu jira, Dhagayaa! (isaan) qormaata keessatti kufaniiru. Dhugumatti Jahannam kaafirootatti marsituudha.

Yoo toltuun si mudatte, isaan gaddisiifti, Yoo balaan si mudatte immoo “nuti dursinee of eeggannoo keenya qabannee jirra” jedhan; kan gammadan ta’anii uf duuba garagalu.

“Waan Rabbiin nuuf barreesse malee homaa nu hin mudatu. Inni tiksaa keenya” jedhi, Mu’umintoonni Rabbuma (qofa) irratti haa irkatanii.

Jedhiin “Sila tokkoo toltuu lamaanii malee waan biraa nutti eegduu? Nuti Rabbiin adabbii Isa biraa ta’een yookiin harkoowwan keenyaan isin tuquu (isin azzabuu) eegna. Isinis eegaa; nutis isin wajjiin eegoodha” (jedhi). [20]

“tolaan (jaalalaan) yookaa jibbaan arjoomaa; isin irraa hin qeebalamu, isin ummata finciltoota turtan” jedhi.

wanti sadaqaan isaanii isaan irraa qeebalamuu dhorge hin jiru Rabbiifi ergamaa isaatti kafaruu isaanii malee, waan (akkasuma) salaata hifatoo ta’anii malee kan hin dhufne tahaniifi, kan jibban ta’anii malee arjoomuu dhabuu (isaanii malee).

Qabeenyaaleen isaaniitiifi ilmaan isaanii si hin ajaa’ibsiisin, wanti Rabbiin fedhu jireenya Addunyaa keessatti isheedhaan isaan adabuufi kaafiroota ta’anii lubbuun isaanii bahuu fedha.

Isaan dhugumatti isin irraayyi jechuun Rabbiin kakatu; isaan isin irraayii miti, Garuu isaan ummata sodaatanuudha.

Odoo iddoo itti baqatan yookiin goda yookiin iddoo seenan (qaawwa wahii) argatanii silaa kan fiigan ta’anii gara isaatti deebi’u turan.

Isaan irraas nama (qooda) sadaqaa keessatti maqaa si xureessutu jira, Yoo ishee irraa kennaman ni jaallatu; yoo ishee irraa hin kennamne immoo yoosan isaan ni jibbu (sitti aaru).

Odoo isaan waan Rabbiifi ergamaan Isaa isaaniif kenne jaalatanii “Rabbiin nuuf ga’aadha, Rabbiin fuula dura tola Isaa irraa nuuf kenna, Ergamaan Isaas (akkasuma). nuti gara Rabbii kajeeloodha” jedhanii (silaa isaaniif caalaa ture).

Zakaawwan (kan qoodamtu) dhabeeyyiif, hiyyeeyyiif, warra ishee irratti hojjataniif, warra onneewwan isaanii (Islaamummaa) barsiifamtuuf, gabra bilisoomsuuf, warra idaan irra jiruuf, karaa Rabbii keessattiifi kara deemaadhaaf (qofa). Dirqama Rabbi irraa ta’e (qabadhaa). Rabbiin beekaa ogeessa. [21]

Isaan irraas warra Nabiyyii rakkisantu jiru; “Inni gurra” jedhu. Jedhiin: “(Eeyyeen inni) gurra isiniif gaarii ta’eedha; Rabbitti ni amana, Mu’uminootas ni dhugoomsa. Isin irraa warra amananiifis rahmata.” Isaan ergamaa Rabbii rakkisan, isaaniif azaaba laalessaatu jira.

Isin gammachiisuf Rabbiin isiniif kakatan; Rabbiifi ergamaa Isaatu isaan isa gammachiisuu irra haqa godhata yoo mu’uminoota ta’an.

Sila isaan hin beeknee? nama Rabbiifi ergamaa Isaa faallesse, ibidda jahannamtu ishee keessatti kan hafu ta’ee isaaf jira jechuu. Kun salphina guddaadha.

Munaafiqoonni suuraan waan onneewwan isaanii keessa jiru isaanitti odeessitu isaan irratti buufamuu sodaatu. Jedhiin: “qishnaa godhaa. Rabbiin waan isin sodaattan (ifa) baasaadha.”

Yoo isaan gaafatte “Nuti haasawatti kan seennuufi kan taphannu qofa turre” jedhu. “Sila Rabbitti, keeyyattoota Isaatiifi ergamaa Isaatti qishnaa kan gootan taatanii? jedhiin.

Rakkoo hin himatinaa (dhiifama hingaafatinaa)! Dhugumatti isin erga amanuu keessaniitii booda kafartanii jirtu. Yoo garee isin irraa ta’eef irra dabarre, garee biraa ni adabna, waan isaan yakkamtoota ta’aniif. [22]

Munaafiqoonni dhiiraatiifi munaafiqoonni dubartii gariin isaanii garii irraayi. Waan jibbamaatti ni ajaju; waan gaarii irraa immoo ni dhorgu; harkoowwan isaanii (kenna irraa) ni deeffatu (nitamtoommatu); Rabbiin dagatan; Innis isaan dhiise. munaafiqoonni isaanumatu finciltoota.

Rabbiin munaafiqoota dhiiraa, munaafiqoota dubartiifi kaafirootaafis ibidda jahannam beellamee jira, ishee keessatti zalaalam jitaatoodha, isheen isaaniif geessuudha, Rabbiin isaan abaareera. Isaaniif adabbii itti fufaatu jira.

(Isin) akkuma warra isin dura dabraniiti; Isaan humnaan isin irra jajjaboo turan, qabeenyaafi ilmaaniinis isin irra baay’ee turan, Isaan qooda isaaniitti qanani’an, akkuma warri isin dura (dabran) qooda isaanitti qanani’an isiniis qooda keessanitti qananiitan. Akkuma isaan (tapha) keessa seenan isinis (tapha) keessa seentan. Warri sun Addunyaafi Aakhiraattis dalagaaleen isaanii baddee jirti. Warri sun isaanumatu hoonga’oodha.

Sila oduun warra isaan duraa isaanitti hin dhufnee? (Oduun) ummata Nuuh, Aad, Samuud, ummata Ibraahiim, jiraattota Madyaniifi (gandattii) garagalfamtuu (ummata luux) (isaanitti hin dhufnee)? Ergamtoonni isaanii ragaalee mul'ataan isaanitti dhufanii jiru. Rabbiin kan isaan miidhu hin taane. Garuu isaan lubbuulee isaanii kan miidhan turan.

Mu’uminoonni dhiiratiifi Mu’uminoonni dubaraa gariin isaanii jaalallee gariiti. Toltutti ajaju; hamtuu irraa dhorgu, salaata gadi dhaabu; Zakaa ni kennu; Rabbiifi ergamaa Isaatiifis ni ajajamu. Warri sun Rabbiin fuula dura rahmata isaaniif godha. Rabbiin injifataa, ogeessa.

Rabbiin mu’uminoota dhiiraatiifi dubartootaatiifis jannata laggeen ishee jala yaatu waadaa seene, ishee keessatti kan hafan ta’anii manneen gaggaarii jannata qubsumaa keessa taates (waadaa galee jira). Jaalalli Rabbiin irraa ta’e (waahunda)rra guddaadha. Kun milkii guddaadha.

Yaa Nabiyyichaa! kaafirootaafi munaafiqoota irratti qabsaa’i; isaan irratti jabeessi. Teesson isaanii jahannami. Deebiin isaanii (jahannam tahuun) waa hammaatee! [23]

Homaa hin jenne jedhanii Rabbiin kakatu. Dhugumatti isaan jecha kufrii jedhaniiru; Erga Islaamummaa isaaniitii kafaraniiru; Waan itti hin geenye yaadaniiru; Rabbiifi ergamaan isaa tola Isa irraa ta’een isaan duroomsuu malee waan biraa hin jibbine. Yoo tawbatan caalaa isaaniif ta’a; yoo (irraa) garagalan immoo Rabbiin Addunyaafi Aakhiraattis adabbii laalessaan isaan adaba. Dachii keessatti jaalalleefi tumsaan isaaniif hin jiru. [24]

Isaan (munaafiqoota) irraas kan “Yoo (Rabbiin) tola Isaa irraa nuuf kenne, silaa dhugumatti ni arjoomna; Gaggaarii irraa ni taana” (jechuun) Rabbiif waadaa seenantu jiru.

Yeroma (Rabbiin) tola Isaa irraa isaaniif kenne, (waadaa diiganii) isa doynoomanii (kennachuu didan); kan garagalan ta’anii dugda duuba deebi’an.

Munaafiqummaa onneewwan isaanii keessatti isaan dhaalchise hanga guyyaa (qiyaamaa) Isaan wal qunnamaniitti. waan Rabbiin waadaa isaa faallessaniifi waan sobaa turaniif.

Sila Rabbiin iccitii isaaniitiifi maqoo isaaniis kan beeku ta’uufi Rabbiin wantoota fagoo hundas akkaan beekaa ta’uu hin beeknee?

(Isaan) warra mu’uminoota irraa warra arjoomuu keessatti tola oolaniifi isaan waan dandeettii isaanii malee hin arganne maqaa xureessaniidha; Isaan isaanitti qishinu. Rabbiin isaanitti qishina (isaan adaba). Isaaniif adabbii laalessaatu jira.

Araarama isaaniif kadhadhu yookiin araarama isaaniif kadhachuu dhiisi; yoo yeroo torbaatama araarama isaaniif kadhatte, Rabbiin isaaniif hin araaramu. Kun waan isaan Rabbiifi ergamaa Isaatti kafaraniifi. Rabbiin ummata finciltoota hin qajeelchu.

Isaan (duula irraa) hafan, booda ergamaa Rabbiitii taa’uu isaaniitti gammadan; qabeenyaaleefi lubbuulee isaaniitiin karaa Rabbii keessatti qabsaa’u ni jibban; “ho’a keessa duulaaf hin bahinaa” jedhan. “Odoo beekanii ibidda jahannamtu ho’atti irra cimaadha” jedhiin. [25]

(Adduniyatti) xiqqoo kolfanii (Aakhiratti) baay’ee haa booyani. Galata waan kan hojjatan tahaniitiif.

Yoo Rabbiin gara garee isaan irraa taateetti si deebisee, (duulaaf) bahuuf hayyama si gaafatan, jedhiin. “na wajjiin gonkumaa hin baatan; na wajjinis diinaan hin loltanu, Isin yeroo jalqabaa taa’umsa jaalattanii jirtu. warra (mana) taa’an wajjin taa’aa”(jedhiin). [26]

Isaan irraa nama du’e tokkollee irratti (salaata janaazaa) hin sagadin, Qabrii isaa irras (araarama isaa kadhachuuf) hin dhaabbatin, isaan Rabbiifi ergamaa Isaattis kafaran. finciltoota ta’anii du’aniiru.

Qabenyi isaaniitiifi ilmaan isaanii si hin ajaa’ibsiisin. Rabbiin isheedhaan addunyaa keessatti isaan adabuu fedha, isaan kaafiroota ta’anii lubbuun isaanii bahuu (fedha).

Yeroo suuraan Rabbitti amanaa ergamaa Isaa wajjiin qabsaa’aa isaaniin jettu takka buufamte, isaan irraa warri qabeenya qaban si hayyamsiifatan “Nu dhiisi nuti warra taa’an wajjin taanaa” jedhan.

Warra (duula irraa) (rakkoof) hafan wajjiin tahuu jaalatan. Onneewwan isaanii irratti cufameera, isaan hin hubatan.

Garuu ergamaan (muhammad) warri isaa wajjin amanan, qabeenyaaleefi lubbuuwwan isaaniitiin qabsaa’anii jiru. Warri sun toltuuwwantu isaaniif jira. Warri sun isaanumatu milkaa’oodha.

Rabbiin jannata laggeen ishee jala yaatu, Isaan ishee keessatti kan hafan ta’anii, isaaniif qopheessee jira. Kuni milkii guddaadha.

Tikfattoota baadiyyaa irraa warri rakkoo himatan akka hayyamni isaaniif godhamuuf jecha dhufan. Isaan Rabbiifi ergamaa Isaa kijibsiisan ni taa’an (rakkoo hinhimanne). Isaan irraa warra kafaran fuula dura adabbii laalessaatu isaan tuqa.

Dadhabdoota, dhukkubsattootaafi isaan waan kennatan hin arganne irratti diliin hin jiru, yoo Rabbiifi ergamaa Isaatiif toltuu yaadan (duuluu baatanis). Toltuu raawattoota irra karaan (komii) hin jiru. Rabbiin araaramaa, rahmata godhaadha.

Isaan (sanirras komiin hinjiru) kan akka waan yaabbatan isaaniif kennitu yeroo sitti dhufan, ati “waan yaabbattan isiniif hin argu” jetteen, waan sadaqatan dhabuu irraa gaddaan ijji isaanii imimmaan yaasaa deebi’an irras (komiin) hin jiru.

Karaan (Komii) kan jiru warra dureeyyii ta’anii hayyama si gaafatan qofa irra. Warra hafan waliin ta’uu jaalatan; Rabbiin onneewwan isaanii irratti cufe; kanaafuu, isaan homaa hin beekan.

Yeroo gara isaanii deebitan rakkina isinitti dhiheeffatu. jedhiin “rakkina hin himatinaa; Nuti isiniif hin amannu. Dhugumatti, Rabbiin oduu keessan irraa nuuf himee jira. Rabbiifi ergamaan Isaas hojii keessan arguuf jiru. Sana booda gara isa waan mul’atuufi hin mul’anne beekuutti deebifamtu. Waan isin dalagaa turtan isinitti hima” (jedhiin). [27]

Yeroo isin gara isaanii deebitan akka isin isaan irraa gara galtaniif Rabbiin isiniif kakatu; isaan irraa gara galaa (dallanaa isaan dhiisaa oodaanii); isaan najisa. teesson isaanii jahannama galata waan dalagaa turaniitiif.

Akka isin isaan irraa jaalattaniif isiniif kakatu, Yoo isin isaan irraa jaalattanis, Rabbiin dhugumatti ummata finciltoota irraa hin jaalatu.

Horsiisee bultoonni kufriifi munaafiqummaatti irra cimoodha; daangaawwan waan Rabbiin ergamaa Isaa irratti buusee beekuu dhabuutti irra dhihoodha. Rabbiin hunda beekaa, ogeessa.

Horsiisee bultoota irraa namoota waan (karaa Rabbii keessatti) arjoomu akka idaatti qabatujjira. naannoowwaa (rakkina) isinitti eega. Naannoon hamtuu isaan irratti haa ta’u. Rabbiin dhaga’aa, beekaadha.

Tikfattoota baadiyyaa irraa nama Rabbiifi Guyyaa Aakhiraatti amanee waan (karaa Rabbii keessatti) arjoomus Rabbiin biratti dhiheenyaafi kadhaa ergamaa (muhammad) (ittiin argat) godhatutu jira. Dhagayaa! dhugumatti isheen isaaniif dhiheenya. Rabbiin fuula dura rahmata Isaa keessa isaan seensisa. Rabbiin araaramaa, rahmata godhaadha.

Muhaajirootaafi Ansaarota irraas dursitoonni jalqabdoota ta’aniifi warri toltuudhaan isaan hordofanis, Rabbiin isaan irraa jaalateera. Isaanis Isa irraa jaalatanii jiru. Jannata ishee jala laggeen yaatu kan ishee keessatti abad hafan ta’anii isaaniif qopheessee jira. Kun milkii guddaadha.

Tikfattoota baadiyyaa irraa gariin warra naannoo keessan jiruu munaafiqoota. Warra Madiinaa irraas (namoota) munaafiqummaa irratti ragga’an jiru, ati isaan hin beeknetu. Nuti isaan ni beekna. Fuula dura yeroo lama isaan adabna. Ergasii isaan gara adabbii guddaa deebifamu.[28]

Warri biroo immoo (kan lolarraa hafan) kan badiilee isaanii fudhatan, dalagaa gaariifi fokkataa biraa walitti makantu jiru; Rabbiin tawbaa isaanii irraa qeebaluun nikajeelama, Rabbiin araaramaa, rahmata godhaadha.

Qabeenya isaanii irraa sadaqaa isheedhaan isaan qulqulleessituufi isaaniif dabaltuun fuudhi. Rabbiin isaaniif kadhu; kadhaan kee isaaniif tasgabbiidha. Rabbiin dhagayaa, beekadha.[29]

Sila isaan ‘Rabbiin Isatu gabroota Isaa irraa tawbaa qeebalaafi sadaqaas fudha’ jechuu hin beeknee? Rabbiin isatu tawbaa qeebalaafi rahmata godhaa dha’ jechuus (hin beeknee?).

Hojjadhaa jedhiin, Rabbiin, ergamaan Isaatiifi mu’umintoonnis dalagaa keessan ni argu, Gara beekaa wantoota fagoofii wantoota mul’ataniis fuula dura ni deebitu, Waan isin dalagaa turtanis isinitti odeessa.

Warri biroo immoo kan murtii Rabbii (eeguuf) booda aanfamantu jiru. Yookiin isaan adaba, yookiin immoo tawbaa isaan irraa qeebala. Rabbiin beekaa, ogeessa.

Warri (mu’uminoota) rakkisuuf,masjiida tolfatan, akkasuma kufrii (babal’isuuf), gidduu mu’uminootaa addaan baasuufi, nama duraan Rabbiifi ergamaa Isaatiin loleef eegumsa godhuuf, (jecha masjiida tolfatanis isaanuma irraayyi). Dhugumatti kakatu “Nuti toltuu malee homaa hin feene” jedhanii. Rabbiin isaan kijibdoota tahuu ragaa baha.[30]

Gonkumaa isa (masjiidicha) keessa hin dhaabbatin. masjiida guyyaa jalqabaa irraa sodaa (Rabbii) irratti bu'ureeffametu ati isa keessa dhaabbachuu haqa godhata. Isa keessa namoota qulqulleeffachuu jaalatantu jiru. Rabbiin qulqulleeffattoota jaalata. [31]

Sila nama jaarmaya isaa sodaa Rabbirraa ta’eefi jaalala (Isaa) irratti bu’ureesse ccaalamoo, nama jaarmaya isaa afaan (qarqara) boollaa (jijjiiyduu) kan cituutti dhiyaate irratti bu’uuressee, ibidda jahannam keessatti isaan jigetu caala? Rabbiin ummata miidhaa hojjattoota hin qajeelchu. [32]

Ijaarsi isaanii inni isaan ijaaran onneewwan isaanii keessatti (munaafiqummaafi) shakkii ta’uu irraa hin deemu. yoo onneewwan isaanii ciccitte malee. Rabbiin beekaa, ogeessa.

Rabbiin mu’uminoota irraa jannanni isaaniif ta’uudhaan lubbuuleefi qabeenyaalee isaanii biteera. Karaa Rabbii keessatti lolu; ni ajjeesu; ni ajjeefamus. Kun Tawraat, Injiiliifi Qur’aana keessatti waadaa Isa irratti tahee mirkanaa’eedha. Namni Rabbi irra waadaa isaa guutu eenyu? Kanaafuu gurgurtaa keessan isa gurgurattaniin gammadaa. Sunis isatu milkii guddaadha.[33]

(Isaan) tawbattoota, gabbartoota, faarsitoota, soomtoota, warra rukuu’a godhan, warra sujuuda godhan, warra toltuutti ajajan, warra hamtuu irraa dhorganiifi warra daangaalee Rabbii eeganiidha. Mu’uminootas (jannataan) gammachiisi.

Nabiyyichaafi warra amananiif, mushrikootaaf (Rabbiin) araarama kadhachuun kan malu hin taane, odoo firoota dhihoo ta’anillee, erga warra jahannam ta’uun isaaniif ifabahe booda. [34]

Araarama abbaa isaatiif kadhachuun Ibraahiim waadaa ishee isaaf seene sana (guutuu) irraayyi malee waan biraa hin turre. Yeroma inni (kufrirratti du'u isaa beeysifamuun) diina Rabbii ta’uun ifa isaaf tahe isa irraa qulqullaaye, Dhugumatti Ibraahiim akkaan Rabbi kadhataadha obsaadha.

Rabbiin ummata tokko erga isaan qajeelchee booda hanga waan isaan eeggachuu qaban isaaniif ibsutti kan (isaan) jallisu (yakkamaa godhu) hin taane, Dhugumatti Rabbiin waan hunda beekaadha.

Rabbiin mootummaan samiileefi dachii kan Isaati. Ni jiraachisa; ni ajjeesas. Rabbiin malee tiksaafi tumsaan tokkollee isiniif hin jiru.

Dhugumatti Rabbiin nabiyyicha, muhaajirootaafi ansaarota itti araarame. warra yerottii rakkoo keessa isa hordofan, erga onneen garee isaan irraa ta’anii jallachuutti dhihaatee booda. Sana booda Rabbiin tawbaa isaanii qeebaleera, inni isaaniif mararfataa rahmata godhaadha.

Warra sadeen booda aanfaman (irraa Rabbiin tawbaa qeebale) kaneen hanga dachiin bal’ina ishee wajjin isaan irratti dhiphattee, lubbuuleen isaaniis isaan irratti dhiphattee, Rabbi irraas gara Isaatti malee iddoon itti baqatan hin jiruu hanga mirkaneeffatanitti (booda aanfaman irraas) (Rabbiin tawbaa qeebaleera). Sana booda akka isaan tawbataniif jecha tawbaa isaan irraa qeebale. Dhugumatti, Rabbiin Isatu araaramaa rahmata godhaadha. [35]

Yaa warra amantan! Rabbiin sodaadhaa; warra dhugaa wajjiin ta’aa.

Warra Madiinaatiifi tikfattoota baadiyyaa irraa warra moggaa isaaniitti argamaniif ergamaa Rabbii irraa duubatti hafuufi lubbuu isaaniis lubbuu isaa irra jaalachuun isaaniif hin malu ture. Sunis malee karaa Rabbii keessatti dheebuun, dadhabbiifi beellis isaan mudatee hojiin gaariin isaanii barreefamu malee hin hafan. akkasumas iddoo ejjannaa kaafiroota dallansiisu tokkoos ijjatanii diina irraas (ajjeesuufi booji’uun) qaqqabiinsa tokkos qaqqabanii (hojiin gaariin isaanii barreefamu malee hinhafan). Dhugumatti, Rabbiin mindaa toltuu raawwattootaa hin balleessu.

Kennaa xiqqoos ta’ee guddaa kennanii hinhafan; laga tokkos qaxxaamuranii hinhafan isaaniif barreeffamu malee, Rabbiin gaarii waan isaan dalagaa turanii isaanii galata galcha.

Mu’uminoonni (nabiyyii wajjin yoo ta’e malee) dimshaashatti duulatti bahuun isaaniin hin malu. Sila maaliif garee hunda irraa muraasni tokko hin lolle? (Warri biroo immoo) akka amantii keessatti hubannoo godhatanii yeroo gara isaaniitti deebi’an, akka ummata isaanii dinniinaniif (gorsaniif) jecha (maaliif hin hafne). Akka isaan (hamtuu) eeggataniif. [36]

Yaa warra amantan! Kuffaara irraa warra isinitti aananiin lolaa. Isin keessattis jabeenya haa arganu. Rabbiin warra Isa sodaatan wajjin jiraachuu beekaa.

Yeroo suuraan tokka buute isaan irraa nama “eenyuu keessaniif isheen tun iimaana dabalte?” jedhutu jira. Egaa isaan amananiif kan gammadanu ta’anii iimaana isaaniif dabalte.

Isaan onneewwan isaanii keessa dhukkubni jiru immoo najisa isaanii irratti najisa isaaniif dabalte. Isaan kaafiroota ta’anii du’an.[37]

Sila isaan waggaa hunda keessa yeroo tokko yookiin yeroo lama mokkoramuu isaanii hin arganuu? Ergasii hin tawbatanii? Isaan hin gorfamanuu?

Yeroo suuraan (isaan saaxiltu) takka buufamte, gariin isaanii gara garii isaanii ilaala “namni tokkolleen sila isin argaa jiraa?” jedhaa. Sana booda garagalanii deemu. Rabbiin onneewwan isaanii garagalche Waan isaan ummata hubannoo hin qabne ta’aniif.

Dhugumatti, iisinitti dhufe ergamaan isin irraa ta’e, kan rakkinni keessan isa irratti jabaatu, kan isiniif (akka amantanuuf) bololu, mu’uminootaaf immoo mararfataa, rahmata godhaa ta’e.

Yoo isaan (sirraa) garagalan, jedhi “Rabbiin naaf gahaadha. Isa malee haqaan Gabbaramaan hin jiru. Isa qofa irrattin irkadhe; Inni Gooftaa arshii guddaati”.